ގެވެށި އަނިޔާގެ ގޮތުގައި އެންމެ ގިނައީ ކައިވެނިކޮށްގެން ނުވަތަ އިނދެވަރިކޮށްފައި ތިބި މީހުންގެ މައްސަލަތައް
2022 ވަނަ އަހަރުގެ ފުރަތަމަ ކުއާޓާގައި ޖުމްލަ 290 މީހުންނަށް ގެވެށި އަނިޔާ ލިބިފައިވޭ
ބައެއް މައްސަލަތަކަކީ އެއް މުއައްސަސާއަށްވުރެ ގިނަ މުއައްސަސާއިން ހުށަހަޅާފައިވާ މައްސަލަތައް
މިއަހަރުގެ ފުރަތަމަ ކުއާޓާގައި އެންމެ ގިނަ އަދަދަކަށް ގެވެށި އަނިޔާ ހިންގާފައިވަނީ ކައިވެނިކޮށްގެން ނުވަތަ އިނދެވަރިކޮށްފައި ތިބި މީހުންގެ ދެމެދުގައި ކަމަށް ފެމިލީ ޕްރޮޓެކްޝަން އޮތޯރިޓީން ބުނެފިއެވެ.
މިއަހަރުގެ ފުރަތަމަ ކުއާޓާގައި ގެވެށި އަނިޔާގެ 266 މައްސަލަ ރިޕޯޓުކޮށްފައިވެއެވެ. އެންމެ ގިނަ އަދަދަކަށް ގެވެށި އަނިޔާ ހިންގާފައިވަނީ ކައިވެނިކޮށްގެން ނުވަތަ އިނދެވަރިކޮށްފައި ތިބި މީހުންގެ ދެމެދުގައި ކަމަށްވާއިރު އެއީ 37.3 އިންސައްތަ މައްސަލައެވެ. އަދި ދެވަނައަށް އެންމެ ގިނަ އަދަދަކަށް ގެވެށި އަނިޔާ ހިންގާފައިވަނީ ނަސަބުގެ ގޮތުން ނުވަތަ ގާތްތިމާގެކަމުގެ ގޮތުން ނުވަތަ ކައިވެނީގެ ގޮތުން އާއިލީ ގުޅުމަކުން ގުޅިފައިވާ މީހުންގެ ދެމެދުގައެވެ. އެއީ 31.1 އިންސައްތަ މައްސަލައެވެ.
ފެމިލީ ޕްރޮޓެކްޝަން އޮތޯރިޓީން ބުނީ ބައެއް މައްސަލަތަކަކީ އެއް މުއައްސަސާއަށްވުރެ ގިނަ މުއައްސަސާއިން ހުށަހަޅާފައިވާ މައްސަލަތައް ކަމުން ފުރަތަމަ ކުއާޓާގައި 264 ރިފަރަލް ލިބިފައިވާ ކަމަށެވެ. އެގޮތުން އެންމެ ގިނަ ރިފަރަލް ހުށަހަޅާފައިވަނީ ފުލުހުން ކަމަށެވެ. އެއީ 148 ރިފަރަލްއެވެ. ޖެންޑަރ މިނިސްޓްރީ 102 ރިފަރަލް ލިބިފައިވާއިރު ސިއްޙީ ޚިދުމަތްތެރިންގެ ފަރާތުން 11 ރިފަރަލް ލިބިފައިވެއެވެ. އަދި 3 މައްސަލައެއް ސީދާ އޮތޯރިޓީއަށް ހުށަހަޅާފައިވެއެވެ. 66 އިންސައްތަ ރިފަރަލް ލިބިފައިވަނީ ގްރޭޓަރ މާލެ ރީޖަންގެ މުއްސަސާތަކުން ކަމަށް ވެސް ވަނީ ބުނެފައެވެ.
ފާއިތުވި ދެ އަހަރުގެ ފުރަތަމަ ކުއާޓާގައި ލިބުނު ރިފަރަލްތަކަށްވުރެން މި ކުއާޓާގައި ލިބުނުގެ ރިފަރަލްތަކުގެ އަދަދު ވަނީ އިތުރުވެފައެވެ. ފުރަތަމަ ކުއާޓާގައި ލިބުނު ރިފަރަލްތަކުގެ ތެރެއިން 53 އިންސައްތަ މައްސަލަތަކުގައި އަނިޔާގެ ހާދިސާ ހިނގާފައިވަނީ 2022 ވަނަ އަހަރުގެ ތެރޭގައެވެ. ބާކީ ހުރި 47 މައްސަލަތަކުގައި އަނިޔާގެ ހާދިސާ ހިނގާފައިވަނީ 2018 ވަނަ އަހަރާއި 2021 އަހަރުގައި ކަމަށް ފެމިލީ ޕްރޮޓެކްޝަން އޮތޯރިޓީން ވަނީ ބުނެފައެވެ.
2022 ވަނަ އަހަރުގެ ފުރަތަމަ ކުއާޓާގައި ޖުމްލަ 290 މީހުންނަށް ގެވެށި އަނިޔާ ލިބިފައިވާ ކަމަށް ވަނީ ރިޕޯޓް ކުރެވިފައެވެ. އޭގެތެރެއިން 18 އަހަރުން މަތީގެ 173 އަންހެނުން، 40 ފިރިހެނުން، އަދި 18 އަހަރުން ދަށުގެ 42 އަންހެންކުދިން އަދި 26 ފިރިހެންކުދިން އަދި ޖިންސުގެ މައުލޫމާތު ލިބިފައިނުވާ 8 ކުޑަކުދިންގެ ހިމެނެއެވެ. ގެވެށި އަނިޔާގެ އަމަލެއް ހިންގައިގެން ރިޕޯޓް ކުރެވުނު މީހުންގެ ޖުމްލަ އަދަދަކީ 257 އެކެވެ. މީގެ ތެރޭގައި 217 ފިރިހެނުން، 38 އަންހެނުން އަދި ޖިންސުގެ މައުލޫމާތު ލިބިފައިނުވާ 2 މީހުން ހިމެނެއެވެ.
2022 ވަނަ އަހަރުގެ ފުރަތަމަ ކުއާޓާގައި އެންމެ ގިނަ އަދަދަކަށް ހިނގާފައިވާ ކަމަށް ރިޕޯޓު ކުރެވިފައިވާ ގެވެށި އަނިޔާގެ އަމަލުތަކަކީ ނަފްސާނީ އަނިޔާ އަދި ބަހުގެ ހަމަލާގެ 182 ހާދިސާ، ޖިސްމާނީ އަނިޔާގެ 136 ހާދިސާ، އަދި ބިރުދެއްކުމުގެ 124 ހާދިސާއެވެ. މި ތިން ބާވަތުގެ އަނިޔާއަކީ ފާއިތުވި ތިން އަހަރުގެ ތެރޭގައި ވެސް އެންމެ ގިނަ އަދަދަކަށް ހިންގާފައިވާ ކަމަށް ރިޕޯޓް ކުރެވިފައިވާ ގެވެށި އަނިޔާގެ އަމަލުތައް ކަމަށް ވަނީ ބުނެފައެވެ.
