ޖިންސީ ގޯނާގެ މައްސަލަ: ކޮމިޓީން ތަހުގީގުގެ ތެރެއަށް ނުވަންނާނެ

އައްޑޫ ސިޓީ ހިތަދޫގައި 6 އަހަރުގެ އަންހެން ކުއްޖަކަށް ޖިންސީ ގޯނާކުރި މައްސަލައިގެ ތަހުގީގުގެ ތެރެއަށް ކޮމިޓީން ނުވަންނާނެ ކަމަށާއި، މަސައްކަތް ކުރާނީ، މުޅި މައްސަލައިގައި ކަން ހިނގާ ގޮތް ބެލުމަށް ކަމަށް ރައްޔިތުންގެ މަޖިލީހުގެ ހިއުމަން ރައިޓްސް ކޮމިޓީގެ މުގައްރިރު ޖީހާން މަހުމޫދު ވިދާޅުވެއްޖެއެވެ.

ހޯމަ ދުވަހު ބޭއްވި ކޮމިޓީ ބައްދަލުވުމުގައި ޖީހާން ވިދާޅުވީ، ތަހުގީގު މަރުހަލާގައި ހިނގާ ކަންކަމުގެ ތެރެއިން، ހެކި ވަޒަންކުރުން ފަދަ ކަންކަމުގެ ތެރެއަށް ކޮމިޓީން ނުވަންނާނެ ކަމަށެވެ. މަސައްކަތް ކުރާނީ މުޅި މައްސަލައިގައި ކަން ހިނގާ ގޮތް ބަލައި، ކުޑަކުދިންގެ ހައްގުތަކުގެ ގާނޫނާއި އެހެނިހެން ގާނޫނުތަކުގެ ނަޒަރުން ވިސްނާއިރު ކަންބޮޑުވުމެއް އަދި ސުވާލު އުފެދޭކަމެއްވާނަމަ އިދާރާތައް ޖަވާބުދާރީ ކުރުވަން ކަމަށެވެ. އަދި އާންމު އުސޫލުން މަސައްކަތްކުރާ ގޮތަށް ލިޔެކިޔުންތައް ކޮމިޓީއަށް ލިބުމުން އިތުރު ބައްދަލުވުންތައް ކުރިއަށް ގެންދެވޭނެކަމަށް ޖީހާން ވިދާޅުވިއެވެ.

ކޮމިޓީގައި ހިމެނިވަޑައިނުގެންނެވި ނަމަވެސް، މިއަދު ކޮމިޓީގައި ހިތަދޫ ދެކުނު ދާއިރާގެ މެމްބަރު އިބްރާހިމް ނާޒިލް ބައިވެރިވެވަޑައިގެންނެވިއެވެ.

މި މައްސަލައާއި ގުޅޭ ގޮތުން ނާޒިލް ވިދާޅުވީ، މިހާތަނަށް އެ އަންހެން މީހާގެ ފަރާތުން މިފަދަ އެއްވެސް ޝަކުވާއެއް ލިބިފައި ނުވާކަމަށް ސްކޫލްގެ ފަރާތުން މައުލޫމާތު ލިބިފައިވާ ކަމަށެވެ. އެ އަންހެން މީހާއަކީ ބަލިމީހެއް ކަމަށާއި، މި ރަމަޟާން މަހު ތެރޭގައި އޭނާއަށް ލުއި ގޮތެއް ހޯދައިދޭން ކޮމިޓީގެ ފަރާތުން މަސައްކަތް ކުރަން ޖެހޭ ކަމަށް ނާޒިލް ވިދާޅުވިއެވެ.

ނާޒިލް ވިދާޅުވީ، އެ އަންހެން މީހާއަކީ، އޭނާއަށް މާމަ ކިޔާ 3 ކުއްޖަކު ބަލަމުން އަންނަ މީހެއް ކަމަށާއި، އެ ކުދިންނާވެސް ފުލުހުން ސުވާލުކުރި ކަމަށެވެ. އެކުދިންގެ ފަރާތުންވެސް އެފަދަ ކަމެއް މިހާތަނަށް ހިނގާފައިވާ ކަމުގެ މައުލޫމާތު ލިބިފައި ނުވާކަމަށް ނާޒިލް ވިދާޅުވިއެވެ.

ވިލިމާލެ ދާއިރާގެ މެމްބަރު އަހުމަދު އުޝާމް ވިދާޅުވީ، މި މައްސަލައިގައި ހައްޔަރުކޮށްފައިވާ މީހާގެ ބަންދާމެދު ގޮތެއް ނިންމުމަކީ ކޯޓުގައި ނިންމާ ނިންމުމެއް ކަމަށާއި، ދަށު ކޯޓުގެ ނިންމުން ގޯސް ކަމަށް ގަބޫލުކުރާނަމަ އެ މައްސަލަ މަތީ ކޯޓެއްގައި އިސްތިއުނާފް ކުރުމުގެ ފުރުސަތު އެބައޮތް ކަމަށެވެ. އެހެންކަމުން ކޯޓު މަރުހަލާގައި ހިނގާ ކަމެއްގެ ތެރެއަށް ވަނުމަކީ ކޮމިޓީން ކުރަން ޖެހޭ ކަމެއް ކަމަށް ގަބޫލް ނުކުރައްވާ ކަމަށް އުޝާމް ވިދާޅުވިއެވެ.

އުޝާމްގެ ވާހަކަފުޅަށް އެހެން މެމްބަރުންވެސް ތާއީދުކުރެއްވިއެވެ.  

އައްޑޫ ސިޓީގައި އުމުރުން 6 އަހަރުގެ އަންހެން ކުއްޖަކަށް ޖިންސީ ގޯނާކުރިކަމުގެ ތުހުމަތުގައި ހައްޔަރުކުރީ އުމުރުން 59 އަހަރުގެ އަންހެނެކެވެ. އޭނާއަކީ އެރަށު ސުކޫލްގައި މަސައްކަތު މީހެއްގެ ވަޒީފާ އަދާކުރާ މީހެކެވެ. ޝަރީއަތުން ވަކި ގޮތެއް ނިންމަންދެން އޭނާ ބަންދުގައި ބެހެއްޓުމަށް ކޯޓުން ވަނީ އަމުރުކޮށްފައެވެ.

ޖިންސީ ގޯނާކުރިކަމަށް ތުހުމަތުކުރެވޭ އެކުއްޖާގެ ކާފަ ހައްޔަރު ނުކޮށް، ކުށެއް ނެތް މީހަކު ފްރޭމްކޮށް، ޖަލުގައި އަނިޔާދެމުންދާކަމަށް ބުނެ ހިތަދޫގައި އަންނަނީ މުޒާހަރާވެސް ކުރަމުންނެވެ.

މީގެއިތުރުން، އެ މައްސަލަ ސީރިއަސް މައްސަލައެއްގެ ގޮތުގައި ބަލައި އެކަމުގައި ޝާމިލުވާ އެންމެންގެ މައްސަލަތައް ވަކިވަކިން ތަހުގީގު ކޮށްދިނުމަށް އައްޑޫ ސިޓީ ކައުންސިލުން ވަނީ ގޮވާލާފައެވެ. މި މައްސަލާގައި ފުލުހުން ބުނެފައިވަނީ، އިތުރަށް ބަލަން ޖެހޭ ކަންކަން ބެލުމާއި މައްސަލައާއި ގުޅޭ ހެކި ހޯދުމުގެ މަސައްކަތާއި އިތުރު މީހެއްގެ ބައިވެރިވުން އެކަމުގައި އޮތްތޯ ބެލުމުގެ މަސައްކަތް ކުރަމުންދާ ކަމަށެވެ. ކުއްޖާއަށް ޖިންސީ އަނިޔާއެއް ލިބިފައިވޭތޯ ބަލަން މެޑިކަލް އެސެސްމަންޓް ހަދާފައިވާ ކަމަށާއި، ތަހުގީގަށް ބޭނުންވާ ކުއްޖާގެ ނަފްސާނީ ހާލަތާއި ގުޅޭ އެެސެސްމަންޓާއި, ކުއްޖާއަށް ބޭނުންވާ ރައްކާތެރިކަން ފޯރުކޮށްދިނުމަށް ކުރަންޖެހޭ މަސައްކަތް ކުރަމުން އަންނަކަމަށްވެސް ފުލުހުން ބުނެއެވެ.