ބޭނުން ރަށަކަށް ފިތުރު ޒަކާތް ދެއްކޭނެ ގޮތް ހަމަޖައްސައިފި
މިފަހަރު ވެސް އޮންލައިންކޮށް އުރީދޫ، ދިރާގު އަދި ފަހިޕޭ މެދުވެރިކޮށް ފިތުރު ޒަކާތް ދެއްކޭނެ
ޒަކާތް ދިނުން
އެމީހަކު ބޭނުން ރަށަކަށް އޮންލައިންކޮށް ފިތުރު ޒަކާތް ދެއްކޭނެ ގޮތް އިސްލާމިކް މިނިސްޓްރީން ހަމަޖައްސައިފިއެވެ.
ރާއްޖެޓީވީގެ ފަލަ ސުރުހީ ޕްރޮގްރާމުގައި އޮންލައިންކޮށް ބޭނުން ރަށަކަށް ފިތުރު ޒަކާތް ދެއްކޭނެ އިންތިޒާމް ހަމަޖެއްސުމާއި ގުޅޭ ގޮތުން ވާހަކަފުޅުދައްކަވަމުން، އިސްލާމިކް މިނިސްޓްރީގެ ޑެޕިއުޓީ މިނިސްޓަރު ޝާފިއު އަލީ ވިދާޅުވީ ރަމަޟާން މަސް ފެށިގެންދާ ހިސާބުން މިނިސްޓްރީން ފިތުރު ޒަކާތް ފައިސާއިން ބަލައިގަންނަން ފަށާނެ ކަމަށެވެ. އަދި އެސްއެމްއެސް މެދުވެރިކޮށް އުރީދޫ އަދި ދިރާގުގެ ކަސްޓަމަރުންނަށް ފިތުރު ޒަކާތް ދެއްކުމުގެ އިންތިޒާމް ހަމަޖެހިފައިވާ ކަމަށާއި، ބީއެމްއެލްގެ އޮންލައިން ޕޯޓަލް މެދުވެރިކޮށް އަދި އުރީދޫގެ އެމްފައިސާ އަދި ދިރާގު ޕޭ އަދި ފަހިޕޭ މެދުވެރިކޮށްވެސް ފިތުރު ދެއްކުމުގެ އިންތިޒާމް ހަމަޖެހިފައިވާ ކަމަށެވެ.
ޝާފިއު ވިދާޅުވީ މިފަހަރު ގެނެވުނު އެންމެ ބޮޑު އެއް ބަދަލަކީ އޮންލައިން ޕްލެޓްފޯމްތަކުން ފިތުރު ޒަކާތް ދައްކާކަމުގައި ވާނަމަ، ސެންޓްރަލް އެކައުންޓަކަށް އެފައިސާ ޖަމާވެގެން މާލޭގެ ފަގީރުންނަށް އެ ފައިސާ ބެހުން ނިމުމަކަށް ގެނެވި، އެކަމަށް ގެނެވުނު ބަދަލު ކަމަށެވެ. އެގޮތުން އޮންލައިންކޮށް ހިދުމަތް ފޯރުކޮށްދޭ ފަރާތްތަކުން ވަރަށް ބުރަ މަސައްކަތެއްކޮށް، މިފަހަރު ގެނެވުނު އެއް ބަދަލަކީ ޒަކާތުގެ ގޮތުގައި ދައްކާ ފައިސާ އެމީހަކު ފައިސާ ދައްކަން ބޭނުންވާ ރަށެއްގެ ޕޯޓަލް މެދުވެރިކޮށް ހިޔާރު ކުރެވޭނެ އިންތިޒާމު ކަމަށެވެ. އަދި އެފައިސާ ރަމަޟާން މަސް ނިމޭއިރު ކައުންސިލްތަކަށް ޖަމާކުރެވޭނެ ކަމަށް ޝާފިއު ވިދާޅުވިއެވެ.
އެހެން އަހަރުތަކޭ އެއްގޮތަށް މިއަހަރު ވެސް މުދަލުން ޒަކާތް ބަލައިގަންނާނެ ކަމަށާއި، ހާއްސަކޮށް ކާބޯތަކެތިން ފިތުރު ޒަކާތް ބަލައިގަންނާނެ އިންތިޒާމްތައް ހަމަޖައްސާފައިވާ ކަމަށް އޭނާ ވިދާޅުވިއެވެ. އަދި ފައިސާ ދެއްކުމާއި އޮންލައިންކޮށް ޒަކާތް ދެއްކުން ކުރިއަށްދާނެ ކަމަށާއި، މިނިސްޓްރީން ޔަގީންކުރަން ބޭނުންވަނީ ވީހާވެސް ގިނަ ގޮތްގޮތުން ރައްޔިތުންނަށް ފަސޭހަކަމާއެކު ފިތުރު ޒަކާތް ދެއްކުމުގެ ކަންކަން ހަމަޖައްސައި ދިނުން ކަމަށްވެސް ޝާފިއު ވިދާޅުވިއެވެ.
ޝާފިއު ވިދާޅުވީ ރަމަޟާން މަސް ނިމުމުގެ ދެތިން ދުވަސް ކުރިން އޮންލައިންކޮށް ފިތުރު ޒަކާތް ބަލައިގަތުމުގެ ކަންކަން ނިމޭނެ ކަމަށާއި، އެ ތާރީހު ވީހާވެސް ފަސްކުރެވޭތޯ މަސައްކަތް ކުރަމުންދާއިރު، އެ މައުލޫމާތު ހާމަކުރަމުން ދާނެ ކަމަށެވެ. އަދި މުދަލުން ފިތުރު ޒަކާތް ބަލައިގަތުން އެންމެ ފަހުވަގުތާއި ޖެހެންދެން މަސައްކަތް ކުރަމުންދާނެ ކަމަށެވެ.
ފަގީރުންގެ ދަފްތަރާއި ގުޅޭ ގޮތުން ޝާފިއު ވިދާޅުވީ މިފަހަރު ފަގީރުންގެ ދަފްތަރު އެކުލަވާލި އިރު 9041 މީހުން ދަފްތަރުގައި ތިބި ކަމަށެވެ. އަދި މިދިޔަ އަހަރު ތިބީ 7778 ފަގީރުން ކަމަށެވެ. އަތޮޅު ތެރޭގައި 7245 މީހުން މިއަހަރު ދަފްތަރު ކުރެވިފައިވާ އިރު، މިދިޔަ އަހަރު އަތޮޅު ތެރޭގައި ތިބީ 6258 މީހުން ކަމަށެވެ.
މި އަހަރު މާލޭގައި 1796 ފަގީރުން ތިބިއިރު، މިދިޔަ އަހަރު ތިބީ 1520 މީހުންނެވެ. މިއަހަރު ފަގީރުން ނެތް 42 ރަށް ހިމެނޭ އިރު މިދިޔަ އަހަރު އެއަދަދު ހުރީ 45 ގައި ކަމަށް ޝާފިއު ވިދާޅުވިއެވެ.
ފިތުރު ޒަކާތް ދެއްކުމުގެ ކަންކަމާއި ގުޅިގެން އިތުރަށް ވާހަކަފުޅުދައްކަވަމުން ޝާފިއު ވިދާޅުވީ ކުރިން އެކި ރަށްރަށުގައި ރޭޓް ތަފާތު ނަމަވެސް އޮންލައިން ޕްލެޓްފޯމަށް ގެނެވުނު ބަދަލާއެކު ފިކްސްޑް ރޭޓެއް މުޅި ރާއްޖެއަށް ކަނޑައަޅާފައިވާ ކަމަށެވެ. އެކި ކާބޯތަކެތީގެ އެކި ވައްތަރުތަކާއި، އެކި ކޮލިޓީއަށް ރޭޓްތަކެއް ކަނޑައެޅިފައިވާ ކަމަށް ޝާފިއު ވިދާޅުވިއެވެ.
