އިންޑިއާގެ އެންމެ ބޮޑު ސްޓޭޓުން އިންތިހާބުގެ ގިނަ ވޯޓުތައް ލިބެމުންދަނީ މޯދީގެ ބީޖޭޕީއަށް

އުއްތަރު ޕްރަދޭޝްގެ ސްޓޭޓް އިންތިހާބުގެ މެޖޯރިޓީ ވޯޓު ލިބެމުންދަނީ އިންޑިއާގެ މިހާރުގެ ބޮޑުވަޒީރު ނަރެންދުރަ މޯދީގެ ބަރާތިޔާ ޖަނަތާ ޕާޓީ (ބީޖޭޕީ) އަށް ކަމަށް މީޑިއާތަކުން ރިޕޯޓުކޮށްފިއެވެ.

އިންޑިއާގެ މީޑިއާތަކުން އާންމުކޮށްފައިވާ މައުލޫމާތުތައް ދައްކާގޮތުން މިހާތަނަށް އާންމުކޮށްފައިވާ ވަގުތީ ނަތީޖާތަކުން ބީޖީޕީ އިން ވަނީ އުއްތަރު ޕްރަދޭޝްގެ 403 ގޮނޑީގެ ތެރެއިން 250 ގޮނޑި ކާމިޔާބުކޮށްފައެވެ. އަދި އެގައުމުގެ އިލެކްޝަންސް ކޮމިޝަނުން ވަނީ ބީޖޭޕީ އިން ވަނީ ގިނަ ގޮނޑިތަކެއް ކާމިޔަބުކޮށް ބާރުގައި އޮވެވޭނެކަން ކަށަވަރުކޮށްފައިވާކަމަށް ބުނެފައެވެ.

މި އިންތިހާބު ކާމިޔާބުކުރެވިއްޖެ ނަމަ 2024 ވަނަ އަހަރު އެގައުމުގައި އޮންނަ އާންމު އިންތިހާބު ކާމިޔާބު ކުރުމުގެ ފުރުސަތު ބީޖޭޕީއަށް ބޮޑުވާނެއެވެ. އުއްތަރު ޕްރަދޭޝް އަކީ އިންޑިއާގެ 1.35 ބިލިއަން މީހުންގެ އާބާދީގެ ފަސް ބައިކުޅަ އެއްބައި ދިރިއުޅެމުންދާ ސްޓޭޓެވެ.

މި ސްޓޭޓްގެ ބީޖޭޕީގެ ތަރުޖަމާން ރާކޭޝް ޓްރިޕަތީ ވަނީ މި އިންތިހާބު އެޕާޓީން ފަސޭހަކަމާއެކު ކާމިޔާބުކުރާނެ ކަމަށް ވިދާޅުވެފައެވެ.

އުއްތަރު ޕްރަދޭޝްއިން ބީޖޭޕީ މިހާ ބޮޑު ކާމިޔާބީއެއް ހޯދާފައި މިވަނީ ކޮވިޑް-19 އާއި ގުޅިގެން ސަރުކާރުން އަޅާފައިވާ ފިޔަވަޅުތަކާމެދު ވަރަށް ބޮޑަށް ފާޑުކިޔުން އަމާޒުވެފައިވާ ދަނޑިވަޅެއްގައެވެ. ނަމަވެސް އެޕާޓީން ވަނީ ބަލިމަޑުކަމުގެ ތެރޭގައި އެސަރަހައްދުގެ ފަގީރުންނަށް ހިލޭ ކާޑުގެ ބާވަތްތައް ފޯރުކޮށްދިނުމާއި ތަޅާލާފައިވާ މިސްކިތެއް ހުރި ތަނެއްގައި ބުދު ފައްޅިއެއް އަޅައި ހިންދޫންގެ ވޯޓު ކަށަވަރުކޮށްފައެވެ.

އިންޑިއާގައި މިހާރު ކުރިއަށްދާ ސްޓޭޓް އިންތިހާބުތަކުން ޕަންޖާބުގެ މެޖޯރިޓީ ގޮނޑިތައް ކާމިޔާބުކުރަމުންދަނީ އާމް އާދްމީ ޕާޓީންނެވެ. ނަމަވެސް އުއްތަރަޙާންދު، ގޯއާ އަދި މަނިޕޫރްގައި ކުރި ލިބެމުންދަނީ ބީޖޭޕީ އަށެވެ.