ކުރިއަށް އޮތް 6 މަސް ދުވަހުގެ ތެރޭގައި ތ. ވޭމަންޑޫ ޒުވާނުންގެ މަރުކަޒުގެ މަސައްކަތް ނިމޭނެކަމަށް މިނިސްޓަރ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓް އަޙްމަދު މަޚްލޫފް ވިދާޅުވެއްޖެއެވެ.

މިނިސްޓަރ މަހްލޫފް މިހެން ވިދާޅުވީ ތ. ވޭމަންޑޫ ޒުވާނުންގެ މަރުކަޒު ތަރައްޤީކުރުމަށް ކުރައްވަން ރާއްވަވާފައިވާ ކަންކަން ސާފުކޮށްދެއްވުން އެދި ތިމަރަފުށީ ދާއިރާގެ މެންބަރު އަބްދުﷲ ރިޔާޟް މަޖިލީހަށް ހުށަހެޅުއްވި ސުވާލަށް ހޯމަ ދުވަހުގެ ޖަލްސާއަސް ވަޑައިގެން، ޖަވާބު ދެއްވަމުންނެވެ.

މަހްލޫފް ވިދާޅުވީ ވޭމަންޑޫ ޒުވާނުންގެ މަރުކަޒު ތަރައްގީކުރުމަށް 675،000 ރުފިޔާ ހަމަޖެހިފައިވާ ކަމަށެވެ. އެ މަސައްކަތް އިއުލާން ކުރެވިފައިވަނީ 29 ނޮވެމްބަރުގައި ކަމަށާއި، ބިޑް ހުށަހެޅިފައިވަނީ 8 ޑިސެމްބަރުގައި ކަމަށެވެ. އަދި އިވެލުއޭޝަން ނިންމާ މިނިސްޓްރީއަށް ޕްރޮޖެކްޓްތައް ލިބިފައިވާ ކަމަށާއި، އެހެންކަމުން އުއްމީދުކުރަނީ ކުރިއަށް އޮތް ހަފްތާ ތެރޭގައި ލަސްވެގެން ސޮއިކޮށްލެވޭނެ ކަމަށެވެ.

ގުޅިގެން ކުރާ ސުވާލު ބައިގައި މެންބަރު ރިޔާޟް ވަނީ ވޭތުވެދިޔަ 3 އަހަރު ވެސް ބަޖެޓުގައި ޖަހާފައި އެއްވެސްކަމެއް ނުކުރެވި އޮތް ކަމަށް ވިދާޅުވެފައެވެ. އަދި އެމްޑީޕީގެ ތެރޭގައި ވެސް އިންތިހާބެއް އެބައޮތް ކަމަށާއި، އިންތިހާބުތަކާއި ގުޅިގެން ކޮމަންޑޫގައި ފެނިގެން ދިޔައީ އިންތިހާބު ކުރިއަށްދާ ސްޕީޑް ކަމަށެވެ. އެހެންކަމުން އެކަހަލަ ގޮތަކަށް ވެސް ވޭމަންޑޫ ޒުވާނުންގެ މަރުކަޒު އަވަސްވާނެ ގޮތެއް އެބައޮތްތޯ ސާފުކޮށްދެއްވުމަށް ސުވާލު ކުރެއްވިއެވެ.

ޖަވާބުގައި މަހްލޫފް ވިދާޅުވީ އެއްވެސް ހާލެއްގައި ޕްރޮޖެކްޓައް ކުރިއަށްދަނީ އެތެރޭގައި ވެސް އަދި ބޭރުގައި ވެސް އެހެންވެސް އިންތިހާބަކާއި ގުޅިގެން ނޫން ކަމަށެވެ. އަދި މިދިޔަ އަހަރުތަކުގައި އުނިވެގެން ދިޔައީ ކޮވިޑާއި ގުޅިގެން ފިނޭންސް މިނިސްޓްރީން ބަޖެޓަށް ގެނައި ބަދަލުތަކާއި ގުޅިގެން ކަމަށާއި، ޖާގަ ލިބުނުހާ އަވަހަކަށް މިނިސްޓްރީން ވަނީ އެކަން ކޮށްފައި ކަމަށެވެ. އަދި ކުރިއަށް އޮތް 6 ވަރަކަށް މަސް ދުވަހުގެ ތެރޭގައި އެކަން ނިމެންވާނެކަމަށެވެ.

މަހްލޫފް ވިދާޅުވީ ރާއްޖެގެ އެކި ކަންކޮޅުތަކުގައި ތިބި ޒުވާނުންނަށް ކޮށްދެއްވާ މަސައްކަތްތައް ބަލައިގަންނަ ކަމާއި ނަމަވެސް ކޮވިޑާއި ގުޅިގެން ދިމާވި ބައެއް ދަތިތަކުގައި ލަސްތަކެއް އުޅޭކަމަށެވެ. އެތެރޭގައި ވިޔަސް ބޭރުގައި ވެސް މިނިސްޓްރީން ކުރަން ހުރި ކަންކަން ނިންމާނެ ކަމަށެވެ.