މިފްކޯއަށް އަލަށް ގެނައި 2500 މެޓްރިކް ޓަނުގެ ރީފާރ ވެސަލް "ޖަޒީރާ ރީފާރ" އިން މަސް އެކްސްޕޯޓުކުރުމުގެ ފުރަތަމަ ދަތުރު 26 އެޕްރިލް 2022 ގައި ފަށައިފިއެވެ.

އީޔޫ އަދި އައިއޯޓީސީގެ ބައިނަލްއަގުވާމީ މިންގަނޑުތަކަށް ފެތޭ މި ބޯޓު ދަތުރު ކުރަނީ ތައިލެންޑަށެވެ. މިފްކޯގެ އަމިއްލަ ބޯޓެއްގައި މަސް އެކްސްޕޯޓު ކުރެވެން އަލުން ފެށި ފެށުމަކީ ދިވެހިރާއްޖޭގެ މަސްވެރިކަމުގެ ސިނާއަތަށް ލިބުނު ވަރަށް ބޮޑު ކުރިއެރުމެއް ކަމަށް އެ ކުންފުނިން ބުނެއެވެ. އެގޮތުން މި ބޯޓަކީ މަސް ގަތުމުގެ އޮޕަރޭޝަން ތަރައްގީ ކުރުމަށް ކުރެވިފައިވާ އިންވެސްޓްމަންޓެއް ކަމަށް ވެސް ވަނީ ބުނެފައެވެ.

އަބަދުވެސް މިފްކޯގެ އެންމެ ބޮޑު އަމާޒަކީ މަސް ގަނެވޭ މިންވަރު އިތުރުކޮށް އެ މަހަށް ދުނިޔޭގެ ބާޒާރުން ލިބޭ އެންމެ ރަނގަޅު އަގު ހޯދައިދީ އޭގެ މަންފާ ދިވެހި މަސްވެރިންނަށް ފޯރުކޮށްދިނުން ކަމަށާއި އެގޮތުން މި އަހަރުގެ މިހާތަނަށް 24،500 ޓަނުގެ މަސް ގަނެވިފައިވާއިރު މަސް އެކްޕޯޓުކުރަން ބޭރުން ޗާޓާރ ކޮށްގެން 7 ރީފާރ ވެސެލް ގެނެވިފައިވާ ކަމަށް މިފްކޯ އިން ބުނެއެވެ. ނަމަވެސް "ޖަޒީރާ ރީފަރ" ގެ ދަތުރާއެކު މިފްކޯއިން މަސް އެކްސްޕޯޓް ކުރުމަށް ކުރާ މަސައްކަތްތައް އަވަސް ކުރެވި ޚަރަދު ކުޑަކުރެވިގެން ދާނެއެވެ. މިފްކޯ ފްލީޓުގައި މި ބޯޓު ބޭނުން ކުރެވެނީ މަސް އެކްސްޕޯޓު ކުރުމަށާއި ސްޓޯރޭޖް އެއްގެ ގޮތުގައެވެ.

މިފްކޯއިން އަބަދުވެސް މަސައްކަތް ކުރަމުން ދަނީ މަސްވެރިކަމުގެ ސިނާއަތު ތަރައްގީ ކުރުމަށާއި މަސްވެރިންނަށް ދެވޭ ޚިދުމަތްތައް ފުޅާކޮށް އިތުރަށް ފަސޭހަ ކޮށްދިނުމަށްކަން ފާހަގަކޮށް މިފްކޯ އިން ބުނީ އިތުރު މާކެޓްތަކަށް މަސް އެކްސްޕޯޓު ކުރަމުންދާ ކަމަށެވެ.

ދެކުނުގެ މަސްވެރިކަން މީގެ ދެ މަހެއްހާ ދުވަސް ކުރިން ރަނގަޅުވި ގޮތަށް މަސްވެރިކަން އަދިވެސް އެއްވަރެއްގައި ދަނީ ހިފެހެއްޓެމުންނެވެ. މަސްވެރިކަން އާދަޔާ ހިލާފަށް ރަނގަޅު ވެފައިވާ މި ދަނޑިވަޅުގައި މަސް ގަނޑުކުރާ ފެސިލިޓީ ތަރައްގީ ކުރުމުގެ މަޝްރޫއެއް ސަރުކާރުން ކުރިއަށް ގެންދާ ކަމަށް ވެެސް ބުންޏެވެ.

އަދި މިފްކޯގެ ސްޓޯރޭޖް ފެސިލިޓީތައް ތަރައްގީ ކުރުމަށް އިތުރު 9500 ޓަނުގެ ސްޓޯރޭޖް އެޅުމާއި ފެލިވަރު ކޭނަރީ އަޕްގްރޭޑް ކުރުމުގެ އިތުރުން މިފްކޯގެ މަސައްކަތްތައް ހަރުދަނާކޮށް ފެސިލިޓީތައް ގާއިމުކޮށްދިނުމަށްޓަކައި ސަރުކާރުން އެއްބާރުލުންދޭ ކަމަށް ވަނީ ފާހަގަކޮށްފައެވެ.