އިދާރީ މަސައްކަތެއް ނުނިމިގެން ޕާކިންގ ސްލޮޓްގެ ގުރުއަތުނެގުން ކެންސަލްކޮށްފިއެވެ.

މާލޭ ސިޓީ ކައުންސިލުން ބުނީ މާލޭގައި ތަރައްގީކޮށްފައިވާ 211 ޕާކިންގ ސްލޮޓްގެ ގުރުއަތުލުން އަންގާރަ ދުވަހުގެ ރޭ ބޭއްވުމަށް ކުރިން ހަމަޖެއްސި ނަމަވެސް އެ ގުރުއަތުލުން އިދާރީ ގޮތުން ނިންމަންޖެހޭ ކަންކަން ނިންމުމަށްޓަކައި 05 ޖެނުއަރީ 2022 ވާ ބުދަ ދުވަހު ބޭއްވުމަށް ލަސްކުރެވިފައިވާ ކަމަށެވެ. ދިމާވީ ކޮން އިދާރީ މައްސަލައެއް ކަމެއް ހާމަކޮށްފައެއް ނުވެއެވެ.

ސިޓީ ކައުންސިލުން ކުރިން ކުރި އިއުލާނުގައި ބުނީ، އަލުން ގުރުނެގުން އޮންނާނީ އަންގާރަ ދުވަހުގެރޭ 9:00ގައި ކައުންސިލްގެ އާންމު ޚިދުމަތްތަކާބެހޭ ބައިގައިކަމަށެވެ. އަދި ޕާކިންގ ސްލޮޓްތަކަށް އެދި އެޕްލިކޭޝަން ހުށަހެޅި ހުރިހާ އެންމެންނަށް ގުރުއަތު ލުމުގައި އަމަލީ ގޮތުން ބައިވެރިވުމަށް ދައުވަތު ދޭ ކަމަށެވެ.

މާލޭ ސިޓީ ކައުންސިލްގެ މޭޔަރ ޑރ. މުހައްމަދު މުއިއްޒު މީގެކުރިން ސަންއަށް ދެއްވި އިންޓަވިއުއެއްގައި ވިދާޅުވީ، ގުރުނެގުމުގައި ގަބޫލުކުރެވޭ މައްސަލަތައް ހުރި ކަމަށެވެ. އެގޮތުން އިދާރީ މައްސަލަތައް ގިނަކަމަށާއި، ރަނގަޅު ކުރަން ޖެހޭ ކަންތައްތަކެއް ހުރިކަމަށް އޭސީސީން ބުނެފައިވާ ކަމަށެވެ. އެހެންނަމަވެސް ކޮރަޕްޝަންގެ މައްސަލަތައް ހުރިކަމަށް ބުނެފައެއް ނެތް ކަމަށާއި، އަލުން ގުރުއަތުލުން ބޭއްވުމަށް ބުނެފައިވާ ކަމަށެވެ.

ކުރިން ބަރާބަރަށް ފައިސާ ދައްކަމުން އައި ބައެއް ޕާކިންގ ސްލޮޓުތަކުގެ ވެރިންނަށް، އޮޓޮމެޓިކުން ޖާގަ ލިބޭ ގޮތަށް އޮތް ނަމަވެސް، އެ މީހުންގެ ނަންބަރުތައް ވެސް ގުރުއަތުގައި ހިމެނުނު ކަމަށް މުއިއްޒު ވިދާޅުވިއެވެ. ހަމައެހެންމެ ފުރަތަމަ ދޫކުރި ސްލިޕްތަކުގައި ސްލިޕް ނަންބަރު ޖެހިފައި ނުވާކަމަށާއި އެހެންނަމަވެސް ސިޓީ ކައުންސިލުން ފޯމު ބަލައިގަތުމަށްފަހު އެކައުންޓު ފޮތުގައި ސްލިޕް ނަންބަރު ނޯޓުކޮށްފައިވާ ކަމަށް މުއިއްޒު ވިދާޅުވިއެވެ.

މާލޭ ސިޓީ ކައުންސިލުން އިއުލާނު ކޮށްފައިވާ ޕާކިންގ ސްލޮޓްތަކުގެ ގުރުއަތުލުން ބާއްވާފައިވާއިރު, މި ގުރުލުން ކުރިއަށް ދިޔަ ގޮތާމެދު ވަރަށް ގިނަ ބަޔެއްގެ ހިތުގައި ވަނީ ސުވާލު އުފެދިފައެވެ. އަދި ޕާކިންގ ސްލޮޓްތަކުގެ ގުރުނެގުން ކުރިއަށް ގެންދިޔަ އުސޫލާމެދު ވެސް ހިތްހަމަނުޖެހުންތަކެއް ވަނީ އުފެދިފައެވެ. އޭރު މި މައްސަލަ ވަނީ އޭސީސީއަށް ވެސް ހުށަހަޅާފައެވެ.

211 ސްލޮޓަށް 969 މީހަކު ކުރިމަތިލާފައިވާއިރު މި ސްލޮޓްތަކަށް ކުރިމަތިލި ކޮންމެ ފަރާތަކަށް ވެސް ސްލިޕެއް ހަވާލުކުރި ކަމަށް މާލޭ ސިޓީ ކައުންސިލުން ވަނީ ބުނެފައެވެ. ގުރުއަތު ނެގުމަށް ބޭނުންކޮށްފައިވަނީ މި ސްލިޕް ނަންބަރުތައް ކަމަށް ވެސް އެ ކައުންސިލުން ވަނީ ބުނެފައެވެ.

ބައެއް މީހުންނަށް ސްލިޕް ދޫކުރިއިރު ފޯމް ނަންބަރު ކައުންސިލުގެ ފަރާތުން ޖަހާފައި ނެތް މައްސަލަ ވެސް ވަނީ ފެންމަތިވެފައެވެ. އަދި މިފަދަ ގިނަ ސްލިޕްތަކެއް ވަނީ ސޯޝަލް މީޑިއާގައި ދައުރުވެފައެވެ. މިކަމާ ގުޅިގެން މާލޭ ސިޓީ ކައުންސިލްގެ ޑެޕިއުޓީ މޭޔަރ އަހުމަދު ނަރީޝް ވިދާޅުވީ, ނަންބަރުތައް ނެތް ސްލިޕް ހުރެދާނެ ކަމަށެވެ.

މި ސްލޮޓްތަކާ ގުޅޭގޮތުން މާލޭ ސިޓީ ކައުންސިލްގެ މޭޔަރ ޑރ. ވިދާޅުވީ، މާލޭ ސިޓީ ކައުންސިލާއި އެ ސްލޮޓް ލިބޭ ފަރާތަކާމެދު ހެދޭ އެއްބަސްވުމެއްގެ ދަށުން، އެ ސްލޮޓަކީ އެ ވެހިކަލްގެ ގަރާޖުގެ ގޮތުގައި ކަނޑައެޅިގެންދާނެ ކަމަށެވެ. އަދި މިގޮތަށް ކަނޑައެޅުމަށް 25،000ރ. ކުލީގެ ގޮތުގައި ނަގާނެ ކަމަށް ޑރ. މުއިއްޒު ވިދާޅުވިއެވެ.

މި ސްލޮޓަކީ އެ އުޅަނދެއް ދެމިއޮތްހާ ހިނދަކު އޮންނާނެ ސްލޮޓެއް ކަމަށެވެ. އެއީ މުސްތަގުބަލުގައި ހަދާ ޕާކިންގ ސްލޮޓަކުން ކަމަށް ވިޔަސް އެމީހަކަށް އެ ސްލޮޓް ކަށަވަރުވެފައި އޮންނާނެ ކަމަށް ޑރ. މުއިއްޒު ވިދާޅުވިއެވެ.