އެން.ސީ.އައި.ޓީގެ ހަރުމުދާ ބެލެހެއްޓުން: މިލިއަނަކަށްވުރެ ގިނަ ރުފިޔާއަކީ ހަރުމުދަލުގެ ޞައްހަ އަގުކަން ކަށަވަރުކުރެވޭކަށް ނެތް
އޮޑިޓް ރިޕޯޓްގައި ބުނެފައިވަނީ މިމައްސަލައަކީ 2018 ވަނަ އަހަރުގެ އޮޑިޓްގައިވެސް ފާހަގަކޮށް އިސްލާހުކުރަން ލަފާދިން މައްސަލައެއް ކަމަށް
މިނިސްޓްރީ އޮފް ކޮމިއުނިކޭޝަން، ސައިންސް އެންޑް ޓެކްނޮލޮޖީ
ނެޝަނަލް ސެންޓަރ ފޮރ އިންފޮމޭޝަން ޓެކްނޮލޮޖީ (އެންސީއައިޓީ)ން ހޯދާފައިވާ ހަރުމުދަލުގެ އަގު ހަރުމުދަލުގެ ރަޖިސްޓްރީން އެނގެން ނެތުމުގެ ސަބަބުން، 2019 ވަނަ އަހަރުގެ މިނިސްޓްރީ އޮފް ކޮމިއުނިކޭޝަން، ސައިންސް އެންޑް ޓެކްނޮލޮޖީގެ މިލްކިއްޔާތުގެ ބަޔާނުގައި ހަރުމުދަލުގެ އަގުގެ ގޮތުގައި ހިމަނާފައިވާ 164،430،313 (އެއް ސަތޭކަ ފަސްދޮޅަސް ހަތަރު މިލިއަން ހަތަރު ސަތޭކަ ތިރީސް ހާސް ތިން ސަތޭކަ ތޭރަ) ރުފިޔާއަކީ ހަރުމުދަލުގެ ޞައްހަ އަގުކަން ކަށަވަރުކުރެވެން ނެތްކަމަށް އެ މިނިސްޓްރީގެ އޮޑިޓް ރިޕޯޓުން ހާމަވެއްޖެއެވެ.
އޮޑިޓަރ ޖެނެރަލް އޮފީހުން ކޮމިޔުނިކޭޝަން މިނިސްޓްރީގެ 2019 ވަނަ އަހަރުގެ އޮޑިޓް ރިޕޯޓް ވަނީ ހާމަކޮށްފައެވެ. އެރިޕޯޓުގައި އޮޑިޓުން ފާހަގަކުރެވުނު މައްސަލަތައް ހިމަނާފައިވާއިރު އެއް މައްސަލައެއްގެ ގޮތުގައި ފާހަގަކޮށްފައިވަނީ ހަރުމުދަލުގެ ހިސާބުތައް ގަވާއިދާ އެއްގޮތަށް ބަލަހައްޓާފައި ނެތުމެވެ.
ދައުލަތުގެ މާލިއްޔަތުގެ ގަވާއިދުގައި ބަޔާންކޮށްފައިވަނީ ދައުލަތުގެ ހަރުމުދަލުގެ ރަޖިސްޓްރީގައި ހިމެނޭ ކޮންމެ މުދަލެއްގައިވެސް ވަކި މައުލޫމާތުތަކެއް ފުރިހަމަކޮށް ބެލެހެއްޓިފައި ހުންނަން ވާނެކަމަށެވެ. ނަމަވެސް އެންސީއައިޓީން ހޯދާފައިވާ ގިނަ އަދަދެއްގެ މައިކްރޯ ސޮފްޓް ލައިސެންސްތައް ހަރުމުދަލުގެ ރަޖިސްޓްރީގައި ހިމަނައިގެން ބަލަހައްޓަމުން ގެންގޮސްފައިނުވުމާއި، އެސެންޓަރުގެ ހަރުމުދަލުގެ ރަޖިސްޓްރީގައި ހިމަނާފައިވާ ބައެއް ހަރުމުދަލުގެ އަގު ހަރުމުދަލުގެ ރަޖިސްޓްރީން އެނގެން ނެތްކަމުގައި އޮޑިޓް ރިޕޯޓްގައި ފާހަގަކޮށްފައިވެއެވެ.
ދައުލަތުގެ މާލިއްޔަތުގެ ގަވާއިދުގައި ދައުލަތުގެ އޮފީސްތަކުގައި ހުންނަ ހަރުމުދާ ހަމައަށް ހުރިތޯ މަދުވެގެން އަހަރަކު އެއްފަހަރު، އެ އޮފީހުގެ މާލީ ޒިންމާދާރުވެރިޔާ ކަނޑައަޅާ އުސޫލެއްގެ މަތިން ޗެކުކޮށް ބަލަންވާނެކަމަށް ބަޔާންކޮށްފައިވީ ނަމަވެސް، ކޮމިޔުނިކޭޝަން މިނިސްޓްރީގެ ދަށުން ހިންގަމުންގެންދާ އެންސީއައިޓީގެ ބެލުމުގެ ދަށުގައި ހުރި ހަރުމުދާ ގަވާއިދުގައި ބަޔާންކޮށްފައިވާ ގޮތަށް ޗެކުކޮށް މާލީ ޒިންމާދާރުވެރިޔާ ސޮއިކޮށްފައިނުވާކަމަށް އޮޑިޓް ރިޕޯޓްގައިވެއެވެ.
އޮޑިޓް ރިޕޯޓްގައި ބުނެފައިވަނީ މިމައްސަލައަކީ 2018 ވަނަ އަހަރުގެ އޮޑިޓްގައިވެސް ފާހަގަކޮށް އިސްލާހުކުރަން ލަފާދިން މައްސަލައެއް ކަމަށާއި މިކަން އިސްލާހުކުރަން އެދެވޭ މަސައްކަތެއް ކޮށްފައިނުވާކަމަށެވެ.
މިމައްސަލަ ހައްލުކުރުމަށް ދެ ކަމެއް ވަނީ ހުށަހަޅާފައެވެ. އެއީ ދައުލަތުގެ މާލިއްޔަތުގެ ގަވާއިދުގައި ބަޔާންކޮށްފައިވާ ގޮތުގެ މަތިން މުދާ ލިބުނު ތާރީޚާއި މުދަލުގެ އަގާއި މުދާ ހުރިތަން އަދި މުދަލަށް ފަހުން އަންނަ ބަދަލު ރަޖިސްޓްރީގައި ހިމަނަގައިގެން ބެލެހެއްޓުމެވެ. އަދި ދައުލަތުގެ މާލިއްޔަތުގެ ގަވާއިދުގައި ބަޔާންކޮށްފައިވާ ގޮތުގެ މަތިން ތަކެއްޗާއި ހަވާލުވެހުރި މުވައްޒަފަކާއި ޗެކުކުރި ބަޔަކު ހަރުމުދާ ޗެކުކުރިކަމުގެ ލިޔުމެއްގައި ސޮއިކުރުމަށާއި އަދި ޗެކްކުރިއިރު އުނިއިތުރެއްވާނަމަ އެކަމާމެދު ނިންމި ގޮތް ބަޔާންކޮށް އެއޮފީހެއްގެ މާލީ ޒިންމާދާރުވެރިޔާ ނުވަތަ އެއޮފީހެއްގެ އިސްވެރިއަކު ސޮއިކުރުމަށެވެ.
