ކަލާސް އެވޯޑްސް އޮންނަ ދުވަސް މީގެފަހުން ދުޅަހެޔޮ ހަށިހެޔޮ ދުވަހަށް ޚާއްސަ ވެގެންދާނެ ކަމަށް އެޑިއުކޭޝަން މިނިސްޓަރު ޑރ. އައިޝަތު އަލީ ވިދާޅުވެއްޖެއެވެ.

ތައުލީމީ ދާއިރާގައި ދުޅަހެޔޮ ހަށިހެޔޮ ދުވަސް ފާހަގަކުރުމަށް އެޑިއުކޭޝަން މިނިސްޓްރީން ވަނީ ހުރިހާ ސްކޫލެއްގެ ދަރިވަރުންނަށް ދުވުމެއް ބާއްވާފައެވެ. މާލޭގައި ބޭއްވި އިވެންޓު ޝަރަފުވެރިކޮށްދެއްވީ ޔޫތު މިނިސްޓަރު އަހްމަދު މަހްލޫފެވެ.

ރާއްޖެޓީވީގެ ފަށާއިރު ޕްރޮގްރާމަށް ދެއްވި އިންޓަވިއުގައި އެޑިއެކޭޝަން މިނިސްޓަރު ވިދާޅުވީ ފަތިސް ނަމާދު ކޮށްގެން ރާއްޖޭގެ ހުރިހާ ސްކޫލެއްގެވެސް ކުދިން ދުވަން ދިޔަ ކަމަށާއި އެއަށްފަހު ސްޕޯޓްސް މީޓްސް ފެށިގެން ދިޔަ ކަމަށެވެ. އަދި ހުރިހާ ސްކޫލަކުން ވެސް މި ހަރަކާތުގައި ބައިވެރިވި ކަމަށެވެ. އަދި ކުރިއަތް އޮތް އަހަރުތަކުގައި ވެސް ކަލާސް އެވޯޑްސް އޮންނަ ދުވަހު، ދުޅަހެޔޮ ހަށިހެޔޮ ދުވަސް ފާހަގަކޮށް، ހަރަކާތްތައް ބާއްވާނެ ކަމަށް ވިދާޅުވިއެވެ.

މިފަދަ ޕްރޮގްރާމެއްގެ މަޤްސަދަކީ ހަށިހެޔޮ ކަންމަތީގައި ހުރިހާ ދަރިވަރުން ތިބުމަށް މަގުފަހި ކުރުމާއި ދުޅަހެޔޮ މުޖުތަމައުއެއް ބިނާ ކުރުން ކަމުގައިވެސް އެޑިއުކޭޝަން މިނިސްޓަރު ވިދާޅުވިއެވެ.   

ޔޫތު މިނިސްޓަރު މަހްލޫފް ވިދާޅުވީ މި ސަރުކާރު ފެށިގެން އައިރު މިއީ ވަރަށް ބާރަށް ފެށި މަސައްކަތެއް ކަމަށާއި ސްކޫލު ކުދިން މިކަމަށް އަހުލުވެރިކުރުވާ ބައިވެރިކުރުމަކީ ވަރަށް ރަނގަޅު ކަމެއް ކަމަށެވެ. އަދި މި ދުވުމުން ކުދިންނާއި ބެލެނިވެރިންނަށް ވަރަށް ރަނގަޅު މެސެޖެއް ލިބިގެންދިޔަ ކަމަށް ވެސް މަހުލޫފް ވިދާޅުވިއެވެ. މިނިސްޓްރީގެ ފަރާތުން ވެސް މި ޕްރޮގްރާމް ކުރިއަށް ގެންދިޔުމަށް ޚާއްސަ ޓީމެއް އެކުލަވާލާފައިވާ ކަމުގައިވެސް މަހުލޫފު ވިދާޅުވިއެވެ.

ކަލާސް އެވޯޑަކީ ކުޅިވަރުގެ ދާއިރާއިން ޒުވާން ހުނަރުވެރިންގެ އަގު ވަޒަންކޮށް ކުޅިވަރުގެ ދާއިރާއިން އިތުރަށް ދަރިވަރުން ކުރިއެރުވުމަށް 2013 ވަނަ އަހަރުން ފެށިގެން މިނިސްޓްރީ އޮފް އެޑިއުކޭޝަނުން ދެމުން އަންނަ އެވޯޑެކެވެ.

ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙުގެ އިސްނެންގެވުމަށް "ދުޅަހެޔޮ ހަށިހެޔޮ" ކުޅިވަރު ޢީދު ފެސްޓިވަލެއް 2018 ވަނަ އަހަރު ވަނީ ބާއްވާފައެވެ. މިކުޅިވަރު ފެސްޓިވަލަކީ ފަހުގެ ތާރީޚެއްގައި ރާއްޖޭގައި ބޭއްވި އެންމެ ބޮޑު ކުޅިވަރު ފެސްޓިވަލަށްވާއިރު، މިހަރަކާތަށް ބޮޑު ތަރުޚީބެއް ލިބުނެވެ. މިގޮތުން 17 ކުޅިވަރު އެސޯސިއޭޝަނާއި 15 ޖަމިއްޔާއަކުން މިހަރަކާތުގައި އެބުރު ބައިވެރިވިއެވެ.