މިއަދު އެކްޓިވިސްޓުންގެ ގޮތުގައި ތިބިގެންވާކަށް ނެތް، ވާންވީ ވެރިންނަށް: ރޮޒެއިނާ
ސިޔާސީ މަސައްކަތަކީ ހަޑި މަސައްކަތެއް ނޫން
އެމްޑީޕީގެ އަންހެނުންގެ ރޫހުގެ ރައީސްކަމަށް ކުރިމަތިލައްވާ އަންހެން ކެންޑިޑޭޓު އަދި މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒެއިނާ އާދަމް
މިއަދު އެކްޓިވިސްޓުންގެ ގޮތުގައި ތިބިގެންވާކަށް ނެތް ކަމަށާއި ޕާޓީ ތެރޭގައި މަސައްކަތްކުރާ އަންހެނުން ވެރިންނަށް ވާންވީ ވަގުތު އައިސް ޖެހިއްޖެ ކަމަށް އެމްޑީޕީގެ އަންހެނުންގެ ރޫހުގެ ރައީސްކަމަށް ކުރިމަތިލައްވާ އަންހެން ކެންޑިޑޭޓު އަދި މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒެއިނާ އާދަމް ވިދާޅުވެއްޖެއެވެ.
އެމްޑީޕީގެ ޗެއަރޕާސަންގެ މަގާމަށް ކުރިމަތިލައްވާފައިވާ އިކޮނަމިކް މިނިސްޓަރު ފައްޔާޒު އިސްމާއިލްގެ ކެމްޕެއިން ރަސްމީކޮށް ލޯންޗު ކުރުމަށް ށ. މިލަންދޫގައި ބޭއްވި ޖަލްސާގައި ވާހަކަ ދައްކަވަމުން ރޮޒެއިނާ ވިދާޅުވީ އެމްޑީޕީން ވެރިކަމަށް އައުމުން ބޭނުންވާ ގޮތަށް ޤައުމު ބައްޓަން ކުރުމުގެ ފުރުސަތު ލިބިގެން ހިނގައްޖެ ކަމަށެވެ. އަދި ދުވަހަކު ވެސް ނުފެންނަ ބަދަލުތަކެއް ފެނިގެން ހިނގައްޖެކަން ފާހަގަކުރައްވާ ރޮޒެއިނާ ވިދާޅުވީ ކައުންސިލްތަކުގެ 33 އިންސައްތަ އަންހެނުންނަށް ޚާއްސަ ކުރުމާއި ގުޅިގެން އަންހެނުންނަށް ސިޔާސީ ދާއިރާއަށް ނިކުތުމަށް މި ސަރުކާރުން ފުރުސަތު ފަހިކޮށްދީފައިވާ ކަމަށެވެ.
އަންހެނުންގެ ތަރައްޤީއަށް މަސައްކަތް ކުރާ ކޮމެޓީތައް މި ސަރުކާރުން ބާރުވެރި ކުރުވި ކަމަށް ވެސް ރޮޒައިނާ ވިދާޅުވިއެވެ. އަދި ގިނަ އަންހެން ކައުންސިލަރުން އަދިވެސް ބިނާކުރަން ޖެހޭ ކަމަށާއި ސިޔާސީ މަސައްކަތަކީ ހަޑި މަސައްކަތެއް ނޫން ކަމަށް ރޮޒެއިނާ ވިދާޅުވިއެވެ.
ރޮޒެއިނާ އިތުރަށް ވިދާޅުވީ ސިޔާސީ ދާއިރާގައި ފުރުސަތުތައް ހޯދަން ޖެހެނީ ވަރަށް ބުރަ މަސައްކަތުން ކަމަށާއި ރޮޒެއިނާ މަޤާމަށް ހޮވައިފިނަމަ އަންހެނުން ފިސާރި ސިޔާސީ ވެރިންނަށް ހަދައިދޭނެ ކަމަށެވެ.
ރޮޒެއިނާ މިހެން ވިދާޅުވެފައިވާއިރު ޖަލްސާގައި ފައްޔާޒު ވަނީ އަނިޔާވެރިކަމަކީ ރައްޔިތުންނަށް އާންމު އަދި ހައްގު އެއްޗެއްގެ ގޮތުގައި މީގެ ކުރިން އޮތް ދުވަސްތަކެއްވެސް ދެކެފައިވާ ކަމަށް ވިދާޅުވެފައެވެ. ފައްޔާޒު ވިދާޅުވީ އެމްޑީޕީއަކީ ރާއްޖޭގެ ރައްޔިތުންނަށް މިނިވަންކަމާއި އިންސާފު ގެނެސްދިން ޕާޓިކަމަށެވެ. އަދި މިއަދުގެ ސަރުކާރުން ރައްޔިތުން ޚިޔާލުފާޅުކޮށް، ހައްގު ހޯދުމަށް ވަކާލާތު ކުރުމަށް ފުރުސަތު ދެއްވާފައިވާކަމަށްވެސް ފައްޔާޒު ވިދާޅުވިއެވެ.
