1،500 ޑޮލަރަށް ވިއްކާލާނީ ކިޑްނީތަ ނޫނީ އަންހެން ދަރިފުޅުތަ؟

މީގެ ހަ މަހެއްހާ ދުވަސްކުރިން އަފްޣާނިސްތާނުގެ ވެރިކަމާ ތޯލިބާނުން އަނެއްކާވެސް ވަނީ ހަވާލުވެފައެވެ. އެއާއެކު ފެނިގެން ދިޔައީ 20 އަހަރު ދުވަހުގެ ހަނގުރާމައިގެ ސަބަބުން ވީރާނާވެފައިވާ ގައުމުގެ ހާލަތު އިތުރަށް ގޯސްވާން ފެށި މަންޒަރެވެ. އިގްތިސާދީ ގޮތުންނާއި އިޖުތިމާއީ ގޮތުންވެސްމެއެވެ.

އަފްޣާނިސްތާނުގެ 38 މިލިއަން މީހުންގެ އާބާދީގެ ނުވަ މިލިއަނެއްހާ މީހުންނަކީ މިހާރު ވަޒީފާއެއް ނެތް، އާމްދަނީ ހޯދޭނެ ގޮތެއް ނެތި ތިބި މީހުންނެވެ. އެގައުމުގައި ހަރަކާތްތެރިވަމުން ދިޔަ އެމެރިކާ ސިފައިން، ގައުމުން ފައިބާ އެމެރިކާއިން އަފްޣާނިސްތާނާ ދެކޮޅަށް ދަތިކުރުމުގެ ފިޔަވަޅުތައް އަޅަންފެށުމާއެކު ބޭރުގެ ގައުމުތަކުން ލިބެމުން ދިޔަ އެހީތަށްވެސް މިހާރު ވަނީ މަދުވެފައެވެ.

ގޮތް ހުސްވެފައިވާ ރައްޔިތުންނަށް ވަނީ ދިރިހުރުމަށްޓަކައި އިތުރު ގޮތެއް ހޯދަން މަޖުބޫރުވެފައެވެ.

އަފްގާނިސްތާނުގެ ހީރަތު ޕްރޮވިންސްގެ ހުޅަނގުގެ ސިޓީއެއްގައި އޮންނަ އަވަށެއް ވަނީ ވަރަށް ތަފާތު ނަމަކުން މަޝްހޫރުވާން ފަށާފައެވެ. އެއީ "ވަން ކިޑްނީ ވިލެޖް" އެވެ. އަވަށުގެ ގިނަ ބަޔަކު މިހާރު ދިރިއުޅެމުން ދަނީ އެންމެ ކިޑްނީ އަކާއެކު އެވެ.

ފައިސާ ހޯދޭނެ ގޮތެއް ނެތި އެއަވަށުގެ މީހުން ވަނީ އަމިއްލަ ގުނަވަންތައް ވިއްކައިގެން ކައިބޮއި ހަދަން ފަށާފައެވެ. އެތައް ބަޔަކު އެމީހުންގެ ކިޑްނީ ވިއްކަމުންދާއިރު، މިކަން މިއީ އެމީހުންނަށް ލިބޭ ކުޑަ ކުޑަ ވަގުތީ ހައްލެކެވެ.

އުމުރުން އެންމެ 32 އަހަރުގެ ނޫރުއްދީން ވަޒީފާ އަދާކުރަމުން ދިޔައީ ފެކްޓްރީއެއްގައެވެ. ފެކްޓްރީން ދެމުން އައި މުސާރަވެސް މާ ގިނަ ދުވަސްތަކެއް ނުވެ މަހެއްގެ މައްޗަށް އެންމެ 30 ޑޮލަރަށް ކުޑަކުރުމުން ފެކްޓްރީގެ ވަޒީފާއިން ވަކިވެ އެއަށް ވުރެ މުސާރަ ބޮޑު ވަޒީފާއެއް ހޯދަން އޭނާ މަސައްކަތް ކުރިއެވެ. ނަމަވެސް ގައުމުގައި ވަޒީފާ ނެތް މީހުންގެ އަދަދު ގިނަކަމުން އައު ވަޒީފާއެއް ނޫރުއްދީނަކަށް ނުލިބުނެވެ.

ވަޒީފާއެއް ނުލިބި ގިނަ ދުވަސް ވާން ފެށުމާއެކު ނޫރުއްދީން ގޮތް ހުސްވިއެވެ. ހަދާނެ އިތުރުގޮތެއް ނެތުމުން ވަގުތީ ހައްލެއް ހޯދުމަށް ނޫރުއްދީން ނިންމީ އޭނާގެ ކިޑްނީ ވިއްކާލާށެވެ. މަޖުބޫރީ ހާލަތުގައި ދަރިންނަށްޓަކައި ނޫރުއްދީން ނިންމި މި ނިންމުން މާ ރަނގަޅު ނިންމުމަކަށް ނުވިއެވެ.

ކިޑްނީ ވިއްކާލި ފަހުން ނޫރުއްދީން މިހާރު ވަރަށް ބައްޔެވެ. އަތުން ބަރު އެއްޗެއް ނުއުފުލެއެވެ. މަސައްކަތެއް ނުކުރެވެއެވެ. އޭނާގެ އާއިލާ ކައިބޮއި ހަދަނީ އުމުރުން އެންމެ 12 އަހަރުގެ ފިރިހެން ދަރިފުޅު، މީހުންގެ ބޫޓު ސާފުކޮށްގެން ހޯދާ މަދު ފައިސާ ކޮޅުންނެވެ.

ފަގީރުކަމުން އަރައިގަނެވޭނެ ކަމުގެ އުންމީދުގައި އާއިލާއެއްގެ ފަސް ފިރިހެންކުދިން ވަނީ ހަތަރު އަހަރުގެ މަތިން ކޮންމެ ކުއްޖަކު ކިޑްނީއެއް ވިއްކާފައެވެ. ނަމަވެސް މި ފަސް ބެއިންނަށް ފަގީރުކަމުން އަރައެއް ނުގަނެވުނެވެ. އަދިވެސް ދިރިއުޅެމުންދަނީ އެތައް ބައިވަރު ދަރަންޏެއް ބޮލުގައި އަޅައިގެންނެވެ.

ތާލީބާނުން ވެރިކަމާ ހަވާލުވިތާ މާގިނަ ދުވަސްތަކެއް ނުވެ އުމުރުން އެންމެ 19 އަހަރުގައި ދެކުދިންގެ މަންމަ، ޝަކީލާވެސް ވަނީ އޭނާގެ ކިޑްނީ ވިއްކާލާފައެވެ. ކިޑްނީ ވިއްކާލީ އެންމެ 1،500 ޑޮލަރަށެވެ. މިފައިސާގެ ބޮޑު ބައެއް ހަރަދުވެގެން ދިޔައީ އާއިލާގެ ދަރަނި އަދާކުރުމަށެވެ.

ތިން ދަރިންގެ މަންމަ، އައީޝާ މިހާރު އިންތިޒާރު ކުރަމުން އެދަނީ އޭނާގެ ކިޑްނީ ވިއްކާލެވޭނެ ދުވަހަކަށެވެ. އޭނާގެ ދަރިން ސަލާން ޖަހަމުން މަގުމަތީގައި ދުވާއިރު، އޭނާއަށް އޮތް ހަމައެކަނި އުންމީދަކީ އޭނާގެ ކިޑްނީއާ މެޗްވާ މީހަކާ ދިމާވެ ކިޑްނީ ވިއްކާލުމުގެ ފުރުސަތު ލިބުމެވެ. ނޫނީ އައީޝާ އަށް އޭނާގެ އެއް އަހަރުގެ އަންހެން ދަރިފުޅު ވިއްކާލަން މަޖުބޫރުވާނެ ކަމަށް އޭނާ ކިޔައިދިނެވެ.

ރަނގަޅު ސިއްހީ ވަސީލަތްތަކާއި ރަނގަޅު ސިއްހީ ހިދުމަތާއެކު ކިޑްނީ ޓްރާންސްޕްލާންޓް ކުރާ މީހުންނަށް މާ ބޮޑެތި ދަތިތަކަކާ ނުލައި ދިރުއުޅެވެއެވެ. ސިއްހީގޮތުންވެސް މާބޮޑެތި ގެއްލުންތަކެއް އެމީހުންނަކަށް ނުވެއެވެ. ނަމަވެސް އަފްގާނިސްތާނުގައި ކިޑްނީ ވިއްކާ މީހުންނަށް އެމީހުންގެ ކިޑްނީ ވިއްކާލުމަށްފަހު ލިބެންޖެހޭ އެންމެ ރަނގަޅު ފަރުވާއެއް ނުލިބެއެވެ. މީގެ ސަބަބުން އިތުރު ގިނަ ސިއްހީ މައްސަލަ ތަކަކާ އެމީހުން ކުރިމަތިލާންޖެހެއެވެ.އަދި އިތުރު ދަރަނިތައް ފުނިޖެހެއެވެ.