މުސްލިމް އެހެން ގައުމުތަކެކޭ އެއްފަދައިން ޕާކިސްތާންގައިވެސް ރަމަޟާން މަހަށް ތައްޔާރުވުމުގެ ގޮތުން މީހުން ކާބޯތަކެތީގެ ބާވަތްތައް ގަނެ ޖަމާކުރުމަކީ އާދައިގެ މަތިން ކޮށް އުޅޭ ކަމެކެވެ. ނަމަވެސް މިއަހަރު މިކަން ކުރުމަށް ގިނަ މީހުންނަށް ވަނީ ދަތިކަމަކަށް ވެފައެވެ. ސަބަބަކީ ތަކެތީގެ އަގު ބޮޑުކަމުންނެވެ. ގިނަ މީހުން ބުނި ގޮތުން ރަމަޟާން މަހުގެ ކުރިން އެމީހުން ގަންނަ ކަދުރާ ނަޓްގެ ބާވަތްތައް އަދި ހިކި މޭވާގެ ބާވަތްތަކުގެ އަގު މިއަހަރު ވަނީ ދެގުނަ ބޮޑުވެފައެވެ. ހޯލްސޭލް މާކެޓްތަކަށް ތަކެތި ގަތުމަށް މިއަހަރު ދިޔަ އެންމެންވެސް އެބުރި ދާން ޖެހުނީ ގަސްތު ކުރިވަރަށް ވުރެ މަދުން ތަކެތި ގަނެގެންނެވެ. ތަކެތީގެ އަގު ބޮޑުކަމުންނެވެ.

ޕާކިސްތާނަށް މިއަހަރު ރަމަޟާން މަސް މިއަންނަނީ ސިޔާސީ މަސްރަހަށް ވެސް ބަދަލެއް އަންނަން އުޅޭ ކަމުގެ ސިގްނަލްތަކާއެކުއެވެ. ބޮޑުވަޒީރު އިމްރާން ޚާންގެ ސަރުކާރަށް އޮތް އިތުބާރު ގެއްލި، އާންމު މުޒާހަރާތައް ދަނީ އިތުރުވަމުންނެވެ. ގިނަ އަދަދެއްގެ ބަޔަކު ބައިވެރިވާާ އިދިކޮޅު މުޒާހަރާތައް ދަނީ އިތުރުވެ ފުޅާވަމުންނެވެ.

އިމްރާން ޚާންގެ ސަރުކާރާމެދު އިތުބާރު އޮތްތޯ ބެލުމަށް ވޯޓެއް ނެގުމަށްވެސް ގާނޫނު ހަދާ މަޖިލީހަށް މިހާރު ހުށައަޅާފައިވާއިރު، މި ވޯޓުލުން އެޕްރިލް 3ވާ އާދީއްތަ ދުވަހު އޮންނާނެއެވެ. އެދުވަހަކީ ޕާކިސްތާނަށް މުލަރޯދަ ދުވަސް ވެސްމެއެވެ.

ޕާކިސްތާންގެ ގިނަބަޔަކު ބުނާ ގޮތުން ވެރިކަމުގައި ހުރީ ކާކުތޯ ބަލަން އާންމު ރައްޔިތުން ބޭނުމެއް ނުވާނެއެވެ. ރައްޔިތުން ބަލަން ބޭނުންވާނީ އަގުހެޔޮކޮން ތަކެތި ފޯރުކޮށްދެވޭ ވެރިއެއްކަމަށް އެމީހުން ބުނެއެވެ. އެގޮތުން މުދަލާއި ޚިދުމަތުގެ އަގު މިހާރު އަތް ނުފޯރާ ފަށަށް އަރަމުންދާތީ އެކަމުގެ ކަންބޮޑުވުން ވަރަށް ބޮޑަށް އެބަހުރި ކަމަށް އެމީހުން ބުނެފައިވެއެވެ. ޚާއްސަކޮށް ރަމަޟާން މަހާއި ދިމާކޮށް ކާބޯތަކެތި އަގުބޮޑުވުމަކީ އާންމުން ވަރަށް ކަންބޮޑުވާކަމެކެވެ.

ޕާކިސްތާންގެ އިގްތިސާދަށް މައްސަލަތައް ކުރިމަތިވެފައިވަނީ އިސްރާފު ބޮޑު ޕަވަރ ސެކްޓަރުގެ ސަބަބުންނާއި، ޓެކްސް ނިޒާމް ބަލިކަށިކަމުންނެވެ. މީގެ އިތުރުން ޕްރޮޑަކްޓިވިޓީ ނުވަތަ އުފެއްދުންތެރިކަން އިންތިހާއަށް ދަށަށް ގޮސްފައިވާއިރު އެކްސްޕޯޓް ކުރެވޭ ތަކެތިން ވެސް އެދެވޭ ނަފާ ލިބެމުން ނުދާތީ ކަމަށް ވެއެވެ.

އެހެން ރަމަޟާން މަސްތަކާއި ދިމާކޮށް ތަކެތި ގަންނަ މީހުންނާއި ގާތަށްވެސް މިރަމަޟާން މަހަށް ތަކެތި ގަންނަން މީހުން ނުނިކުންނަ ކަމުގައި ވެއެވެ.

ރަމަޟާން މަހު މުދާ އަގުބޮޑުވުން ހުއްޓުވުމަށް ޕާކިސްތާންގެ އިކޮނޮމިކް ކައުންސިލުން ވަނީ 8 ބިލިއަން ރުޕީސްގެ ރަމަޟާން ރިލީފް ޕެކޭޖެއް ފާސްވެސް ކޮށްފައެވެ. މި ޕެކޭޖްގެ ދަށުން 19 ބާވަތެއްގެ ޒަރޫރީ އައިޓަމްތައް އެކި ހިސާބުގައިވާ ހަހާސް ޔުޓިލިޓީ ސްޓޯރަކަށް ސަބްސިޑީ ރޭޓްތަކުގައި ލިބިދެވޭނެއެވެ.

ޕާކިސްތާންގެ 220 މިލިއަން އާބާދީގެ 90 އިންސައްތަޔަށް ވުރެމަތި އެއީ މުސްލިމުންނެވެ. ކޮންމެއަކަސް ޕާކިސްތާން ރައްޔިތުން ރަމަޟާން މަހަށް ތައްޔާރުވަމުންދާއިރު ބޮޑުވަޒީރު ގެންދަވަނީ ސަރުކާރު ސަލާމަތް ކުރެއްވޭތޯ ބައްލަވަމުންނެވެ.

އާދީއްތަ ދުވަހުގެ ވޯޓުގެ ނަތީޖާ ނުކުން ގޮތަކުން ޕާކިސްތާންގައި ވަރަށް ގިނަ ކަންތައްތަކެއް އަނެއްކާވެސް ބަދަލުވެގެން ދާނެއެވެ.