ޗެކް ބޭނުންކުރާ މިންވަރު މަދުކުރުމަށް އެމްއެމްއޭ އިން ފިޔަވަޅުތަކެއް އަޅަނީ
ޗެކު ބޭނުން ކޮށްގެން މުޢާމަލާތް ކުރެވޭނެ އެންމެ މަތީ ޢަދަދަކީ ދިވެހި ރުފިޔާ އިން ނަމަ 50،000 ރުފިޔާ
މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ މައި މަރުކަޒު
ރާއްޖޭގައި ޗެކް ބޭނުންކުރާ މިންވަރު މަދުކުރުމަށް އެމްއެމްއޭއިން ކަނޑައަޅާފައިވާ އެކްޝަން ޕްލޭން ތަންފީޒު ކުރުމުގެ އަމަލީ މަސައްކަތް، ބޭންކުތަކާއި ގުޅިގެން މި އަހަރުގެ ޖޫން މަހު ފެށުމަށް އެމްއެމްއޭއިން ނިންމައިފިއެވެ.
އެމްއެމްއޭ އިން ބޭއްވި ނޫސްވެރިންގެ ބައްދަލުވުމުގައި ބުނީ މި އެކްޝަން ޕްލޭންގެ ދަށުން އެކި މަރުހަލާތަކަށް ބަހާލައިގެން ފިޔަވަޅުތައް އެޅުމަށްވަނީ ނިންމާފައެވެ. އެ ފިޔަވަޅުތަކުގެ ތެރޭގައި 2023 ވަނަ އަހަރުގެ ދެވަނަ ކުއާޓަރ އިން ފެށިގެން ދިވެހިރާއްޖޭގައި ޗެކު ބޭނުން ކޮށްގެން މުޢާމަލާތް ކުރެވޭނެ އެންމެ މަތީ ޢަދަދަކީ ދިވެހި ރުފިޔާއިން ނަމަ 50،000، އަދި ޔޫއެސް ޑޮލަރުން ނަމަ 3،000 ކަމުގައި ކަނޑައެޅުމާއި، އެމްއެމްއޭ އިން މިހާރު ދެމުންދާ ޗެކް ކްލިއަރިންގެ ޚިދުމަތްދޭ ދުވަސްތައް، ދެ މަރުހަލާއަކަށް ބަހާލެވިގެން މަދުކުރުމަށް ވެސް ނިންމާފައިވާ ކަމަށެވެ.
2023 ވަނަ އަހަރުގެ 3 ވަނަ ކުއާޓަރ އިން ފެށިގެން އަލަށް ޤާއިމުކުރެވޭ އިންސްޓަންޓް ޕޭމަންޓް ސިސްޓަމް މެދުވެރިކޮށް މުއާމަލާތް ކުރުން އިތުރު ކުރުމަށްބާރުއަޅާ، ޕޭމަންޓް ހެދުމަށް ޗެކު ބޭނުންކުރާ މިންވަރު މަދުކޮށް ޑިޖިޓަލް ވަޞީލަތްތައް ބޭނުން ކުރުމަށް ބާރު އެޅުމުގެ ގޮތުން 2023 ވަނަ އަހަރުގެ ފަހު ކުއާޓަރ އިން ފެށިގެން ޗެކު ޕްރޮސެސްކުރުމަށް ފީއެއް ނެގުމަށް ނިންމާފައިވާ ކަމަށް ވެސް އެމްއެމްއޭ އިން މައުލޫމާތު ދެއެވެ،
އާންމު ގޮތެއްގައި އެންމެ ގިނައިން ޗެކުން މުއާމަލާތްތައް ކުރަނީ ސަރުކާރު ހިއްސާވާ ކުންފުނިތަކާއި އާންމު ވިޔަފާރިވެރިން ކަމަށް މި ނޫސްވެރިންގެ ބައްދަލުވުމުގައި އެމްއެމްއޭ އިން ވަނީ ފާހަގަކޮށްފައެވެ. މާލީ މުއާމަލާތްތައް ހިންގުމުގައި ޗެކްގެ ސަބަބުން ކުރިމަތިވާ މައްސަލަތައް ގިނަވުމުގެ ސަބަބުން ފަސޭހަ ގޮތަކަށް މާލީ މުއާމަލާތްތައް ހިންގޭނެ ގޮތްތައް ފަހިކުރުމަށް މިގޮތަށް ނިންމީ ކަމަށް ވެސް އެމްއެމްއޭ އިން ބުނެފައިވެއެވެ.
އެމްއެމްއޭ އިން މި އެކްޝަން ޕްލޭން އެކުލަވާލީ 2024 ވަނަ އަހަރުގެ ޖޫން މަހުގެ ނިޔަލަށް ރާއްޖޭގައި ޕޭމަންޓް މުޢާމަލާތްތައް ކުރުމަށް ޗެކު ބޭނުންކުރުން މަދުކުރުމުގެ ނިޔަތުގައެވެ.
