މޯލްޑިވްސް އިންޑަސްޓްރިއަލް ފިޝަރީޒް ކޮންޕެނީގެ (މިފްކޯ)އިން ދުނިޔޭގެ ބާޒާރުގެ އަގުތަކަށް ބަލައި ކަނޑުމަހާއި ކަންނެލި ކިލޯއެއް ގަންނަ އަގު ބޮޑުކޮށްފިއެވެ.

އަގަށް ބަދަލު ގެނެސްފައިވަނީ 1 މާޗުން ފެށިގެންނެވެ.

އެގޮތުން އަގަށް ގެނައި ބަދަލާއެކު އައިސް އަޅާފައިވާ 1.5 ކިލޯއަށް ވުރެ ބޮޑެތި މަސް ގަންނާނީ 17 ރުފިޔާ އަށެވެ. އެސައިޒްގެ އައިސް ނާޅާ މަސް ގަންނާނީ 16 ރުފިޔާއަށެވެ. 1.5 ކިލޯއަށް ވުރެ ކުދި އައިސް އެޅި މަސް ގަންނާނީ 9 ރުފިޔާއަށެވެ. އެސައިޒްގެ އައިސް ނާޅާ މަސް ގަންނާނީ 7 ރުފިޔާއަށެވެ.

މިގެނައި ބަދަލާގުޅިގެން ރާއްޖެއެމްވީއަށް މިފްކޯގެ މެނޭޖިންގ ޑިރެކްޓަރު އިސްމާއީލް ފައުޒީ ވިދާޅުވީ, މިއަދުގެ ދުނިޔޭގެ ބާޒާރުގައި ތެލުގެ އަގު އުފުލެމުންދާ ދަނޑިވަޅެއްގައި މަސް ގަންނަ އަގަށް ބަދަލު ގެނައުމަކީ މަސްވެރިންނަށް ލިބުނު އިތުރު ކުރިއެރުމެއް ކަމަށެވެ. ކުރިއަށް އޮތްތަނުގައި މިފްކޯއިން މަސް ގަންނަމުންދާނީ ދުނިޔޭގެ ބާޒާރުތަކުގެ އަގުތަކުގައި ކަމަށް ފައުޒީ ވިދާޅުވިއެވެ.

ފައުޒީ ވިދާޅުވީ ކިލޯއަކުން 1 ރުފިޔާ ބޮޑުވުން އެއީ ޓަނަކުން 1000 ރުފިޔާގެ ބޮޑުވުމެއް ކަމަށެވެ. އަދި މިބަދަލާއެކު މިފްކޯގެ މަހުގެ އުފެއްދުންތަކަށް ކުރާ ހޭދަ ބޮޑުވާނެ ކަމަށެވެ. ނަމަވެސް މަސްދަޅުގެ ބާވަތްތައް މިހާރުވެސް ވިއްކަމުންދާ އަގުތަކުގައި ކަސްޓަމަރުންނަށް ލިބޭނެ ކަމަށާއި، ރޯދައަށް އެކަށީގެންވާ ސްޓޮކް އެބަހުރި ކަމަށް ފައުޒީ ވިދާޅުވިއެވެ.

ސްޓޯރޭޖް ކެޕޭސިޓީ އަދި ފްރީޒިން ކެޕޭސިޓީ އިތުރުކުރުމުގެ މަސައްކަތްތައް ކުރަމުންދާކަން ފާހަގަކުރައްވައި ފައުޒީ ވިދާޅުވީ, ޒަމާނާ އެއްގޮތަށް މަސްވެރިންނަށް ފައިސާ ދޭ ނިޒާމު ގާއިމުކުރަމުންދާ ކަމަށެވެ. އަދި މީގެ ކުރިން މަސްވެރިންނަށް ދިމާވި ތަކުލީފުތައް މިއަދު ދިމާނުވާނެކަމުގެ ޔަގީންކަން އޭނާ ދެއްވިއެވެ.

މިފްކޯއިން މަސްވެރިންގެ އަތުން މަސް ގަންނަ އަގަށް ބަދަލު ގެނެސްފައިވާއިރު ދުނިޔޭގެ ބާޒާރުގައި މަހުގެ އަގާ އެއްކޮށް މަސްވެރިންނަށް ރަނގަޅު ކުރިއެރުމެއް ލިބޭނެއެވެ. މިފްކޯއިން އަބަދުވެސް މަސައްކަތް ކުރަމުން ދަނީ ކަސްޓަމަރުންނަށް ލުއިފަސޭހަކޮށްދިނުމުގެ ގޮތުން އަގުތައް އެއް މިންގަޑެއްގައި ހިފެހެއްޓުމަށެވެ.