"ޕީޖީ އޮފީހުގެ މުވައްޒަފުންނަކީ، އެމީހުންގެ ސިކުނޑީގެ ހުނަރު ވިއްކައިގެން، ކައިގެން ބޮއިގެން އުޅޭ ބައެއް"

ޕީޖީ އޮފީހުގެ މުވައްޒަފުންނަކީ، އެމީހުންގެ ސިކުނޑީގެ ހުނަރު ވިއްކައިގެން، ކައިގެން ބޮއިގެން އުޅޭ ބައެއްކަމަށް ޕްރޮސެކިއުޓަރ ޖެނެރަލް ހުސައިން ޝަމީމް ވިދާޅުވެއްޖެއެވެ.

ޕީޖީ ޝަމީމް އެހެން ވިދާޅުވީ ބަންޑާރަ ނައިބު އޮފީހުގެ ރެކްރިއޭޝަން ކުލަބް، ބަންޑާރަ ކުލަބުން އިސްނަގައިގެން މިހާރު ކުރިއަށްގެންދާ "ބަންޑާރަ ކަޕް" ފުޓްސެލް މުބާރާތާ ގުޅޭގޮތުން އޭނާގެ ބްލޮގްގައި ޝާއިއުކުރެއްވި ލިއުމެއްގައެވެ.

ޝަމީމް ވިދާޅުވާ ގޮތުގައި މިމުބާރާތުން ދެކަމެއް ހާސިލުވެއެވެ.

އެއްކަމަކީ އިޖުތިމާއީ ގުޅުންތަކުގެ ތެރެއިން ކަންކަން ހައްލުކުރުމުގެ ފުރުސަތު ލިބިގެން ދިއުމެވެ. އަދި ދެވަނަ ކަމަކީ، ކުޅިވަރުން ދަސްކޮށްދޭ ގިނަގުނަ ކަންކަމެވެ. އެގޮތުން ކުޅިވަރަކީ އެތައް ކަމެއް ދަސްކޮށްދޭ ބާރުގަދަ އިޖްތިމާއީ ހަރަކާތެއްކަން ފާހަގަ ކުރައްވައި ޝަމީމް ވަނީ, ކުޅިވަރުގެ ތެރެއިން ދަސްވާ ކަމަކީ، ޓީމެއްގެ ގޮތުގައި މަސައްކަތްކޮށް ކާމިޔާބު ހާސިލުކުރުން ކަމަށް ވިދާޅުވެފައެވެ.

ޝަމީމް ވިދާޅުވީ، ޕީޖީ އޮފީހުގެ ފިރިހެން ޓީމު މިހާރު ވަނީ ކާމިޔާބުކަމާއެކު، ގްރޫޕުގެ އެއްވަނަ ޓީމުގެ ގޮތުގައި ދެވަނަ ބުރަށް ގޮސްފައި ކަމަށެވެ.

އަދި އަމާޒަކީ ކުޅިވަރާއި ދުޅަހެޔޮކޮށް ތިބުމުގެ ސަގާފަތެއް އޮފީހުގައި އާލާކުރުންކަން ފާހަގަ ކުރައްވައި ޝަމީމް ވިދާޅުވީ، ސިފައިންނާއި ފުލުހުންގެ ވަޒީފާގައި ތިބޭ މީހުން ބީއެފްޓީ (ބޭސިކް ފިޓްނަސް ޓެސްޓް) ހަދަންޖެހޭ ގޮތަށް، ޕީޖީ އޮފީހުގެ މުވައްޒަފުނަށްވެސް ޓެސްޓެއް ތަައާރަފުކޮށް، އަހަރަކު އެއްފަހަރު އެ ޓެސްޓުން ފާސްވާންޖެހޭ ގޮތަށް ހަދައި، ދުޅަހެޔޮ ލައިފްސްޓައިލަކަށް މަގުފަހިކުރެވޭނެ ގޮތްތަކަކާމެދު މަޝްވަރާތައް ކުރައްވަމުން ގެންދަވާކަމަށެވެ.

އޭގެ އިތުރުން، ޕީޖީ އޮފީހުގެ މުވައްޒަފުންނަކީ، އެމީހުންގެ ސިކުނޑީގެ ހުނަރު ވިއްކައިގެން، ކައިގެން ބޮއިގެން އުޅޭ ބައެއްކަން ފާހަގަ ކުރައްވައި ޝަމީމް ވިދާޅުވީ، ސިކުނޑީގެ ދުޅަހެޔޮކަން އިތުރުކޮށް، ނަފްސާނީ ބަލިތަކުން ދުރުވެ ތިބުމަށްޓަކައި، ހަށިގަނޑުގެ ދުޅަހެޔޮކަމަކީ ކޮންމެހެން ފުރިހަމަވާންޖެހޭ އަސާސީ ކަމެއް ކަމަށެވެ. އެގޮތުން ދުޅަހެޔޮ ސިއްހަތެއްގައި ތިބުމުގެ ސަގާފަތެއް އާލާވުމުން އެކަމުގެ ފައިދާ، އޮފީހަށާއި، މުވައްޒަފަށާއި، މުވައްޒަފުގެ އާއިލާއަށްވެސް ކުރާނެކަމަށެވެ.

ޝަމީމް ވަނީ, ބަންޑާރަ ކަޕަކީ، އެމަގަށް ވާސިލުވުމަށް ކޮށުނު މަގެއް ކަމަށް ބަލައިގެން، ހުރިހާ އިދާރާއަކުން މަސައްކަތް ކޮށްފިނަމަ، މިއީ އަހަރަކު އެއްފަހަރު ބާއްވާ ފުޓްސަލް މުބާރާތަކަށްވުރެ މާ ބޮޑު ކަމަކަށްވާނެކަމަށް ވިދާޅުވެފައެވެ. 

މުބާރާތުގައި ގްރޫޕް ސްޓޭޖް ނިމުނުއިރު، ފިރިހެން ބައިގައި ބައިވެރިވި 16 ޓީމުގެ ތެރެއިން 8 ޓީމު ދެވަނަބުރަށް ގޮސް، 8 ޓީމު ބަލިވެގެން މި މުބާރާތުން ކަޓާފައިވާކަމަށް ޝަމީމް ވިދާޅުވިއެވެ.

މިމުބާރާތުގައި، މާލޭގައި ހުރި ހުރިހާ ކޯޓުތަކަކުންނާއި، ބައެއް ޕްރައިވެޓް ލޯ ފަރމްތަކުންވެސް ބައިވެރިވެއެވެ.