މުދިމަށް ހަމަލާދިންކަމަށް ތުހުމަތު ކުރެވޭ މީހާ ޝަރީއަތް ނިމެންދެން ބަންދު
ހައްޔަރުކޮށްފައިވަނީ އުމުރުން 35 އަހަރުގެ ދިވެހި ފިރިހެން
މުދިމަށް ހަމަލާދިން ސަރަހައްދު
ތ. ދިޔަމިގިލީގައި މުދިމަކަށް ވަޅިން ހަމަލާދިންކަމަށް ތުހުމަތު ކުރެވޭ މީހާ ޝަރީއަތް ނިމެންދެން ބަންދު ކޮށްފިއެވެ.
ފުލުހުން ބުނީ އެ މައްސަލައާ ގުޅިގެން ހައްޔަރު ކޮށްފައިވާ އުމުރުން 35 އަހަރުގެ ދިވެހި ފިރިހެން މީހާގެ ބަންދާމެދު ގޮތެއް ނިންމުމަށް މަޑިފުށި މެޖިސްޓްރޭޓް ކޯޓަށް ހާޒިރު ކުރުމުން އޭނާ ޝަރީއަތް ނިމެންދެން ބަންދުގައި ބެހެއްޓުމަށް ކޯޓުން އަމުރު ކޮށްފައިވާ ކަމަށެވެ.
ފުލުހުން ބުނީ އަނިޔާ ލިބުނު، އުމުރުން 55 އަހަރުގެ ދިވެހި ފިރިހެން މީހާއަށް އައިޖީއެމް ހޮސްޕިޓަލުގައި ފަރުވާ ދެމުންދާ ކަމަށެވެ.
އާދިއްތަ ދުވަހުގެ ހެނދުނު 9:35 ހާއިރު ދިޔަމިގިލީ ތިންކޮޅުފުށި ސަރަހައްދުގައި ވަޅިން ހަމަލާދީ ޒަޚަމްކޮށްލާފައި ވަނީ އެރަށު މިސްކިތުގެ މުދިމަށެވެ.
މުދިމަކަށް ވަޅިން ހަމަލާދިންކަމަށް ތުހުމަތު ކުރެވޭ މީހާ ޝަރީއަތް ނިމެންދެން ބަންދުކޮށްފައިވާއިރު އޭނާ މުދިމަށް ހަމަލާދޭ މަންޒަރު ފެންނަ ވީޑިއޯއެއް ސޯޝަލް މީޑިއާގައި ވަނީ އާންމުވެފައެވެ. މި ވީޑިއޯ އިން ފެންނަ ގޮތުގައި އޭނާ ހުންނަނީ މުދިމާ ވާހަކަ ދައްކާށެވެ. އެއަށްފަހު ކުއްލިއަކަށް ވަޅިން ހަމަލާދޭތަން ފެނެއެވެ. އެތައް ފަހަރަކު ވަޅި ހެރުމަށްފަހު ބައިސްކަލެއްގެ މަތީގަ އިން މުދިމު ބިންމައްޗަށް ވެއްޓުމުން ދޫކޮށްލާފަދެއެވެ. ނަމަވެސް އޭނާ ދުރަށް ގޮސްފައެބުރި ގޮސް ދެވަނަ ފަހަރަށް ވެސް، ވަޅިން މުދިމަށް ހަމަލާދެއެވެ. އެއަށްފަހު އެ ހަމަލާ ދިނުމަށް ބޭނުންކުރި ވަޅީގައިހުރި ލޭތައް މަގުމަތީ އެއްޗެއްއަޅާފަހުރި ގޯންޏެއް ކަހަލަ އެއްޗެއްގައި ފޮހޭތަން ވެސް ވީޑިއޯ އިން ފެނެއެވެ.
މި މައްސަލަ ފުލުހުން މިހާރު ދަނީ ތަހުޤީޤު ކުރަމުންނެވެ.
