މިނިވަން ޖުޑީޝަރީއެއް ގާއިމް ނުކުރެވޭނަމަ، އެތަނެއްގައި އަދުލު އިންސާފުގެ ވެރިކަމެއް ނޯންނާނެ - އުއްތަމަ ފަނޑިޔާރު
25 މާރިޗު 2022 | ހުކުރު 02:10ފަނޑިޔާރުން ނިންމާ ކޮންމެ ނިންމުކަކީ، މުޖުތަމައުގައި ތިބޭ ކޮންމެ ފަރުދަކަށް އަސަރުކުރާނެ ނިންމުމެއް
'ޤަޟާއީ އަހަރު 2022' އިފްތިތާހު ކުރުމަށް ބޭއްވި ރަސްމިއްޔާތުގެ ތެރެއިން
މިނިވަން ޖުޑީޝަރީއެއް ގާއިމް ނުކުރެވޭނަމަ، އެތަނެއްގައި އަދުލު އިންސާފުގެ ވެރިކަމެއް ނޯންނާނެކަމަށް އުއްތަމަ ފަނޑިޔާރު އަހުމަދު މުތަސިމް އަދުނާނު ވިދާޅުވެއްޖެއެވެ.
ޝަރުއީ ދާއިރާގެ މަސައްކަތްތައް ފެށުމަށް ކޮންމެ އަހަރަކުވެސް ބާއްވަމުން އަންނަ 'ޤަޟާއީ އަހަރު 2022′ އިފްތިތާހު ކުރުމުގެ ޖަލްސާގައި ވާހަކަފުޅުދައްކަވަމުން އުއްތަމަ ފަނޑިޔާރު ވިދާޅުވީ، އަދުލު އިންސާފު ކަށަވަރު ކުރުމަކީ ކޯޓުތަކުގެ ފަނޑިޔާރުންގެވެސް އެންމެ ބޮޑު މަސްއޫލިއްޔަތުކަމަށެވެ.
ފަނޑިޔާރުންނަށް މިނިވަންކަމާއިއެކު މަސައްކަތް ކުރެވޭނެ މަގު ތަނަސްކޮށްދެނީ، އެކި ފަރާތްތަކުގެ މެދުގައި އުފެދޭ އެކި މައްސަލަތުގައި އިންސާފު ގާއިމް ކޮށްދިނުމަށް ކަމަށާއި، އެކަން އިންސާފުން ކޮށްދެއްވުމަކީ ފަނޑިޔާރުންގެ އެންމެ ބޮޑު ޒިންމާކަމަށް އުއްތަމަ ފަނޑިޔާރު ވިދާޅުވިއެވެ. ފަނޑިޔާރުންނަށް މިނިވަންކަންދެވެނީ ފަނޑިޔާރުންގެ އަމިއްލަ ބޭނުމަކަށް ނޫން ކަމަށާއި، މިނިވަންކަން އޮންނަންޖެހެނީ، ފަނޑިޔާރުންނަކީ އެކިއެކި ފަރާތްތަކުގެ މެދުގައި އުފެދޭ ޚުސޫމަތްތަކުގައި ގޮތް ކަނޑައަޅާ ފަރާތްކަމުގައި ވުމުން ކަމުގައި އުއްތަމަ ފަނޑިޔާރު ވިދާޅުވިއެވެ. ފަނޑިޔާރުންގެ މަސްއޫލިއްޔަތަކީ ގާނޫނުގެ ވެރިކަން ނެގެހެއްޓުން ކަމަށާއި، ފަނޑިޔާރުގެ ހަގީގީ މާނައިގައި މިނިވަންނުވެ، މަސްއޫލިއްޔަތު އަދާކުރުމަކީ މުސްތަހީއްލު ކަމެއް ކަމުގައިވެސް އުއްތަމަ ފަނޑިޔާރު ވިދާޅުވިއެވެ. ގައުމުގެ ހަމަޖެހުމާއި އަދުލު އިންސާފުގެ ވެރިކަން މިނިވަން ޖުޑީޝަރީއެއް ނެތި، ނުކުރެވޭނެކަމީ ތާރީހު ހެކިދޭ ކަމެއް ކަމުގައި އުއްތަމަ ފަނޑިޔާރު ވިދާޅުވިއެވެ.
އުއްތަމަ ފަނޑިޔާރު ވިދާޅުވީ ޒިންމާ އަދާކުރުމުގައި ފަނޑިޔާރުންގެ އެންމެބޮޑު އަމާޒަކަށް ވާންޖެހެނީ ނަޒާހާތްތެރި ކަމާއެކު މަސައްކަތުގައި ދެމި ތިބުމަށް ކަމުގައެވެ. ތިމާގެ މަސްލަހަތު ހިމެނޭ ކަމެއްކަމަށް ތިންވަނަ ފަރާތަކުން އިނގިލި ދިއްކޮށްފާނެ މައްސަލައެއްގައި ބައިވެރިނުވެ ފަނޑިޔާރު ކަމުގެ ޒިންމާ އަދާކުރުމުގައި ފަނޑިޔާރުގެ ތެދުވެރިކަމާއި އިޚްލާސްތެރިކަމާއިއެކު ސުވާލު އުފައްދަން ފުރުސަތު ނުދިނުމަކީ އެންމެ މުހިންމު އެއްކަންތައް ކަމަށް އުއްތަމަ ފަނޑިޔާރު ވިދާޅުވިއެވެ.
އަދުކުވެރިކަމާއެކު ހަމަހަމަ ކާމާއެކު އިންސާފުވެރިކަމާއެކު ވަކިފަރާތަކަށް ބުރަނުވެ، ޒާތީ ތައައްސުބުން އެއްކިބާވެ ގާނޫނުތަކުގައި ވާގޮތުގެ މަތިން ފަނޑިޔާރުންގެ ޒިންމާ އަދާކުރަމުން ދިޔުމަކީ މުހިންމު ކަމެއް ކަމަށާއި، ރައްޔިތުންގެ ފަރާތުން ޝަރުއީ ދާއިރާއަށް އޮންނަ އިތުބާރަށް ބުރުލެއް އެރިޔަ ނުދިނުމަކީ ފަނޑިޔާރު ކަމުގައި ދެމިތިބޭ ހިނދަކު ފަނޑިޔާރުންގެ އެންމެ އިސް ވާޖިބު ކަމުގައި ދެކެންވާނެ ކަމުގައިވެސް އުއްތަމަ ފަނޑިޔާރު ވިދާޅުވިއެވެ.
ފަނޑިޔާރުން ނިންމާ ކޮންމެ ނިންމުކަކީ، މުޖުތަމައުގައި ތިބޭ ކޮންމެ ފަރުދަކަށް އަސަރުކުރާނެ ނިންމުމެއް ކަމަށް ވިދާޅުވިއެވެ. ފަރުދީ އަދި މުޖުތަމައުގެ އާންމު މަސްލަހަތު ރައްކާތެރިވެގެންދާނީ ވިސްނުންތެރިކަމާއެކު ގާނޫނުން ލިބިގެންވާ ބާރު ބޭނުން ކުރެވިގެންކަން ފަނޑިޔާރުން އަބަދުވެސް ހަނދާން ބަހައްޓަންވާނެ ކަމަށް ވެސް އުއްތަމަ ފަނޑިޔާރު ވިދާޅުވިއެވެ.
ކޮވިޑް19ގެ ބަލިމަޑުކަމާއިއެކު ދިމާވި ގޮންޖެހުންތަކާއެކުވެސް ހެޔޮ ބަދަލުތަކެއް ޝަރުއީ ދާއިރާއަށް ގެނެވިފައިވާކަމަށާއި، ބަލިމަޑުކަމާއެކު ޓެކްނޮލޮޖީއަށް އަހުލުވެރި ބަޔަކަަށް ޝަރުއީ ދާއިރާވެގެން ގޮސްފައިވާއިރު، ކޯޓުތަކުގައި ޝަރީއަތްތައް ލައިވް ކުރެވި، ކޯޓުތަކުގެ މަސައްކަތް ހުއްޓުމެއްނެތި ކުރިއަށް ގެންދެވުނުކަމީ އުފަލާއިއެކު ފާހަގަކޮށްލަންޖެހޭ ކަމެއް ކަމަށް އުއްތަމަ ފަނޑިޔާރު ވިދާޅުވިއެވެ.
ޝަރުއީ ދާއިރާ އިސްލާހުކޮށް، ރައްޔިތުންގެ އިތުބާރު ހިފޭ ތަނަކަށް ހެދުމަށް ގިނަ މަސައްކަތްތަކެއް ކުރެވިފައިވާކަމަށާއި، މިހާރު ފަނޑިޔާރުންނާއި، ފަނޑިޔާރުގެތަކާމެދު ރައްޔިތުން ދެކޭ ގޮތަށް ވަނީ ބޮޑެތި ބަދަލުތަކެއް ގެނެވިފައިކަމަށް ވިދާޅުވިއެވެ. ޝަރުއީ ނިޒާމު ހަރުދަނާ ކުރުމަށް ގިނަ މަސައްކަތްތަކެއް ކުރެވެމުންދާކަން ފާހަގަކުރައްވާ އުއްތަމަ ފަނޑިޔާރު ވިދާޅުވީ ޝަރުއީ ދާއިރާގައި އިންޓަރގްރޭޓެޑް ކޯޓް މެނޭޖްމެންޓް ސިސްޓަމެއް ގާއިމް ކުރުމުގެ މަސައްކަތްވެސް ކުރެވެމުންދާކަމަށެވެ. މީގެ އިތުރުންވެސް އައު ޓެކްނޮލޮޖީ ތައާރަފްކުރުމުގެ މަސައްކަތް ކުރަމުން އަންނަކަމަށް ވިދާޅުވިއެވެ. އަދި ކޭސް ރިޕޯޓް ސޮފްޓްވެއާ އެއް ތައްޔާރު ކުރުމުގެ މަސައްކަތްވެސް ކުރެވެމުންދާކަމަށް ވިދާޅުވިއެވެ.
މި ރަސްމިއްޔާތު ޝަރަފުވެރި ކޮށްދެއްވީ، ރައީސުލްޖުމްހޫރިއްޔާ އިބްރާހިމް މުހައްމަދު ސާލިހުއެވެ. މި ރަސްމިއްޔާތުގައި ރައްޔިތުންގެ މަޖިލީހުގެ ރައީސް މުހައްމަދު ނަޝީދުވެސް ބައިވެރިވެވަޑައިގެންނެވިއެވެ. ޝަރުއީ ދާއިރާ އޮޓޯމޭޓްކުރުމުގެ ގޮތުން އަލަށް ތައާރަފްކުރެވިފައިވާ ތިން އެޕްލިކޭޝަނެއް ލޯންޗްކޮށްދެއްވީ ރައްޔިތުންގެ މަޖިލީހުގެ ރައީސް، މުހައްމަދު ނަޝީދެވެ. ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަންގެ އައު ވެބްސައިޓް ލޯންޗްކޮށްދެއްވީ ޖުޑީޝަލް ސަރވިސް ކޮމިޝަންގެ ރައީސް ހިސާން ހުސައިނެވެ. އުއްތަމަ ފަނޑިޔާރު ވަނީ ސްޓޭޓް އޮފް ޖުޑީޝަރީ އެޑްރެސް އިއްވަވާފައެވެ.
