ވެމްކޯއަށް މެނޭޖިންގ ޑިރެކްޓަރަކު ހަމަޖެއްސުމުގެ މަސައްކަތް ކުރިއަށް
24 މާރިޗު 2022 | ބުރާސްފަތި 07:44ވެމްކޯއަށް ވަރަށް އަވަހަށް މެނޭޖިންގ ޑިރެކްޓަރަކު ހަމަޖައްސާނެ
ވޭސްޓް މެނޭޖްމަންޓް ކޯޕަރޭޝަން ލިމިޓެޑް (ވެމްކޯ)
ވޭސްޓް މެނޭޖްމަންޓް ކޯޕަރޭޝަން ލިމިޓެޑް (ވެމްކޯ) އަށް މެނޭޖިންގ ޑިރެކްޓަރަކު ހަމަޖެއްސުމުގެ މަސައްކަތް ކުރިއަށްދާ ކަމަށް ފިނޭންސް މިނިސްޓްރީން ބުނެފިއެވެ.
ރާއްޖެއެމްވީއަށް މައުލޫމާތުދެމުން އެ މިނިސްޓްރީން ބުނީ ވެމްކޯއަށް ވަރަށް އަވަހަށް މެނޭޖިންގ ޑިރެކްޓަރަކު ހަމަޖައްސާނެ ކަމަށެވެ. ނަމަވެސް ސީދާ ތާރީހެއް އެމިނިސްޓްރީން ހާމަކޮށްފައެއް ނުވެއެވެ.
ވެމްކޯގެ މެނޭޖިންގ ޑިރެކްޓަރުގެ މަޤާމު މާރޗް މަހުގެ 14 ވަނަ ދުވަހު ހުސްވެފައިވަނީ އެމަޤާމުގައި ކުރިން ހުންނެވި އާދަމް މުޙައްމަދު މޯލްޑިވްސް ޕޯސްޓް ލިމިޓެޑުގެ މެނޭޖިންގ ޑިރެކްޓަރުގެ މަޤާމަށް އައްޔަން ކުރެއްވުމާއި ގުޅިގެންނެވެ.
އާދަމް މުޙައްމަދު މޯލްޑިވްސް ޕޯސްޓް ލިމިޓެޑްގެ މެނޭޖިންގ ޑިރެކްޓަރުގެ މަޤާމަށް އައްޔަންކުރައްވާފައިވަނީ އެމަޤާމުގައި ކުރިން ހުންނެވި އަޙްމަދު ޝަފީޤު މަޤާމުން ވަކިކޮށްފައިވާ ކަމަށް ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުން އެންގުމަށްފަހުގައެވެ.
މޯލްޑިވްސް ޕޯސްޓް ލިމިޓެޑްގެ މެނޭޖިންގ ޑިރެކްޓަރުގެ މަޤާމަށް އާދަމް މުޙައްމަދު އައްޔަނު ކުރައްވާފައިވާއިރު ސަރުކާރުން ދާދިފަހުން ވަނީ މިނިސްޓަރ އޮފް ސްޓޭޓް ފޮރ އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޯލޮޖީގެ ސްޓޭޓް މިނިސްޓަރުގެ މަޤާމަށް ސްޓެލްކޯގެ ކުރީގެ މެނޭޖިންގ ޑިރެކްޓަރު ޙަސަން މުޣުނީ އައްޔަނުކުރައްވާފައެވެ. އަދި ސްޓެލްކޯގެ މެނޭޖިންގ ޑިރެކްޓަރަކަށް އިލެކްޝަންސް ކޮމިޝަންގެ ކުރީގެ ރައީސް އަހުމަދު ޝަރީފް ވަނީ އައްޔަންކުރައްވާފައެވެ.
ސަރުކާރުން މި ބަދަލުތައް ގެނެސްފައިވާއިރު މަގާމްތަކަށް މިހާ ބޮޑު ބަދަލެއް ގެންނަން ނިންމާފައިވާ ސަބަބެއް ހާމަކޮށްފައެއްނުވެއެވެ.
