ރާއްޖޭގައި ބާނާ މަސް ރާއްޖޭގައި ޕްރޮސެސް ކުރުމުން ފައިދާވާނެ ކަމަށް މޯލްޑިވްސް އިންޑަސްޓްރިއަލް ފިޝަރީޒް ކޮންޕެނީގެ (މިފްކޯ) މެނޭޖިންގ ޑިރެކްޓަރު އިސްމާއިލް ފައުޒީ ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަ ދައްކަވަމުން ފައުޒީ ވަނީ ފެލިވަރު ތަރައްޤީ ކުރަމުން ކުރަމުންގެންދާ މަސައްކަތުގެ އެންމެ ފަހުގެ މައުލޫމާތު ހިއްސާކޮށްފައެވެ. އެގޮތުން ފައުޒީ ވިދާޅުވީ ރާއްޖޭގައި ބާނާ މަސް ރާއްޖޭގައި ޕްރޮސެސް ކުރުމުން ފައިދާވާނެ ކަމަށާއި އެ އިންތިޒާމު ހަމަޖެއްސުމުގެ މަސައްކަތް ކުރަމުންދާ ކަމަށެވެ.
މި މަސައްކަތާއެކު 13000 ޓަނާއި ހަމައަށް މިފްކޯގެ ސްޓޯރޭޖް ކެޕޭސިޓީ އިތުރުވެގެންދާނެ ކަމަށާއި ބާނާ މަސް އެއްކޮން ޕްރޮސެސް ކުރެވޭނެ ނިޒާމެއް ޤާއިމުކުރެވޭނެ ކަމަށް ފައުޒީ ވިދާޅުވިއެވެ. ފެލިވަރުގައި މަސް ކިރާއިރު ކައިރީގައި ކޯލްޑް ސްޓޯރޭޖް ހުންނާނެ ކަމަށާއި މިފްކޯގައި މަސްވެރިންގެ ހުރި ހުރިހާ ކަންބޮޑުވުންތަކަށް ހައްލު ލިބިގެންދާނެ ކަމަށް ފައުޒީ ވިދާޅުވިއެވެ.
ރޯދަ މަހު ޕްރޮޑަކްޓްތަކުގެ އަގު އެއް ހަމައެއްގައި ހިފެއްޓުމަށް މަސައްކަތް ކުރައްވާނެކަން ފާހަގަކުރައްވާ ފައުޒީ ވިދާޅުވީ މި ރޯދަ މަހު އަގުތައް އެއްވަރެއްގައި ހިފަހައްޓާ, ކަސްޓަމަރުންނަށް ޕްރޮޑަކްޓްތައް ލިބޭނެކަމުގެ ޔަޤީންކަން އަރުވަން ބޭނުންވާ ކަމަށެވެ. އަދި މިއަހަރު ވެސް މިފްކޯގެ އުފެއްދުންތައް ހެޔޮ އަގެއްގައި ކަސްޓަމަރުންނަށް ރޯދަ މަހު ލިބިގެންދާނެ ކަމަށް ވިދާޅުވިއެވެ.
ފައުޒީ މިހެން ވިދާޅުވީ މިފްކޯ އިން އުފައްދާ މަސްދަޅުގެ އަގު ބޮޑުވާނެކަމަށް ބައެއް ނޫސްތަކުގައި ރިޕޯޓްކުރުމާއި ގުޅިގެންނެވެ. މަސްދަޅުގެ އަގު ބޮޑުކުރުމުގެ މަޝްވަރާތައް ކުރިއަށްދާ ކަމަށާއި, އެހެންނަމަވެސް ވަކި ގޮތެއް ނިންމާފައިނުވާ ކަމަށް އޭނާ ވިދާޅުވިއެވެ. ފައުޒީ ވިދާޅުވީ ކުރިއަށް އޮތީ ރޯދަމަސް ކަމަށްވުމުން އެފަދަ ބަދަލެއް ގެންނައިރު ކުންފުނިން ރައްޔިތުންނާމެދު ވިސްނާނެ ކަމަށެވެ.
ރޯދަމަހަށް ވަރަށް ރަނގަޅު ސްޓޮކެއް ތައްޔާރުކޮށްފައިވާނެކަން ފާހަގަކުރައްވާ ފައުޒީ ވަނީ މަސްދަޅުގެ ސްޓޮކް ހުސްވެދާނެ ކަމަށް ނުވަތަ މަސްދަޅު އަގު ބޮޑުވެދާނެ ކަމަށް ރައްޔިތުން ކަންބޮޑު ނުވުމަށް އެދިވަޑައިގެންފައެވެ.
ރޯދަ މަސް ފެށުމުގެ ކުރިން އިތުރު ދެ ބާވަތެއްގެ ޕްރޮޑަކްޓް ބާޒާރަށް ނެރޭނެކަން ފާހަގަކުރައްވާ ފައުޒީ ވިދާޅުވީ ހޮޓްޕެކްގެ ތެރެއިން ސްޕައިސީ ލެމަން ޓޫނާ އަދި އޮލިވް އޮއިލްގައި ނެރޭ ޕްރޮޑަކްޓެއް ތައާރަފްކުރެވޭނެ ކަމަށެވެ.
މިފްކޯއިން މަސްވެރިންގެ އަތުން މަސް ގަންނަ އަގަށް ބަދަލު ގެނެސްފައިވާއިރު ދުނިޔޭގެ ބާޒާރުގައި މަހުގެ އަގާ އެއްކޮށް މަސްވެރިންނަށް ރަނގަޅު ކުރިއެރުމެއް ލިބިގެންދާނެ ކަމަށް އުންމީދު ކުރައްވާ ކަމަށްވެސް ފައުޒީ ވިދާޅުވިއެވެ.
މަސްވެރިންނަށް ފައިސާ ދޫކުރުން ޒަމާނާއި އެއްގޮތަށް ބަދަލުކޮށް، އެޕްލިކޭޝަން މެދުވެރިކޮށް ހުރިހާ ތަފްސީލެއް ފެންނަ ގޮތަށް ހެދުމަށް މަސައްކަތް ކުރައްވަމުން ގެންދަވާކަމަށް ފައުޒީ ވިދާޅުވިއެވެ.
މިފްކޯއިން އަބަދުވެސް މަސައްކަތް ކުރަމުން ދަނީ ކަސްޓަމަރުންނަށް ލުއިފަސޭހަކޮށްދިނުމުގެ ގޮތުން އަގުތައް އެއް މިންގަޑެއްގައި ހިފެހެއްޓުމަށްކަމަށްވެސް ފައުޒީ ވިދާޅުވިއެވެ.
