ދިރާގު ދިވެހި ޕްރިމިއަރ ލީގު ތާވަލްގެ ހަތަރުވަނައަށް ޓީސީ ޖެހިލައިފިއެވެ. ޓީސީ ހަތަރަކަށް ޖެހިލީ ލީގުގައި ހުކުރު ދުވަހުގެރޭ ދަ ގްރާންޑޭ 3-0ން ބަލިކޮށްގެންނެވެ.
މިމޮޅާއެކު ޓީސީ ހަތަރު ވަނާގައި އޮތީ 11 މެޗުން 14 ޕޮއިންޓް ހޯދައިގެންނެވެ. ސުޕަރ ޔުނައިޓެޑް ސްޕޯރޓްސް (ސަސް)އާއި, ޔުނައިޓެޑް ވިކްޓްރީވެސް އޮތީ 14 ޕޮއިންޓާއެކުއެވެ. ތިން ޓީމްގެ މެދުގައި ގޯލްގެ ތަފާތެވެ. ކްލަބް ވެލެންސިޔާ އޮތީ 13 ޕޮއިންޓާއެކުއެވެ. ޓީސީ އަތުން ބަލިވި ދަ ގްރާންޑޭ އޮތީ ޕޮއިންޓަކާއެކު ފުލުގައެވެ.
ދަ ގްރާންޑޭ ކޮޅަށް ޓީސީގެ ފުރަތަމަ ލަނޑު, ފުރަތަމަ ހާފްގައި ޖެހީ ހައިސަމް ރަޝީދެވެ. ދެވަނަ ލަނޑު 80 ވަނަ މިނިޓްގައި ޖެހީ މުސްލިހު މުހައްމަދެވެ. ފަހު ލަނޑު ނިޝާމް މުހައްމަދު ރަޝީދު ޖެހީ 86 ވަނަ މިނިޓްގައެވެ.
ލީގުގެ ކުޅުން ދެން އޮންނާނީ އަންގާރަ ދުވަހުއެވެ.
