މީހުން ދިރިއުޅޭ ރަށްރަށުގައި ޓޫރިސްޓް ގެސްޓް ހައުސް އަދި ޓޫރިސްޓް ހޮޓާ ތަރައްޤީ ކުރުމަށް ބިން ކުއްޔަށް ދިނުމާއި ގުޅޭ އެއްބަސްވުމުގައި ގއ. ކޮނޑޭ ކައުންސިލާއި ޓޫރިޒަމް މިނިސްޓްރީން ސޮއިކޮށްފިއެވެ.
ޓޫރިޒަމް މިނިސްޓްރީގައި ބޭއްވި ރަސްމިއްޔާތެއްގައި މި އެއްބަސްވުމުގައި ސޮއިކުރެއްވީ ކޮނޑޭ ކައުންސިލްގެ ރައީސް އަހްމަދް އަބްދުލް ހަކީމެވެ. އަދި ޓޫރިޒަމް މިނިސްޓްރީގެ ފަރާތުން ސޮއިކުރެއްވީ ޕާމަނަންޓް ސެކެޓަރީ ފާތިމަތު ނިލްފާއެވެ.
ކޮނޑޭ ކައުންސިލުން ބުނީ މިއީ ވަރަށް ދުރު ރާސްތާ ޕްލޭނަށް ކުރެވުނު މަސައްކަތުގެ ފެށުން ކަމަށާއި ޓޫރިޒަމްގެ ނަފާ ރައްޔިތުންނަށް ކުރާނެ ކަމަށެވެ. އަދި އެއްބަސްވުމާއެކު އަވަސް މުސްތަޤްބަލެއްގައި ބިންތައް ދޫކުރެވި އިންވެސްޓަރުންނަށް ފުރުސަތު ހުޅުވާލެވިގެންދާނެ ކަމަށް ވެސް ކައުންސިލުން ވަނީ ބުނެފައެވެ.
ޓޫރިޒަމް މިނިސްޓްރީން ބުނީ މިފަދަ އެއްބަސްވުމަކުން ވެސް ދައްކުވައިދެނީ ކައުންސިލްތަކާއި މިނިސްޓްރީ އާއި އޮތް ގުޅުން ކަމަށެވެ. މިނިސްޓްރީގެ އަމާޒަކީ ކައުންސިލްތަކަށް ބޭނުންވާ އެއްބާރުލުން ދީގެން ފަތުރުވެރިކަން ކުރިއެރުވުން ކަމަށް ވެސް މިނިސްޓްރީން ބުންޏެވެ.
ޓޫރިޒަމް މިނިސްޓްރީން ބުނީ އެހެން ކައުންސިލްތަކުން ވެސް މިނިސްޓްރީއާއެކު މިފަދަ އެއްބަސްވުމެއްގައި ސޮއިކުރުމަށް ބޭނުންވާ ކަމުގައިވާނަމަ އެ ފުރުސަތު ހުރިހާ ކައުންސިލްތަކަށް ހުޅުވާލާފައިވާ ކަމަށެވެ.
