ރައީސް ނުރަސްމީ ދަތުރުފުޅެއްގައި އެމަނިކުފާނުގެ އުފަން ރަށަށް ވަޑައިގެންފި
ރައީސުލްޖުމްހޫރިއްޔާ ހިންވަރަށް ކުރައްވާ ނުރަސްމީ ދަތުރުފުޅު ނިންވާލައްވުމަށްފަހު މާލެ ވަޑައިގަތުމަށް ހަމަޖެހިފައިވަނީ ހޮނިހިރު ދުވަހު
ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ފެބުރުއަރީ މަހު ޅ އަތޮޅަށް ކުރެއްވި ދަތުރުފުޅުގެ ތެރެއިން
ރައީސުމްހޫރިއްޔާ އިބްރާހިމް މުހައްމަދު ޞާލިހު ނުރަސްމީ ދަތުރުފުޅެއްގައި އެމަނިކުފާނުގެ އުފަންރަށް ހިންނަވަރަށް ވަޑައިގެންފިއެވެ.
ރައީސުލްޖުމްހޫރިއްޔާގެ މިދަތުރުފުޅަކީ ނުރަސްމީ ދަތުރުފުޅަކަށްވާތީ ދަތުރުގެ މާބޮޑު ތަފްސީލެއް ރައީސް އޮފީހުން ހާމަނުކުރެއެވެ. ރައީސްކަމުގެ މަގާމާއި ހަވާލުވެ ވަޑައިގެންނެވުމަށްފަހު ރަސްމީ ދަތުރުފުޅެއްގައި އަމިއްލަފުޅު ރަށަށް ފުރަތަމަ ވަޑައިގެންނެވީ މިއަހަރުގެ ފެބްރުއަރީ މަހުގައެވެ. އެހެންނަމަވެސް 2019 ވަނަ އަހަރު މަޖިލިސް އިންތިޚާބުގެ ކެމްޕެއިންގައި ނުރަސްމީ ދަތުރުފުޅެއްގައި ރައީސް ހިންނަވަރަށް ވަޑައިގެންފައިވެއެވެ.
އެމަނިކުފާނު އެންމެ ފަހުން ހިންނަވަރަށް ވަޑައިގެންނެވި ދަތުރުފުޅުގައި އެރަށުގެ ތަރައްގީއަށް ގިނަ މަޝްރޫއުތަކެއް ކުރިއަށް ގެންދިޔުމަށް ރޭވިފައިވާކަމަށް ވިދާޅުވިއެވެ.
ހިންނަވަރުގެ އިންޖީނުގޭގެ އައު ޢިމާރާތާއި ނެޓްވާރކް އަޕްގްރޭޑްކުރުމާއި ފުޓްބޯޅަ ދަނޑުގެ މަޝްރޫއު މިހާރު ވަނީ ނިމިފައެވެ. މީގެ އިތުރުން ރަށުގެ ބަނދަރު އަޕްގްރޭޑްކުރުމާއި ރައްކާތެރިގޮތުގައި ކުނި މެނޭޖްކުރާނެ ނިޒާމާއި، މަގުތަކުގައި ތާރު އަޅައިގެން ޒަމާނީ ފެންވަރަށް ތަރައްޤީކުރުމާއި 30 އެނދުގެ ހޮސްޕިޓަލް ތަރައްޤީކުރުމުގެ މަޝްރޫއު ފެށުމަށް ވާން ޖެހޭ ތައްޔާރީތައް އަންނަނީ ވަމުންނެވެ.
ރައީސުލްޖުމްހޫރިއްޔާ ހިންވަރަށް ކުރައްވާ ނުރަސްމީ ދަތުރުފުޅު ނިންވާލައްވުމަށްފަހު މާލެ ވަޑައިގަތުމަށް ހަމަޖެހިފައިވަނީ ހޮނިހިރު ދުވަހުއެވެ.
