ސަލާމަތީ ގޮތުން ފުރިހަމަވާން ޖެހޭ ކަންކަން ގިނަ އުޅަނދުތަކުގައި ފުރިހަމަ ނުވެ ހުރޭ: ފުލުހުން

ސަލާމަތީ ގޮތުން ފުރިހަމަވާން ޖެހޭ ކަންކަން ގިނަ އުޅަނދުތަކުގައި ފުރިހަމަ ނުވެ ހުންނަ ކަމަށް ޗީފް ސްޕްރިންޓެންޑެންޓް އޮފް ޕޮލިސް އިބްރާހިމް އަދުނާން އަނީސް ވިދާޅުވެއްޖެއެވެ.

ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަދައްކަވަމުން އަދުނާން ވިދާޅުވީ މި މަހުގެ މިހާތަނަށް 133 އުޅަނދު ޗެކް ކުރިއިރު ލައިފްޖެކެޓް ނުހުންނަ މައްސަލައާއި އަދަދަށް ނުހުރުމާއި އެ ކޮލެޓީގައި ނުހުރުމާއި ރައްކާތެރިކުރުމަށްޓަކައި އަތް ނުފޯރާ ހިސާބުގައި ލައިފްޖެކެޓް ބަހައްޓާކަން ފާހަގަކުރެވިފައިވާ ކަމަށް ވިދާޅުވިއެވެ.

Advertisement

މިކަހަލަ ކަންތައްތައް ދިމާވުމުން ނަސޭހަތްތެރިވަމުންދާ ކަމަށާއި އޮންނަން ޖެހޭ ގޮތް ކިޔައިދިނުމުން ދެވަނަ ފަހަރަށް ޗެކް ކުރާއިރު ވަރަށް ގިނަ އުޅަނދުފަހަރުން އެކަންތައްތައް ރަނގަޅު ކުރާކަމަށް ވެސް އަދުނާން ވިދާޅުވިއެވެ.

އީދު ބަންދާއި ދިމާކޮށް އުޅަނދުފަހަރު އޮޕަރޭޓް ކުރާ މީހުންނާއި ވެރިންނަށް އަމާޒުކޮށް ޕްރޮގްރާމުތައް ހިންގާ ކަމަށް ވެސް އަދުނާން ވިދާޅުވިއެވެ.  

އަދި ދަތި ބައެއް ކަންކަން ހުންނަކަން ފާހަގަކުރައްވާ އަދުނާން ވިދާޅުވީ ޒަމާނަށް އަންނަ ބަދަލުތަކާއި ގުޅިގެން ވަސީލަތްތަކަށް ވެސް ބަދަލު އަންނަމުންދާ ކަމަށެވެ. އެގޮތުން ބައެއް އުޅަނދުތަކަށް ވަގުތުން އެ ވަސީލަތްތައް ހޯދުމަށް ދަތިވާ ކަމަށް ވެސް ވިދާޅުވިއެވެ.

އުޅަނދުތައް ޗެކު ކުރުމަށްޓަކައި ވަކި ޚާއްސަ ދުވަސްވަރެއް ނުބަލާކަން ފާހަގަކުރައްވާ އަދުނާން ވިދާޅުވީ އަބަދުވެސް އުޅަނދުތައް ފުލުހުން ޗެކު ކުރަމުންދާ ކަމަށެވެ.

ޕްރޮގްރާމުގައި ވާހަކަ ދައްކަވަމުން ސަބްއިންސްޕެކްޓަރ އޮފް ޕޮލިސް އަހުމަދު ޝަހީދު ވިދާޅުވީ ކަނޑުމަތީގެ ހާދިސާތައް މަދުކުރުމަށް ހޭލުންތެރި ކުރުމުގެ ޕްރޮގްރާމުތައް ހިންގާ ކަމަށާއި ބައެއް ކެޕްޓަނުންނާއި ފަޅުވެރިންނަށް ފަތަން ނޭނގޭ މީހުން ވެސް ތިބޭ ކަމަށެވެ. އަދި އެކަންތައްތަކަށް އެމީހުން ހޭލުންތެރި ކުރުވުމަށް މަސައްކަތް ކުރަމުންދާ ކަމަށެވެ.

ލައިސެންސް ނެތި ބައެއް އުޅަނދުފަހަރު މީހުން ދުއްވާއިރު ވެސް ކަނޑުމަތިން އެމީހުން ހިފައްޓާ، އެ ހާލަތެއްގައި އަޅަން ޖެހޭ ފިޔަވަޅުތައް އަޅުއްވާ ކަމަށް ޝަހީދު ވިދާޅުވިއެވެ.

ކަނޑުމަތީގެ ހާދިސާތައް އިތުރުވެގެން ދިޔުމާއި ގުޅިގެން 9 މީޓަރަށްވުރެ ކުދި އުޅަނދުފަހަރުގައި ދަތުރުކުރާއިރު ލައިފް ޖެކެޓު އެޅުން މަޖުބޫރުވާގޮތަށް ލައިފްޖެކެޓް އެޅުމާއި ބެހޭ ގަވާއިދަށް މިދިޔަ އަހަރު ވަނީ އިސްލާހު ގެނެސްފައެވެ.

އާންމު ދަތުރުފަތުރުގެ ގޮތުގައި ފެރީގެ ޚިދުމަތް ދިނުމަށާއި، މީހުން އުފުލާ ހުރިހާ އުޅަނދުފަހަރުގައި ލައިފްޖެކެޓް ފަސޭހައިން ބޭނުން ކުރެވޭގޮތަށް ބަހައްޓަން ވާނެ ކަމަށް ގަވައިދުގައި ވެއެވެ. އަދި އުޅަނދު ފުރުމުގެ ކުރިން ލައިފްޖެކެޓް ބޭނުންކުރާނެ ގޮތުގެ މައުލޫމާތު ފަސިންޖަރުންނަށް ފޯރުކޮށްދޭންވާނެ ކަމަށާއި، ދަތުރުމަތީގައި އެއްވެސް ބޭނުމެއްގައި ނޫނީ އެއްވެސް ހާލަތެއް މެދުވެރިވެގެން ފަސިންޖަރު ނުވަތަ ފަޅުވެރިން އުޅަނދުގެ ގެ ގަނޑުން ބޭރަށް ނުކުންނަންޖެހޭ ވަގުތުތަކުގައި ބޭރަށް ނުކުންނަންވާނީ ލައިފްޖެކެޓް އަޅައިގެން ކަމަށް ގަވައިދުގައިވެއެވެ.