ޕާކިން ސްލޮޓުގެ އިއުލާނުތައް ބާތިލުކޮށް، އަލުން އިއުލާނު ކުރަނީ

މާލޭގައި ތަރައްޤީ ކޮށްފައިވާ 211 ޕާކިން ސްލޮޓަށް އެދި ހުޅުވާލާފައިވާ އިޢުލާންތައް ބާތިލުކޮށް، އަލުން ޕާކިން ސްލޮޓްތަކަށް އެދި ހުށަހެޅުމުގެ ފުރުސަތު އަނެއްކާވެސް ހުޅުވާލަން ނިންމައިފިއެވެ.

އެކަމާ ގުޅޭގޮތުން މާލޭ ސިޓީ ކައުންސިލުން ބުނީ، އެ ކައުންސިލްގެ ފަރާތުން މާލޭގައި ތަރައްޤީކޮށްފައިވާ 211 ޕާކިން ސްލޮޓަށް ކުރިމަތި ލާފައިވާ ފަރާތްތަކުގެ މެދުގައި 05 ޖަނަވަރީ 2022 ވާ ބުދަ ދުވަހުގެ ރޭ ބާއްވަން ހަމަޖެހިފައިވާ ގުރުއަތު ނެގުން ބާތިލް ކޮށްފައިވާ ކަމަށެވެ.

މާލޭ ސިޓީ ކައުންސިލުން އިއުލާނު ކޮށްފައިވާ ޕާކިން ސްލޮޓްތަކުގެ ގުރުލުން ކުރިއަށް ދިޔަ ގޮތާމެދު ވަރަށް ގިނަ ބަޔެއްގެ ހިތުގައި ވަނީ ސުވާލު އުފެދިފައެވެ. އަދި ޕާކިން ސްލޮޓްތަކުގެ ގުރުނެގުން ކުރިއަށް ގެންދިޔަ އުސޫލާމެދު ވެސް ހިތްހަމަ ނުޖެހުންތަކެއް ވަނީ އުފެދިފައެވެ. އޭރު މި މައްސަލަ ވަނީ އޭސީސީއަށް ވެސް ހުށަހަޅާފައެވެ. އަދި އޭސީސީން އަލުން ގުރުއަތު ނެގުމަށް އެންގުމާއެކު، ފަހުންވެސް ގުރުއަތު ނެގުން ތާވަލު ކުރިއެވެ. ނަމަވެސް އިދާރީ މަސައްކަތެއް ނުނިމިގެން ޕާކިން ސްލޮޓްގެ ގުރުއަތު ނެގުން ކެންސަލް ކުރުމަށްފަހު އަނެއްކާވެސް ގުރުއަތު ނެގުން އޮތް ދުވަހު މިވަނީ އިއުލާނު މުޅިން ބާތިލުކޮށް އަލުން ހުޅުވާލުމަށް ނިންމާފައެވެ.

އެކަމާ ގުޅޭގޮތުން ސިޓީ ކައުންސިލުން ބުނީ، ޕާކިން ސްލޮޓްތަކަށް ކުރިމަތި ލާފައިވާ ފަރާތްތަކުން ހުށަހަޅާފައިވާ ލިޔެކިޔުން ތަކުގައި އިދާރީގޮތުން އޮޅުން ތަކެއް އަރާފައިވާކަން ފާހަގަކޮށް، ޕާކިން ސްލޮޓްތައް ދޫކުރުމުގެ މަސައްކަތް އަލުން އިޢުލާން ކޮށްގެން ކުރިޔަށް ގެންދިއުމަށް އެންޓި ކޮރަޕްޝަން ކޮމިޝަނުން ސިޓީއަކުން ކައުންސިލަށް އަންގާފައިވާކަމަށެވެ. އެއާއެކު، ޕާކިން ސްލޮޓަށް ކުރިމަތިލުމަށް ކޮށްފައިވާ އިޢުލާންތައް ބާތިލް ކޮށް އަލުން ޕާކިން ސްލޮޓްތަކަށް އެދި ހުށަހެޅުމުގެ ފުރުސަތު ހުޅުވާލުމަށް ހަމަޖެހިފައިވާކަމަށް ސިޓީ ކައުންސިލުން ބުނެއެވެ.

މާލެ ސިޓީ ކައުންސިލުން ވަނީ މިހާރު ހުޅުވާލެވިފައިވާ 211 ޕާކިން ސްލޮޓަށް އަލުން އެޕްލިކޭޝަން ހުށަހެޅުމުގެ ފުރުސަތު ހުޅުވާލާނެ ކަމަށް ބުނެފައެވެ.

211 ސްލޮޓަށް 969 މީހަކު ކުރިމަތިލާފައި ވާއިރު، މި ސްލޮޓްތަކަށް ކުރިމަތިލި ކޮންމެ ފަރާތަކަށް ވެސް ސްލިޕެއް ހަވާލުކުރި ކަމަށް މާލޭ ސިޓީ ކައުންސިލުން ވަނީ ބުނެފައެވެ. ގުރުއަތު ނެގުމަށް ބޭނުން ކޮށްފައިވަނީ މި ސްލިޕް ނަންބަރުތައް ކަމަށް ވެސް އެ ކައުންސިލުން ވަނީ ބުނެފައެވެ.

ބައެއް މީހުންނަށް ސްލިޕް ދޫކުރިއިރު ފޯމް ނަންބަރު ކައުންސިލުގެ ފަރާތުން ޖަހާފައި ނެތް މައްސަލަ ވެސް ވަނީ ފެންމަތިވެފައެވެ. އަދި މިފަދަ ގިނަ ސްލިޕްތަކެއް ވަނީ ސޯޝަލް މީޑިއާގައި ދައުރު ވެފައެވެ. މިކަމާ ގުޅިގެން މާލޭ ސިޓީ ކައުންސިލްގެ ޑެޕިއުޓީ މޭޔަރު އަހުމަދު ނަރީޝް ވިދާޅުވީ, ނަންބަރުތައް ނެތް ސްލިޕް ހުރެދާނެ ކަމަށެވެ.

މި ސްލޮޓްތަކާ ގުޅޭގޮތުން މާލޭ ސިޓީ ކައުންސިލްގެ މޭޔަރު ޑރ.މުޢީޒު ވިދާޅުވީ، މާލޭ ސިޓީ ކައުންސިލާއި އެ ސްލޮޓް ލިބޭ ފަރާތަކާމެދު ހެދޭ އެއްބަސް ވުމެއްގެ ދަށުން، އެ ސްލޮޓަކީ އެ ވެހިކަލްގެ ގަރާޖުގެ ގޮތުގައި ކަނޑައެޅިގެންދާނެ ކަމަށެވެ. އަދި މިގޮތަށް ކަނޑައެޅުމަށް 25،000ރ. ކުލީގެ ގޮތުގައި ނަގާނެ ކަމަށް ޑރ. މުއިއްޒު ވިދާޅުވިއެވެ.

މި ސްލޮޓަކީ އެ އުޅަނދެއް ދެމިއޮތްހާ ހިނދަކު އޮންނާނެ ސްލޮޓެކެވެ. އެއީ މުސްތަގުބަލުގައި ހަދާ ޕާކިން ސްލޮޓަކުން ކަމަށް ވިޔަސް އެމީހަކަށް އެ ސްލޮޓް ކަށަވަރުވެފައި އޮންނާނެ ކަމަށް ޑރ. މުއިއްޒު ވިދާޅުވިއެވެ.