ބްލޫހަބް ޕްރިންޓް ފުޓްސަލް ފިއެސްޓާގައި ސްޕާޓަންސް ކުޅުނު ތިންވަނަ މެޗުވެސް ކާމިޔާބުކޮށްފިއެވެ. އެޓީމް ތިންވަނަ މެޗު ކާމިޔާބުކުރީ ބޭބީ ނިއު ޖެނެރޭޝަންއާ ވާދަކޮށް 4-0 ނެވެ. މެޗުގައި ސްޕާޓަންސްގެ ލަނޑުތައް ޖެހީބަދީއު މުޙައްމަދާއި, ރިލްވާން ނައީމްއެވެ. ކޮންމެ ކުޅުންތެރިއަކު ދެ ލަނޑު ޖެހިއެވެ. މެޗުގެ މޮޅު ކުޅުންތެރިއަކީ ރިލްވާން ނައީމްއެވެ. މިމޮޅާއެކު ސްޕާޓަންސް އޮތީ ތިން މެޗުންވެސް މޮޅުވެ, 9 ޕޮއުންޓާއެކު ގްރޫޕް ބީގެ އެއްވަނައިގައެވެ.

ގްރޫޕް އޭގެ އެއްވަނައިގައި އޮތް އެފްސީ ޔުނައިޓެޑާއި, ދެވަނައިގައި އޮތް ޕެންތާރސް ސްޕޯރޓްސް ކްލަބްވެސް އޮތީ ހަތް ޕޮއިންޓްގައެވެ. އެފްސީ ޔުނައިޓެޑް ތިންވަނަ މެޗުގައި ނޮދާރންސްއާ ވާދަކޮށް ކާމިޔާބުކުރީ 6-3 ނެވެ. މެޗުގައި އެފްސީ ޔުނައިޓެޑްގެ އަލީ ހާފިޒު ދެ ލަނޑު ޖެހިއެވެ. އެޓީމަށް ދެން ލަނޑު ޖަހައިދިނީ އަހުމަދު އަތީފް, އިބްރާހީމް މުބީން އަހުމަދު ރަޝީދު, ޝަމްއޫނު އިލްޔާސް އަދި ހަސަން ރިޒާންއެވެ. ނޮދާރންސްގެ ތިން ލަނޑުގެ ތެރެއިން ދެ ލަނޑު ޖެހީ މޫސާ ނާޖިހުއެވެ. އަނެއް ލަނޑަކީ ބައިގޯލެކެވެ.

ޕެންތާރސް އެފްސީ ތިންވަނަ މެޗުގައި އެފްސީ ވަން ރައުންޑާ ވާދަކޮށް 5-4 ން ވަނީ ކުރި ހޯދާފައެވެ. މެޗުގައި ޕެންތާރސްގެ މުޙައްމަދު އިސާމް ތިން ލަނޑު ޖެހިއެވެ. އެޓީމްގެ އަނެއް ދެ ލަނޑު ޖެހީ ހަސަން ތަސްލީމްއާއި, މުޙައްމަދު ޖުމާން އަހުމަދެވެ. އެފްސީ ވަން ރައުންޑްގެ އަބުދުالله ރިމާހުވެސް މެޗުގައި ތިން ލަނޑު ޖަހާ ހެޓްރިކް ހެދިއެވެ. ދެން އެޓީމަށް ލަނޑު ޖަހައިދިނީ މުޙައްމަދު މައިލާން އިބްރާހީމްއެވެ.

މުބާރާތުގައި ޓީމް ވާލު ވަނީ 2-1 ން ހަސް އެފްސީ ބަލިކޮށްފައެވެ. މިދެޓީމްވެސް އޮތީ 6 ޕޮއިންޓާއެކުއެވެ. ރ.މަޑުއްވަރީގައި ކުރިއަށްދާ މިމުބާރާތަކީ ޗެމްޕިއަން ޓީމަށް 30,000 ރުފިޔާ ކަނޑައެޅިފައިވާ މުބާރާތެކެވެ.