ރަމަޟާން މަހުގެ ރަހުމަތާއި، މަޣުފިރަތާއި، ނަރަކައިން ދިންނެވުން ލިބިގަތުމަށްޓަކައި ފުރިހަމަ ތައުބާއަކުން ތައުބާވުމަށް އަވަސްވެގަތުމަށް ހުކުރު ޚުތުބާގައި ގޮވާލައިފިއެވެ.
"ރަމަޟާންމަހަށް އިސްތިގުބާލުކުރުން" މި މައުޟޫއަށް ރާއްޖޭގެ އެކި ކަންކޮޅުތަކުގައި އިއްވި ޚުތުބާގައި ވަނީ ރަމަޟާންމަހުގެ މާތްކަމާއި މަތިވެރިކަމުގެ މައްޗަށް އަލިއަޅުވާލާފައެވެ. މިގޮތުން މި މަހަކީ އެހެން މަސްމަހަށްވުރެ މާތްކަން އިތުރުވެގެންވާ މަހެއް ކަމަށާއި، ރަމަޟާން މަސް މާތްކުރެވުނު ސަބަބުތަކުގެ ތެރޭގައި މި މައްސަރުގައި ރޯދައިގެ އަޅުކަން ލައްވާފައިވުމާއި، ކީރިތި ޤުރުއާން ބާވައިލެއްވުމާއި، އެއްހާސް މައްސަރަށްވުރެ ހެޔޮކަން ބޮޑުވެގެންވާ ލައިލަތުލް ޤަދުރި ވިލޭރޭ ލައްވާފައިވުން ހިމެނޭ ކަމަށް ޚުތުބާގައި ބުނެފައިވެއެވެ.
މި މައްސަރުގެ މާތްކަން ބަޔާންކުރައްވައި ކީރިތި ރަސޫލާ މުހައްމަދު ﷺ ދެއްވި އިރުޝާދުން ދޭހަވާ ގޮތުގައި ރަމަޟާން މަހަކީ ރަހުމަތާއި، ފާފަފުއްސެވުމާއި، ނަރަކައިން ދިންނެވުން އެކުލެވިގެންވާ ބަރަކާތްތެރި މައްސަރެއްކަމަށް ޚުތުބާގައި ބުނެފައިވެއެވެ. މިފަދަ މާތް ބަރަކާތްތެރި މައްސަރެއް މިންވަރު ކުރެއްވީތީ ﷲ ސުބުހާނަހޫ ވަތަޢާލާއަށް ޝުކުރުކޮށް އުފާކުރުން ހައްގުވާކަމަށް ޚުތުބާގައި ބުނެފައިވެއެވެ.
މި މަހުގެ ބޭނުން އެންމެ ހެޔޮ ގޮތުގައި ހިފައި، ހެޔޮ އަމަލުކުރުމުގައި އެކަކު އަނެކަކާ ވާދަކޮށް ކުރިއަރައިދާން މަސައްކަތްކުރަންޖެހޭކަމަށް ޚުތުބާގައި ބުނެފައިވެއެވެ. އަދި މި މާތް މަހުގެ ރަހުމަތާއި، މަޣުފިރަތާއި، ނަރަކައިން ދިންނެވުން ލިބިގަތުމަށްޓަކައި ފުރިހަމަ ތައުބާއަކުން ތައުބާވުމަށް އަވަސްވެގަންނަން ޖެހޭކަމަށް ނަސޭހަތްތެރިވެފައިވެއެވެ.
ތައުބާގެ ލަފުޒީ މާނައަކީ، އެނބުރި އައުން. އިމާމު ނަބަވީ ވިދާޅުވެފައިވަނީ ޝަރީޢަތުގައި ތައުބާވުމުގެ މާނައަކީ، ތިން ކަމެއް ކުރުމެވެ. އެއީ: ކުރެވުނު ކުށެއް ނުވަތަ ފާފައެއް ދޫކޮށްލުމާއި، އެކުށަކާމެދު ދެރަވެ ހިތާމަކުރުމާއި، ދުވަހަކު ވެސް އެފަދަ ފާފައެއް ނުކުރުމަށް ޢަޒުމުކަނޑައެޅުމެވެ. މިތިން ޝަރުތު ފުރިހަމަކުރުމާއެކު ތައުބާވެއްޖެނަމަ، އަޅާ އާއި ﷲ އާ ދެމެދުގައި ވާނަމަ ވާހައި ފާފައެއް އެކަލާނގެ އިރާދަފުޅާއި ރަޙްމަތްފުޅުން ފުއްސަވައި ދެއްވާނެތެވެ. ނަމަވެސް މީހެއްގެ ޙައްޤަކަށް އަރައިގެންފައިވާނަމަ، އެމީހާގެ ޙައްޤު އަދާކޮށްދެންޖެހޭނެއެވެ. އެއީ އެ ޙައްޤެއް ރައްދުކޮށްދީގެން ނުވަތަ އެމީހެއްގެ ކިބައިން މާފަށް އެދިގެން ނުވަތަ އެމީހަކަށްޓަކައި ހެޔޮ ދުޢާ ކޮށްދީގެންނެވެ.ހުކުރު ޚުތުބާ
މި މައްސަރުގައި ކުރަންޖެހޭ މުހިންމު އެއް ކަމަކީ މި އުއްމަތުގެ މައްޗަށް ފަރުޟު ކުރައްވާފައިވާ ރޯދަ ހިފުން ކަމުގައި ޚުތުބާގައި ބުނެފައިވެއެވެ. މިކަން ފަރުޟުކުރައްވާފައިވަނީ އިންސާނުންގެ ކިބައިގައި ތަގުވާގެ މާތް ސިފަ އަށަގެންނެވުމަށް ކަމަށާއި، ރޯދައިގެ އަޅުކަން ފުރިހަމައަށް އަދާކުރެވިއްޖެނަމަ މާތް ﷲ ގެ ހަޒުރަތުން ލިބޭނެ ސަވާބާއި ދަރުމައިގެ މަތިވެރިކަން ވަރަށް ބޮޑު ކަމަށް ޚުތުބާގައި ބުނެފައިވެއެވެ.
އަދި ކީރިތި ޤުރުއާން ކިޔެވުމުގައި ވީހާވެސް ގިނަ ވަގުތު ހޭދަކުރެވޭތޯ ބެލުމަށް ހުކުރު ޚުތުބާގައި ނަސޭހަތްތެރިވެފައިވެއެވެ. ކީރިތި ޤުރުއާނަކީ ހިދާޔަތެއް ކަމާއި، ޤުރުއާނުން ކިޔަވާ ކޮންމެ އަކުރަކަށް ސަވާބާއި ދަރުމަ 10 ގުނައަށް އިތުރުވާކަމަށް ޚުތުބާގައި ބުނެއެވެ. އަދި ރޯދަމަހުގެ ރޭތައް އަޅުކަމުގައި ހޭދަކުރުމަކީ ގަދަވެގެންވާ ސުންނަތެއް ކަމަށާއި، ތަރާވީހު ނަމާދު ޖަމާއަތުގައި އަދާކުރުމަށް މަސައްކަތްކުރުމަށް ޚުތުބާގައި ވަނީ ނަސެހަތްތެރިވެފައެވެ. ރޯދައަށްތިބެ ދުޢާކުރުން ގިނަކުރުމަށްވެސް ޚުތުބާގައި ވަނީ ނަސޭހަތްތެރިވެފައެވެ.
