އިންވެސްޓްމަންޓް އެންޑް ކަނެކްޓިވިޓީ އިވެންޓް ބާއްވައިފި

ޓޫރިޒަމް މިނިސްޓްރީ އާއި މޯލްޑިވްސް މާރކެޓިންގް އެންޑް ޕަބްލިކް ރިލޭޝަންސް ކޯޕަރޭޝަން (އެމް.އެމް.ޕީ.އާރ.ސީ) އާއި މޯލްޑިވްސް ޓޫރިޒަމް ޑިވެލޮޕްމަންޓް ކޯޕަރޭޝަން (އެމް.ޓީ.ޑީ.ސީ) އާއި ޓޫރިޒަމް އިންޑަސްޓްރީގެ އެހެން ސްޓޭކް ހޯލްޑަރުންނާއި ގުޅިގެން އިންވެސްޓްމަންޓް އެންޑް ކަނެކްޓިވިޓީ އިވެންޓެއް އިންޑިއާގެ ކޮޝަލް ކެޕިޓަލް މުމްބައިގައި ބާއްވައިފިއެވެ.

މާރިޗު 14ން 16ށް މުމްބާއިގައި ކުރިއަށްދިޔަ ޓޫރިޒަމް ފެއަރ "އައުޓް ބައުންޑް ޓްރެވަލް މާކެޓް"(އޯ.ޓީ.އެމް) ގެ ހަވާސާގައި ބޭއްވި މި އިވެންޓު އޮތީ ވެސްޓިން ހޮޓެލްގައެވެ. ދިވެހިރާއްޖޭގެ ޓޫރިޒަމް އިންވެސްޓްމަންޓްއި ކަނެކްޓިވިޓީ ފަހިކުރުމުގެ ގޮތުން ވަކީން ޚާއްޞަކޮށް ތިލަދުންމައްޗާއި މިލަދުންމަޑުލުގެ ފަތުރުވެރިކަމަށް ޢަމްޒުކުރެވިގެން ބޭއްވި މި އިވެންޓުގައި ކުޅުދުއްފުށީ ސިޓީ ކައުންސިލާއި ނ. އަތޮޅު ކައުންސިލާއި ހދ. އަތޮޅު ކައުންސިލުން ބައިވެރިވިއެވެ.

އިންޑިއާގެ އިންވެސްޓަރުންނާއި އެއަރ ލައިން އޮޕަރޭޓަރުންނާއި ޓްރެވަލް ޓްރޭޑް މީޑިއޯ ބައިވެރިވި މި އިވެންޓުގައި ރާއްޖޭގައި ހުރި އިންވެސްޓްމަންޓް ފުރުސަތުތަކާއި ކަނެކްޓިވިޓީގެ ފުރުސަތުތަކުގެ މަޢުލޫމާތާއި ރާއްޖޭގެ ފަތުރުވެރިކަމުގެ މަޢުލޫމާތު ހިއްސާކުރެވި ފަތުރުވެރިކަމުގެ މުޢާމަލާތްތައް ކުރުމުގެ މަޝްވަރާތައް ކުރެވުނެވެ. އަދި އިވެންޓުގައި ފަތުރުވެރިކަމުގެ ރަން އަހަރުގެ ތީމްލަވަ ނަލަނަލަ ރާއްޖެ އިޝްތިހާރު ކުރުމާއި ގޯލްޑަން ޖުބްލީގެ އެކިއެކި ހަރަކާތްތަކުގެ ތެރެއިން ފޭސްބުކްއާއި އިންސްޓެގްރާމްގެ ވީޑިއޯ ޗެލެންޖެއް ކުރިއަށް ގެންދިއުމަށް އިޢުލާން ކުރެވުނު ކަމަށް ޓޫރިޒަމް މިނިސްޓްރީން ބުނެއެވެ.

މި އިވެންޓުގައި ޓޫރިޒަމް މިނިސްޓަރު ޑރ. ޢަބްދުﷲ މައުސޫމްގެ އިތުރުން ދިވެހިރާއްޖެއިން އިންޑިއާއަށް ކަނޑައަޅުއްވާފައި ހުންނަވާ ސަފީރު ޑރ. ޙުސައިން ނިޔާޒާއި މޯލްޑިވްސް މާރކެޓިންގް އެންޑް ޕަބްލިކް ރިލޭޝަންސް ކޯޕަރޭޝަންގެ މެނޭޖިންގް ޑިރެކްޓަރު ތޮއްޔިބް މުޙައްމަދާއި މިނިސްޓްރީ އޮފް ޓޫރިޒަމްގެ ޑެޕިއުޓީ މިނިސްޓަރު އަޙްމަދު ޢާޠިފްއާއި އިންޑަސްޓްރީގެ އިސްބޭފުޅުން ވާހަކަފުޅު ދެއްކެވިއެވެ.

މި އިވެންޓުގައި ދިވެހިރާއްޖޭގެ ފަރާތުން ބައިވެރިވި ޑެލިގޭޝަންގައި ސިވިލް އެވިއޭޝަން އޮތޯރިޓީ ޢާއިރީޖަނަލް އެއަރޕޯޓާއި ދިވެހިރާއްޖޭގައި އޮޕަރޭޓް ކުރަމުންދާ 04 އެއަރލައިން ކަމަށްވާ މޯލްޑިވިއަން ފްލައިމީ، މަންޓާ އެއަރ އަދި ޓްރާންސް މޯލްޑިވިއަން އެއަރވޭސް ހިމެނެއެވެ. އަދި ފަތުރުވެރިކަމާއި ގުޅުން ހުރި ޖަމްޢިއްޔާތަކުގެ ތެރެއިން މޯލްޑިވްސް ޓޫރިޒަމް ޑިވެލޮޕްމަންޓް ކޯޕަރޭޝަން "މަޓީ" އާއި ނޭޝަނަލް ހޮޓެލްސް އެންޑް ގެސްޓްހައުސް އެސޯސިއޭޝަން އޮފް މޯލްޑިވްސް އާއި ނޭޝަނަލް ބޯޓިންގް އެސޯސިއޭޝަން އޮފް މޯލްޑިވްސް އާއި މޯލްޑިވްސް އެސޯސިއޭޝަން އޮފް ޓްރެވަލް އޭޖެންޓްސް އެންޑް ޓުއަރ އޮޕަރޭޓަރޒް "މަޓާޓޯ" ވެސް ބައިވެރިވިއެވެ.

2021 ވަނަ އަހަރު ޒިޔާރަތް ކުރި ފަތުރުވެރިންގެ ތެރެއިން 22 އިންސައްތަ އަކީ އިންޑިއާގެ ފަތުރުވެރިންނެވެ. އަދި މިއަހަރު މިހާ ތަނަށް ރާއްޖެ އައި ފަތުރުވެރިންނަށް ބަލާއިރު އިންޑިއާގެ ހިއްސާ އަކީ 10 އިންސައްތަ އެވެ. އިންޑިއާ މާކެޓަކީ ރާއްޖެއަށް ވަރަށް ފުރުސަތު ފުޅާ މާކެޓެކެވެ. އަދި މިނިސްޓްރީ އޮފް ޓޫރިޒަމްއިން ކައިރި މުސްތަޤްބަލެއްގައި އިންޑިއާގެ ބައެއް ސަރަހައްދުތަކުން، އުތުރުގެ ބައިނަލްއަޤްވާމީ އެއަރޕޯޓްތަކަށް ފްލައިޓްތައް ފެށުމަށް މަސައްކަތް ކުރަމުންދާ ކަމަށް ވެސް އެމިނިސްޓްރީން ބުނެއެވެ.