ލައިލަތުލް ޤަދްރި ވިލޭރޭގެ މާތްކަން ލިބިގަންނަން މަސައްކަތްކުރޭ: ޚުތުބާ

އެބައެއްގެ ހާލަތާއި ސިއްހަތު ތަންދިން އެންމެ މަތީ މިންވަރަކަށް ރަމަޟާން މަހުގެ ފަހު ދިހައިގެ ރޭތަށް އަޅުކަމުގައި ހޭދަކުރެވޭތޯ ގަދައަޅައި މަސައްކަތްކުރުމަސް ހުކުރު ޚުތުބާގައި ނަސޭހަތްތެރިވެއްޖެއެވެ.

"ރަމަޟާން މަހުގެ ފަހުދިހައިގެ މާތްކަން" މި މައުޟޫއަށް ރާއްޖޭގެ އެކި ކަންކޮޅުތަކުގައި އިއްވި ޚުތުބާގައި ބުނީ މުސްލިމުން ވޭތުކުރަމުންމިދާ ރަހުމަތާއި ބަރަކާތުން ފުރިގެންވާ ރަމަޟާން މަހުގެ ކޮންމެ ރެއެއްގައިވެސް އެކަލާނގެ އަޅުތަކުންގެ ތެރެއިން ގިނަ ބަޔަކު ނަރަކައިން މިންޖުކުރައްވާނެ ކަމުގައި ރިވާވެގެންވާ ކަމަށެވެ.

Advertisement

ކީރިތި ރަސޫލާ މުހައްމަދު ﷺ މުޅި އަހަރުގެ އެހެން ވަގުތުތަކުގައި، އަޅުކަމުގައި މަޝްއޫލުވެވަޑައިނުގަންނަވާ މިންވަރަށް، ފަހު ދިހައިގެ ރޭތަކުގައި އަޅުކަމާއިގެން މަޝްއޫލުވެވަޑައިގަންނަވައެވެ. އެހެންކަމުން މި ރޭތަކުގެ ބަރަކާތާއި ދަރުމަ ލިބިގަތުމަށް މަސައްކަތްކުރުމަށް ޚުތުބާގައި ނަސޭހަތްތެރިވެފައިވެއެވެ.

މާތްﷲގެ އޯގާވަންތަކަމުން މުސްލިމުންނަށްޓަކައި ރަމަޟާން މަހުގެ ފަހުދިހައިގެ ރޭތަކުގައި ބަރަކާތުން ފުރިގެންވާ ރެއެއް ލައްވާފައިވާކަމަށާއި، އެއީ ލައިލަތުލް ޤަދްރި ވިލޭރޭ ކަމަށް ޚުތުބާގައި ބުނެފައިވެއެވެ. އެރެއެއްގެ މަތިވެރިކަން އެއްހާސް މައްސަރަށްވުރެ މާތްކުރައްވާފައިވާކަމަށާއި، އެއީ 83 އަހަރު ކަމަށް ޚުތުބާގައި ބުނެފައިވެއެވެ. އަދި އެރޭ އަޅުކަމުގައި ދެމިތިބި ކޮންމެ ބަޔަކަށް ފާފަފުއްސެވުމަށް އެދި މަލާއިކަތުން ދުއާކުރައްވާނެ ކަމަށް މާތް ﷲ ވަހީކުރައްވާފައިވެއެވެ.

މުޅި ކާއިނާތުގެ އެންމެހާ ކަމެއް ﷲ ތައާލާ ވަނީ ލިޔުއްވާފައެވެ. އެހެންނަމަވެސް ކުރިއަށް އޮތް އަހަރުގައި ހިނގާނެ އެންމެހައި ކަމެއް ލައިލަތުލް ޤަދްރި ވިލޭރޭ ކަނޑައަޅުއްވާ ކަމަށް ޚުތުބާގައި ބުނެފައިވެއެވެ. ޚުތުބާގައި ބުނީ އެރެއަކީ މީސްތަކުންގެ ރިޒްގާއި، އުފަންވުމާއި، ދިރިހުރުމާއި މަރުވުންފަދަ އެންމެހާ ކަންކަން ބަޔާންކުރެވޭނެ ރޭ ކަމަށެވެ.

ލައިލަތުލް ޤަދްރި ވިލޭރޭ ހުރިހާ ނިޔާއެއް ކަނޑައަޅުއްވާއިރު، އެރޭ މާތް ﷲ ރުއްސަވާވޮޑިގެންވާ ހެޔޮ އަމަލެއްގައިވުމަށް ޚުތުބާގައި ނަސޭހަތްތެރިވެފައިވެއެވެ. އެރޭ ﷲ އަސް މުނާޖާ ދަންނަވައި ދުނިޔެއާއި އާޚިރަތުގައި ހެވަށް އެދި ދުއާ ކުރުމުގައި ތިބޭ މީހުންގެ ތެރެއިން ވުމަށް ޚުތުބާގައި ގޮވާލާފައިވެއެވެ.

އެންމެ އެދެވިގެންވާ ގޮތަށް ރަމަޟާން މަހުގެ ދުވަސްތައް ހޭދަނުކުރެވުނަސް ލައިލަތުލް ޤަދްރި ވިލޭރޭ ލިބިގެންފި މީހަކަށް އެލިބުނީ އެމީހެއްގެ ހަޔާތުގައި ލިބޭނެ އެންމެ މަތިވެރި ހެޔޮކަމާއި ނަސީބު ކަމަށް ޚުތުބާގައި ބުނެފައިވެއެވެ. އެރޭ މާތް ﷲގެ ހަޒްރަތުން ސަވާބާއި ދަރުމައަށް އެދިގެން އަޅުކަން ކޮށްފި މީހާއަށް އޭނާގެ އިސްވެދިޔަ ހުރިހާ ފާފައެއް ފުއްސަވާނެ ކަމުގެ އުފާވެރި ޚަބަރު ކީރިތި ރަސޫލާ ދެއްވާފައިވާކަމަށް ޚުތުބާގައި ބުނެފައިވެއެވެ.