އިންޑިއާގެ ބޮޑުވަޒީރު ޑެންމާރކުގައި، ނޯރވޭގެ އިސްވެރިންނާ ބައްދަލުކުރައްވައިފި
4 މެއި 2022 | ބުދަ 11:04ބޮޑުވަޒީރު މޯދީ ހުންނެވީ އިންޑިއާ-ނޯޑިކް ސަމިޓްގައި ބައިވެރިވެވަޑައިގެންނެވުމަށް ޑެންމާކުގައި
އިންޑިއާގެ ބޮޑުވަޒީރު ނޯރވޭގެ ބޮޑުވަޒީރާ ބައްދަލުކުރައްވަނީ
އިންޑިއާގެ ބޮޑުވަޒީރު ނަރެންދްރަ މޯދީ ޑެންމާރކުގައި ނޯރވޭގެ އިސްވެރިންނާ ބައްދަލުކުރައްވައިފިއެވެ.
މޯދީއާއި ނޯރވޭގެ ބޮޑުވަޒީރު ޖޯނަސްގެ ބައްދަލުކުރެއްވުމުގައި، އިންޑިއާއާއި ނޯރވޭގެ ގުޅުން އިތުރަށް ބަދަހި ކުރުމަށް ކުރެވެން ހުރި ކަންކަމާ ގުޅޭގޮތުން ވަނީ މަޝްވަރާ ކުރައްވާފައެވެ.
ނޯވޭގެ ބޮޑުވަޒީރާއެކު ކުރެވުނު މަޝްވަރާތަކުގައި، ތަރައްގީގެ ރޮނގުން ދެގައުމުގެ ގުޅުން އިތުރަށް ބަދަހިކުރެއްވުމާ ބެހޭގޮތުން ވެސް މަޝްވަރާ ކުރެއްވިއެވެ.
އެ ބައްދަލު ކުރެއްވުމަށްފަހު ސްވިޑްންއާއި އައިސްލޭންޑް އަދި ފިންލެންޑްގެ ބޮޑުވަޒީރުންނާ ވެސް މޯދީ ބައްދަލުކުރައްވާނެއެވެ.
މޯދީ ޑެންމާރކަށް ވަޑައިގެންނެވީ އެ ގައުމުގައި ބާއްވާ އިންޑިއާ-ނޯޑިކް ސަމިޓްގައި ބައިވެރިވެވަޑައިގެންނެވުމަށެވެ. މި ދަތުރުފުޅުގައި ޖަރުމަނާއި ޑެންމާރކުގެ ވިޔަފާރިވެރިންނާ ވެސް މަޝްވަރާތައް ކުރައްވާނެއެވެ.
މިއީ މި ސަމިޓް ބާއްވާ ދެވަނަ ފަހަރެވެ. 2018ވަނަ އަހަރު ބޭއްވި ސަމިޓުގައި ވެސް އިންޑިއާގެ އިސްވެރިން ވަނީ އެހެން ބައެއް ގައުމުތަކުގެ އިސްވެރިންނާ ބައްދަލުކުރައްވައި ޚާރިޖީ ގުޅުން ބަދަހިކުރުމާ ގުޅޭ މަޝްވަރާތައް ކުރައްވާފައެވެ.
މިއަހަރުގެ ސަމިޓުގައި އިސްކަން ދޭނީ ކޮވިޑް-19ގެ ސަބަބުން ގައުމުތަކަށް އިގްތިސާދީ ގޮތުން ދިމާވެފައިވާ ކަންކަމުން އަރައިގަތުމާ ގުޅޭގޮތުން މަޝްވަރާ ކުރުމަށެވެ. އަދި އާ އީޖާދުތަކާއި ޓެކްނޮލޮޖީއާއި އިއާދަ ކުރަނިވި ހަކަތައާއި ދުނިޔޭގެ ރައްކާތެރިކަމާ ގުޅޭގޮތުން ވެސް މި ސަމިޓުގައި މަޝްވަރާތައް ކުރާނެއެވެ.
ސަމިޓަށްފަހު މޯދީ ވަޑައިގަންނަވާނީ ޕެރިހަށެވެ. އެއީ އެ ގައުމުގައި އަލަށް އިންތިޚާބުވި ރައީސް އިމެނުއެލް މެކްރޫންއާ ބައްދަލު ކުރެއްވުމަށެވެ.
