ފަތުރުވެރިކަން: ހަނގުރާމަ އާއި ގުޅިގެން އުންމީދު ކުރުން ފިޔަވައި އެ ނޫން ގޮތެއް ރާއްޖެއަށް ނެތް!

މިއަހަރަކީ ރާއްޖޭގެ ފަތުރުވެރިކަމަށް ވަރަށް ވެސް ޚާއްސަ އަހަރެކެވެ. ރާއްޖޭގެ ފަތުރުވެރިކަމަށް 50 އަހަރު ފުރިފައިވާއިރު ސަރުކާރުން ވަނީ މި ދުވަސް ފާހަގަކުރުމަށްޓަކައި ތަފާތުު އެކި ހަރަކާތްތައް ހިންގާ، އަދި ކުރިއަށް ހިންގުމަށް ވެސް ރާވާފައެވެ. އެކި ލަނޑުދަނޑިތައް ހާސިލް ކުރުމަށްވެސް ވަނީ ކަނޑައަޅާފައެވެ. 2022 ވަނަ އަހަރަކީ ރާއްޖޭގެ ފަތުރުވެރިކަމުގެ ރަންޔޫބީލް އަހަރަށްވުމުން މިކަން ކުލަގަދަކޮށް ފާހަގަކުރެވިގެންދާނީ ރާއްޖޭގެ ފަތުރުވެރިކަމުގެ ދުވަސްކަމުގައިވާ 3 އޮކްޓޯބަރުގައެވެ. އެގޮތުން ޓޯކް ޝޯވްތަކާއި، ވީޑިއޯ ލަވަ ނެރުމާއި މި ސިނާއަތުގައި ހަރަކާތްތެރިވާ ފަރާތްތައް ގުޅިގެން އެކިއެކި އިތުރު ޙަރަކާތްތައް ބާއްވާ މިދުވަސް ފާހަގަކުރުމަށް ވަނީ ނިންމާފައެވެ.

ސަރުކާރުން މިއަހަރުގެ މިދުވަސް މިހާ ކުލަގަދަ ގޮތެއްގައި ފާހަގަކުރުމަށް ނިންމާފައިވާއިރު ރަޝިޔާއިން ޔޫކްރެއިންއަށް ދެމުންދާ ހަމަލާއާ ގުޅިގެން ރާއްޖޭގެ ފަތުރުވެރިކަމަށް ވަރަށް ބޮޑު އަސަރުތަކެއް ކުރާނެ ކަމަށް މިވަނީ ބެލެވިފައެވެ. އެގޮތުން މި ދެ ޤައުމަކީ ވެސް ރާއްޖެއަށް ފަތުރުވެރިން އެންމެ ގިނައިން އަންނަ މާކެޓްތަކެވެ. ރަޝިޔާއަކީ މިދިޔަ އަހަރު ރާއްޖެއަށް 2 ވަނައަށް އެންމެ ގިނަ ފަތުރުވެރިން އައި ގައުމެވެ. އަދި ޔޫކްރެއިނަކީ އަހަރުގެ މިހާތަނަށް 8 ވަނައަށް ރާއްޖެއަށް އެންމެ ގިނަ ފަތުރުވެރިން އައި ގައުމެވެ.

ޓޫރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވީ ޔޫކްރެއިނުން ރާއްޖެއަށް އަންނަ ފަތުރުވެރިން އެއްކޮށް ހުއްޓިއްޖެ ކަމަށެވެ. އަދި ރަޝިޔާ އިން ވެސް ކެންސަލޭޝަންސް އަންނަ ކަމަށެވެ.

މިނިސްޓަރު ވިދާޅުވީ މިއަހަރަކީ ކުރީ އަހަރާއި އަޅާބަލާއިރު އިތުރަށް ކާމިޔާބު އަހަރަކަށް ވާނެކަމުގެ އުއްމީދުގައި ހުންނެވި ކަމަށެވެ. ނަމަވެސް އޮމިކްރޯނާއި ގުޅިގެން އެ ޓާގެޓަށް ވާސިލް ނުވެވުނު ކަމަށާއި އަދި ޔޫކްރެއިން އާއި ރަޝިޔާ ހަނގުރާމައިގެ ސަބަބުންވެސް މުޅި އަހަރަށް ކަނޑައެޅި ޓާގެޓަށް ވާސިލްވުމަށް ހުރަސްތައް ކުރިމަތިވެފައިވާ ކަމަށެވެ. ރާއްޖޭގެ ޓޫރިޒަމް ބައްޓަންވެފައި އޮތް ގޮތުން މެދުފަންތީގެ ޓޫރިޒަމް އަޑިއަޅާލައިފި ނަމަ، އެެއީ ވަރަށް ސީރިއަސް ކަމެއް ކަމަށް ވިދާޅުވިއެވެ. އަދި މިވަގުތު އުންމީދު ކުރުން ފިޔަވައި އެނޫން އެއްވެސް ގޮތެއް ރާއްޖެއަށް ނެތް ކަމުގައި މިނިސްޓަރު ވިދާޅުވިއެވެ.

ހަމަލާ ބަދަލުކުރުން ހުއްޓާލުމުގެ ގޮތުން ރަޝިޔާ އާއި ޔޫކްރެއިން އާއި ދެމެދު ކުރިޔަށްދިޔަ ސުލްހައިގެ ވާހަކަތަކުގެ ފުރަތަމަ ބުރު ވަކިކޮޅެއްގައި ނުޖެހި ވަނީ ނިންމާލާފައެވެ. ވާހަކަތައް ކުރިޔަށް ގެންގޮސްފައިވަނީ ބެލަރޫސް އާއި ޔޫކްރެއިން ގުޅޭ ބޯޑަރު ސަރަހައްދުގައެވެ. ވާހަކަތައް ކުރިޔަށް ގެންދިޔައިރުވެސް ރަޝިޔާގެ އަސްކަރީ ފައުޖުތަކުން ގެންދިޔައީ ޔޫކްރެއިންގެ ސިޓީތަކަށް ހަމަލާތައް ދެމުންނެވެ. އޭގެތެރޭގައި ދެވަނަ އަށް އެންމެ ބޮޑު ސިޓީކަމުގައިވާ ޚާރްކީވް ވެސް ހިމެނެއެވެ.

ރަޝިޔާގެ ރައީސް ވްލަޑްމިއަރ ޕުޓިންގެ އަރިސް މީހަކާ ހަވާލާދީ އަލްޖަޒީރާއިން ރިޕޯޓްކޮށްފައިވަނީ ވާހަކަތައް ކުރިޔަށްދިޔައީ ގާތްގަނޑަކަށް ފަސް ގަޑިއިރަށްކަމަށެވެ. ވާހަކަތަކުގައި ބައިވެރިވި ރަޝިޔާ ވަފުދުގައި އެންމެ އިސްކޮށް ހުންނެވި ވްލަޑްމިއަރ މެޑިންސްކީ ވިދާޅުވީ ދެފަރާތަށްވެސް މިވާހަކަތަކުން ދެވޭނެ ދިމާތަކެއް މިހާރު ސާފުވެފައިވާކަމަށެވެ. އަދި ކުރިޔަށް އޮތްތަނުގައިވެސް ވާހަކަތައް ކުރިޔަށް ގެންދިޔުމަށް އެއްބަސްވެވުނު ކަމަށް ވިދާޅުވިއެވެ.

ޔޫކްރެއިންގެ ރައީސް ވޮލޮޑިމިރް ޒެލެންސްކީގެ އެންމެ އިސް އެޑްވައިޒަރ މަކައިލޯ ޕޮޑޯލްޔަކް ވިދާޅުވީ ވާހަކަތައް އަމާޒުކުރެވިގެންދިޔައީ ހަމަލާ ބަދަލުކުރުން ހުއްޓާލެވޭނެ ގޮތްތަކާއި ގުޅޭގޮތުންނާއި ދެވަނަ ބުރުގެ ވާހަކަތައް ވީއެންމެ އަވަހަކަށް ބޭއްވުމާމެދުކަމަށެވެ. ކުރިޔަށް އޮތް ދުވަސްތަކުގައި ދެ ވަނަ ބުރުގެ ވާހަކަތައް ބޭއްވިގެންދާނީ ޕޮލެންޑާއި ބެލަރޫސްގެ ބޯޑަރުގައި ކަމަށް މަކައިލޯ ވިދާޅުވިއެވެ.

ހުއްޓުމެއް ނެތި މިހަނގުރާމަ ދިގުލައިގެން ގޮސްފިނަމަ ރާއްޖޭގެ އިތުރުން މުޅި ދުނިޔޭގެ އިޤްތިސާދަށްވެސް މިކަމުގެ އަސަރު ކުރާނެ ކަމަށް މިވަނީ ބެލެވިފައެވެ. ރާއްޖޭގެ ފަތުރުވެރިކަމަށް މިކަމުން އަސަރުކުރާނެކަން ޔަޤީންވެފައިވާއިރު ސަރުކާރުން ބުނީ މިކަމުން އަރައިގަތުމަށްޓަކައި ގިނަ މަސައްކަތްތަކެއް ކުރަން ޖެހޭ ކަމަށެވެ. އެގޮތުން މި ދަނޑިވަޅުގައި ކައިރީގައިވާ ބޮޑެތި މާކެޓްތަކާއި ގުޅުން ބަދަހިކުރުމަކީ ކުރެވިދާނެ ކަމެއް ކަމަށް ވަނީ ބުނެފައެވެ.