ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން އިސްނަގައިގެން ހުޅުމާލޭގައި "މައި ހުޅުމާލެ ވޮލީބޯލް ކޭމްޕް 2021" ނަމުގައި ކުޑަކުދިންނަށް އަމާޒުކޮށްގެން ވޮލީބޯޅަ ކޭމްޕެއް ބާއްވަން ނިންމައިފިއެވެ.

މި ކޭމްޕް ރޭވުމުގައި އިސްކޮށް ހަރަކާތްތެރިވާ އެޗްޑީސީގެ ކޯޕޮރޭޓް ސޯޝަލް ރެސްޕޮންސިބިލިޓީ ކޯޑިނޭޓަރު މުޙައްމަދު ސާޖިދު (ކާއްޓޭ) ވިދާޅުވީ، މިއީ ހަފުތާއަކަށް ކުރިއަށްގެންދަން ނިންމާފައިވާ ކޭމްޕެއް ކަމަށާއި، އެހެންނަމަވެސް މި ކޭމްޕުގައި ބައިވެރިވާ ކުދިންގެ ބެލެނިވެރިން ބޭނުންވާނަމަ މެދުކެނޑުމެއްނެތި ކުރިއަށްދާނެ ކަމަށެވެ. އަދި މި ކޭމްޕުގައި ކޯޗުންގެ ގޮތުގައި ހަރަކާތްތެރިވާނީ ރާއްޖޭގެ ފުންނާބުއުސް ކޯޗުންނާއި ކުރީގެ ކުޅުންތެރިން ކަމަށްވެސް ވިދާޅުވިއެވެ.

ކާއްޓޭ ވިދާޅުވީ ކޭމްޕް ނިންމުމަށްފަހު އިތުރަށް ބެލެނިވެރިން ބޭނުންވާނަމަ ހުޅުމާލެ ފުލުހުންނާއި މޯލްޑިވްސް ވެޓަރެންސް ގުޅިގެން މި ޕްރޮގްރާމް ކުރިއަށްގެންދިޔުމުގައި ދޭންޖެހޭ އެއްބާރުލުން އެޗްޑީސީން ދޭނެ ކަމަށެވެ.

ކުޑަކުދިންނަށް އަމާޒުކޮށްގެން ވޮލީބޯޅަ ކޭމްޕެއް ހުޅުމާލޭގައި ބާއްވާއިރު، މި ކޭމްޕުގެ މަގުސަދަކީ ކުޑަކުދިން ވޮލީބޯޅައަށް ޝައުގުވެރިކުރުމާއި، އެ ކުދިންނަށް ވޮލީބޯޅައިގެ ހުނަރުތައް ދަސްކޮށްދިނުން ކަމަށް އެޗްޑީސީން ބުނެއެވެ. އަދި މި ކޭމްޕުގައި ބައިވެރިވެވޭނީ އުމުރުން 12 އަހަރާއި 15 އަހަރާ ދެމެދު އުމުރުފުރާގެ ކުދިންނަށް ކަމަށާއި، އަދި ކޭމްޕުން ފުރުސަތުދޭނީ އެންމެ ފުރަތަމަ ފޯމު ހުށަހަޅާ 40 ފިރިހެން އަދި 40 އަންހެން ކުދިންނަށް ކަމަށްވެސް އެޗްޑީސީން މައުލޫމާތުދެއެވެ.

މި ކޭމްޕުގައި ބައިވެރިވުމަށް ފޯމު ހުށަހެޅުމުގެ ސުންގަޑިއަކީ އަންނަ ނޮވެމްބަރު މަހުގެ ހަތެއްވާ އާދީއްތަ ދުވަހުގެ މެންދުރުފަހު 15:00 ގެ ކުރިންނެވެ.

އެޗްޑީސީން ބުނީ މި ކޭމްޕް ކުރިއަށް އޮތްތަނުގައިވެސް މެދު ކެނޑުމެއްނެތި ކުރިއަށްގެންދިޔުމަށް ނިންމާފައިވާ ކަމަށާއި، އަދި ވޮލީބޯޅަ ނޫން އެހެން ކުޅިވަރުތަކުގެ ކޭމްޕުތައްވެސް ކުރިއަށް އޮތްތަނުގައި ބޭއްވިގެންދާނެ ކަމަށެވެ. އަދި މި ފަހަރުގެ ކޭމްޕު ބޭއްވިގެންދަނީ ވަރަށް ގިނަ ބައެއްގެ އެހީތެރިކަމާއެކުގައި ކަމަށާއި، އެގޮތުން ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އާއި، ޕޮލިސް ކުލަބު އަދި ކުޅިވަރާ ބެހޭ ވުޒާރާގެ އެހީތެރިކަން ލިބެމުން އަންނަ ކަމަށް އެޗްޑީސީން މައުލޫމާތުދެއެވެ.