މަޖިލީހަށް ހުށައެޅޭ މައްސަލަތަކުގައި ފުޅާ ދާއިރާއެއްގައި ބަހުސްކުރުމުގެ ޖާގަ ދެވޭނެ ގޮތަށް މަސައްކަތްކުރަން - ރައީސް ނަޝީދު

މަޖިލީހަށް ހުށައެޅޭ މައްސަލަތަކުގައި ފުޅާ ދާއިރާއެއްގައި ބަހުސްކުރުމުގެ ޖާގަ ދެވޭނެ ގޮތަށް މަޖިލީހުން މަސައްކަތް ކުރާ ކަމުގައި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

ރައީސް ނަޝީދު މިހެން ވިދާޅުވީ، މަޑުއްވަރީ ދާއިރާގެ މެމްބަރު އާދަމް ޝަރީފް ހުށައެޅުއްވި ކުއްލި މައްސަލައަށް ވޯޓަށް އެހުމުގެ ކުރިން ރިޔާސަތުން ދަންނަވާ ދެންނެވުމެއްގެ ގޮތުގައެވެ.

ރައީސް ނަޝީދު ވިދާޅުވީ، މަޖިލީހަށް ހުށައަޅާ ބިލްތަކާއި މައްސަލަތައް އަދި އެހެނިހެން ކަންކަން ކުރިއަށްދަނީ މަޖިލީހުގެ ގަވާއިދާއި، ރާއްޖޭގެ ޤާނޫނު އަސާސީ ތަންދޭ އެންމެ ފުޅާ މިނަށް ކަމަށެވެ. ރައީސް ނަޝީދު ވިދާޅުވީ، މަޖިލީހަށް ހުށައެޅޭ މައްސަލަތަކުގައި މަސައްކަތްކުރައްވަނީ، ޚާއްސަކޮށް ޑިމޮކްރެޓިކް ހަމަތައް ނެގެހެއްޓުމަށާއި، ޚިޔާލު ތަފާތުވުމުގެ ފުރުސަތާއި ބަހުސް ކުރުމުގެ ޖާގަ އެންމެ ފުޅާ މިނުގައި ދިނުމުގެ އުންމީދުގައި ކަމަށެވެ.

ބަހުސް ހުއްޓުވުން އެއީ އެބޭފުޅަކު ތާއީދު ކުރައްވާ ގޮތަށް އެންމެ ފައިދާ ހުރި ގޮތް ކަމުގައި ބައެއް މެމްބަރުން ދެކެވަޑައިގަންނަވާ ކަމަށާއި، އަނެއް އުސޫލަކީ ބަހުސް ކުރުމަކީ ކަންކަން ހުރި ގޮތް ރައްޔިތުންނަށް އޮޅުން ފިލުން ކަމުގައި ބައެއް މެމްބަރުން ދެކިވަޑައިގަންނަވާ ކަމަށްވެސް ރައީސް ނަޝީދު ވިދާޅުވިއެވެ.

މަޑުއްވަރީ ދާއިރާގެ މެމްބަރު އާދަމް ޝަރީފް ހުށައެޅުއްވި މައްސަލައިގައި ބުނެފައިވަނީ، ހިޔާ ފްލެޓްގައި ފިނިޝިން މަސައްކަތާއި ހަވާލުވި ބައެއް ކުންފުނިތަކުން އެ މަސައްކަތް ނުނިންމާ އޮޅުވާލައި މަކަރު ހަދާ، ފައިސާއަށް ޚިޔާނާތްތެރިވެފައިވާ މައްސަލަ ސަރުކާރުގެ ސަމާލުކަމަށް ގެނައުމަށް ގޮވާލާ ކަމަށެވެ. މިކަމުން ފްލެޓް ލިބުނު މީހުންނަށް ބޮޑެތި ގެއްލުން ލިބިފައިވާކަމަށް މައްސަލައިގައި ބުނެފައިވެއެވެ.

މި މައްސަލައަށް މަޖިލީހުގައި ބަހުސް ކުރުމަށް ފާހެއް ނުވިއެވެ. ބަހުސް ކުރަން ނުފެންނަ ކަމަށް 29 މެމްބަރުން ވޯޓު ދެއްވިއިރު ފެންނަ ކަމަށް ވޯޓު ދެއްވީ، 6 މެމްބަރުންނެވެ.