މިދިޔަ އަހަރުގެ މެއި 6 ވަނަ ދުވަހު ކުރީގެ ރައީސް އަދި ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދަށް އަމާޒުކޮށްގެން ޓެރަރިސްޓް ހަމަލާއެއް ދިން އިރު އެކަމުގައި ބައިވެރިވި ކަމަށް ބެލެވޭ ލ. ގަން، ތުނޑި، ދުންފިނިއުފާ، އަހުމަދު ފާތިހު ހުރީ ފުލުހުންގެ ވަޒީފާގައި ނޫން ކަމަށް ފުލުހުން ބުނެފިއެވެ.
ހޯމަ ދުވަހުގެ ރޭ ފުލުހުން ނެރުނު ބަޔާނެއްގައި މިގޮތަށް ބުނެފައިވަނީ ރައީސް ނަޝީދަށް ހަމަލާ ދިން އިރުވެސް ފާތިހު ހުރީ ފުލުހުންގެ ވަޒީފާގައި ކަމަށް ބުނެ ދެކެވެމުންދާ ވާހަކަތަކާ ގުޅިގެންނެވެ. ފުލުހުން ބުނީ މެއި 6 ވަނަ ދުވަހު ހަމަލާ ދިން އިރު ވެސް އަދި ހައްޔަރު ކުރި އިރުވެސް އޭނާ ހުރީ ފުލުހުންގެ ވަޒީފާގައި ނޫން ކަމަށެވެ.
ރައީސް ނަޝީދަށް އަމާޒުކޮށްގެން ދިން ހަަމަލާގައި ހައްޔަރު ކުރި ފާތިހު އަކީ ފުލުހުންގެ އިންޓެލިޖެންސް ޑިޕާޓްމަންޓުގައި މަސައްކަތް ކޮށްފައިވާ މީހެކެވެ. އޭނާ ފުލުހުންގެ ވަޒީފާއާ ގުޅުނީ 2018 ނޮވެމްބަރު 25ގައި ކަމަށާއި 2021 ފެބްރުއަރީ 3ގައި އޭނާ ވަޒީފާއިން އަމިއްލައަށް ވަކިވެފައިވާ ކަމަށް ވެސް ފުލުހުން ބުނެއެވެ. މިކަން މީޑިއާތަކަށާއި ތަހުގީގު ކުރިއަށްދާ ގޮތް ބެލި ހުރިހާ ފަރާތްތަކަށް ވެސް އަންގާފައިވާނެ ކަމަށް ވެސް ފުލުހުން ބުނެއެވެ.
މެއި 6ގެ ހަމަލާއާ ގުޅިގެން ފާތިހު ހައްޔަރު ކުރީ ބ. ދަރަވަންދޫ އިންނެވެ. އޭނާ ހައްޔަރުކޮށް ތަހުގީގުތައް ނިންމައި ދައުވާކޮށްދޭން ޕްރޮސެކިއުޓާ ޖެނެރަލްގެ އޮފީހަށް ފޮނުވި ކަމަށް ވެސް ފުލުހުން ބުނެއެވެ. ނަމަވެސް ޕްރޮސެކިއުޓާ ޖެނެރަލްގެ އޮފީހުން ވަނީ ފާތިހުގެ މައްޗަށް ދައުވާ ކުރެވޭނެ އެކަށީގެންވާ ހެކި ނެތުމުން ދައުވާ ނުކުރަން ނިންމާފައެވެ.
ފާތިހުގެ އިތުރުން އެ މައްސަލާގައި އިތުރު 10 މީހަކު ހައްޔަރު ކުރިއެވެ. އޭގެ ތެރެއިން އެ ހަމަލާގައި އަމަލީ ގޮތުން ބައިވެރިވި އަދުހަމް މުހައްމަދުގެ މައްޗަށް ކުށް ސާބިތުވެ 23 އަހަރުގެ ޖަލު ހުކުމެއް ވަނީ އިއްވާފައެވެ. ބާކީ ތިބި މީހުންގެ ޝަރީއަތްތައް ދަނީ ކުރިއަށެވެ.
ފުލުހުން ބުނެފައިވާ ގޮތުގައި ރައީސް ނަޝީދު އަވަހާރަކޮށްލުމުގެ މަގުސަދުގައި ދިން ހަމަލާއަކީ ހަރުކަށި ފިކުރުގެ ބަޔަކު އެމަނިކުފާނުގެ ލޭ ހުއްދަކޮށް ދިން ހަމަލާއެއް ކަމަށެވެ. އެ ހަމަލާގެ ކުރިން ވެސް އެމަނިކުފާނު އަވަހާރަކޮށްލަން ދެ ފަހަރަކު މަސައްކަތްކުރި ކަމަށްވެއެވެ. އެގޮތުން، އެ މަނިކުފާނު އަވަހާރަކޮށްލުމުގެ ތައްޔާރީތައް 2019 ވަނަ އަހަރު ފެށި ކަމަށް ފުލުހުން ވަނީ ބުނެފައެވެ.
ރައީސް ނަޝީދަށް ދިން ހަމަލާއާ ގުޅިގެން އެމަނިކުފާނުގެ ހަށިކޮޅުގައި ގާތްގަނޑަކަށް 16 ގަޑިއިރުގެ ސާޖަރީތަކެއް ހަދައި ބޮމުގެ ތެރެއަށް އަޅާފައި ފުއްތަކުން 10 ފުއް އެމަނިކުފާނުގެ ހަށިކޮޅުން ނެގިއެވެ. އަދި ބޮން ހަރުކޮށްފައި ހުރި ސައިކަލުގެ ޕްލާސްޓިކު އެތިކޮޅެއް ވެސް ހަށިގަނޑުން ވަނީ ނަގާފައެވެ.
ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދަށް އަމާޒުކޮށް ނިރުބަވެރި ހަމަލާ ދީފައިވަނީ 2021 މެއި 6ވަނަ ދުވަހުގެރޭ އެމަނިކުފާނު އޭރު ދިރުއުޅުއްވި ކެނެރީގެ ހުންނަ ގޯޅި ކަންމަތީގައި މަޖީދީމަގުގައެވެ. ހަށިކޮޅަށް ލިބުނު އަނިޔާތަކަށް އޭޑީކޭއިން ފަރުވާ ހޯއްދެވުމަށްފަހު ޖަރުމަންވިލާތުންނާއި، އިނގިރޭސިވިލާތުން ފަރުވާ ހޯއްދެވުމަށްފަހު މާލެ ވަޑައިގެންނެވީ 2021 އޮކްޓޯބަރު 11 ވަނަ ދުވަހުއެވެ.
