ސިއްހީ ޚިދުމަތްދޭ ހުރިހާ ތާކުން ޑްރަގްގެ ފަރުވާ ލިބެން ޖެހޭ: ހެލްތު މިނިސްޓަރ
5 މާރިޗު 2022 | ހޮނިހިރު 07:31ފުރަތަމަ ކުއާޓަރ ނިމޭއިރު ޕްރައިމަރީ ހެލްތު ކެއަރގެ ޕްރޮގްރާމްތައް ފައްޓާނަން
ހެލްތު މިނިސްޓަރ އަހުމަދު ނަސީމް
ރާއްޖޭގައި ހުރި ހުރިހާ ސިއްހީ މުއައްސަސާއެއް ޑްރަގް ރިހެބިލިޓޭޝަން ކަންތައްތަކުގައި ބޭނުން ކުރަންޖެހޭ ކަމަށް ހެލްތު މިނިސްޓަރ އަހްމަދު ނަސީމް ވިދާޅުވެއްޖެއެވެ.
މޯލްޑިވްސް ކަރެކްޝަނަލް ސަރވިސް (އެމްސީއެސް)ގެ މާފުށީ ޖަލުގައި ފުރަތަމަ ފަހަރަށް ގައިދީންނަށް ޑްރަގް ރިހެބިލިޓޭޝަން ޕްރޮގްރާމް ފެށުމަށް ބޭއްވި ރަސްމިއްޔާތުގައި ނަސީމް ވިދާޅުވީ, އެފަދަ މީހުންނަށް ފުރިހަމައަށް ފަރުވާ ދިނުމުގެ ގާބިލުކަން ނެތްކަމަށެވެ. ކިއުބާއާއި އޮސްޓްރޭލިއާ އަދި އެމެރިކާ ސަރުކާރުން ފަންނީ ބޭފުޅުންގެ އެހީތެރިކަމަށް އެދިވަޑައިގެންފައި ވާނެކަމަށާއި ދެވަނަ ކުއާޓަރގައި އެމީހުން އަންނާނެ ކަމަށް ބެލެވޭ ކަމަށް ނަސީމް ވިދާޅުވިއެވެ.
ޑްރަގްގެ މީހުން ތިބި ކޮންމެ ތަނެއްގައި އެމީހުންނަށް ފަރުވާ ދޭން ބޭނުންވާކަން ފާހަގަކުރައްވައި މިނިސްޓަރ ވިދާޅުވީ, ފުރަތަމަ ކުއާޓަރ ނިމޭއިރު ޕްރައިމަރީ ހެލްތު ކެއަރގެ ޕްރޮގްރާމްތައް ފައްޓަވާނެ ކަމަށެވެ. އޭރުން 86 ހެލްތު ފެސިލިޓީގައި މިކަން ފެށޭނެ ކަމަށެވެ.
ބޭނުންވާ ވަރަށް ކައުންސިލިންނަށާއި ސޯޝަލް ސަރވިސްތަކުގައި މީހުން މަސައްކަތް ނުކުރާތީ އެކަމުގެ ކަންބޮޑުވުން ހިއްސާކުރައްވައި ނަސީމް ވިދާޅުވީ, ވަރަށް ގިނަ މީހުން މި ދާއިރާއިން ތައުލީމް ހާސިލްކޮށްފައިވާ ކަމަށެވެ. އެހެންނަމަވެސް މިފަދަ މަސައްކަތްތަކުގައި މިނިސްޓްރީއާ ނުގުޅޭތީ އެކަމުގެ ދިރާސާއެއް ކުރަމުން އަންނަ ކަމަށް ވެސް ވިދާޅުވިއެވެ.
ކުދިން ރިހެބިލޭޓް ކުރިޔަސް މިކަމުން ހައްލެއް ނެތްކަމަށާއި މުޖުތަމައު ހޭލުންތެރިކުރުވަން ޖެހޭކަމަށް މިނިސްޓަރ ވިދާޅުވިއެވެ.
މިނިސްޓަރ މިފަދައިން ވިދާޅުވެފައިވާއިރު, ޑްރަގް ނެޓްވޯރކުތައް ހުއްޓުވުމަށް ސަރުކާރުގެ ހުރިހާ ވަސީލަތެއް ބޭނުން ކުރައްވާނެކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވަނީ ރިޔާސީ ބަޔާނުގައި ވެސް ވިދާޅުވެފައެވެ.
ރައީސް ވިދާޅުވީ، ކޮވިޑްގެ ހާލަތާއި ގުޅިގެން ޑްރަގްގެ ހާލަތު އިތުރަށް ގޯސްވި ކަމަށެވެ. އެގޮތުން މަސްތުވާތަކެއްޗަކީ އޭގައި ވަރަށް ބޮޑު ބެކްގްރައުންޑެއް އޮންނަ، އިންތިޒާމްވެ ގުޅިގެން ހިންގާ, ބައިނަލްއަގުވާމީ ބޮޑު ވިޔަފާރި އެއްކަން ފާހަގަކުރައްވައި ރައީސް ވިދާޅުވީ، އެ ދޮރުތައް ބަންދުކޮށް، ޑްރަގް ވިޔަފާރި ހުއްޓުވުމަކީ އިންތިހާއަށް ގޮންޖެހުން ބޮޑު ކަމެއްކަމަށެވެ.
އެހެންނަމަވެސް އެމަސައްކަތުގައި ދޫވެފައި ހުރި ގޮށްތައް ބާރު ކުރައްވައި، އެކަންކަމަށް ހުޅުވާ ދޮރުތައް ބަންދުކުރައްވައި، އެމީހުން ހުއްޓުވުމަށް ސަރުކާރުގެ ހުރިހާ ވަސީލަތެއް ބޭނުންކުރައްވާނެ ކަމުގެ ޔަގީންކަން ރައީސް ސާލިހު ދެއްވިއެވެ.
ރައީސް ވިދާޅުވީ، އެކަމަށްޓަކައި ކަމާބެހޭ ޓާސްކް ފޯސް އެކުލަވާލެވި، ކުރަންޖެހޭ ކަންކަން ސަރުކާރުން ކުރަމުންދާ ކަމަށެވެ. ރައީސް ވަނީ މިބަދަލުތަކުގެ ހެޔޮ ނަތީޖާ ފެންނާނެކަމަށް ވިދާޅުވެފައެވެ.
ޑްރަގާ ގުޅުންހުރި ކުށްތަކާއި ފަރުވާ ބޭނުންވާ ފަރާތްތައް ގިނަކަން ފާހަގަކުރެވޭ ސަރަހައްދުތަކުގައި، ފަރުވާގެ މަރުކަޒުތައް އަލުން ފެށިފައިވާކަމަށްވެސް ރައީސް ވިދާޅުވިއެވެ.
އެއާއެކު ރަށު ކައުންސިލްތަކާއި ސިއްހީ މަރުކަޒުގެ ބެލުމުގެ ދަށުން, ރަށުގައި ހުރެގެން ފަރުވާ ހޯދޭނެ ބަދަލެއްވެސް މިއަހަރު އެޕްރީލްގެ ކުރިން ފެށޭނެކަން ރައީސް ވަނީ އުފަލާއެކު ފާހަގަކުރައްވާފައެވެ.
މޯލްޑިވްސް ކަރެކްޝަނަލް ސަރވިސް (އެމްސީއެސް)ގެ މާފުށީ ޖަލުގައި ފުރަތަމަ ފަހަރަށް ގައިދީންނަށް ޑްރަގް ރިހެބިލިޓޭޝަން ޕްރޮގްރާމެއް ވެސް ވަނީ ފަށާފައެވެ.
