އެމްޑީޕީގެ ޗެއަރޕާސަންގެ މަގާމަށް ކުރިމަތިލައްވާފައިވާ އިކޮނަމިކް މިނިސްޓަރ ފައްޔާޒު އިސްމާއިލްގެ ކެމްޕެއިން ރަސްމީކޮށް ލޯންޗުކޮށްފިއެވެ.
ފައްޔާޒުގެ ކެމްޕެއިން ރަސްމީކޮށް ފަށްޓަވާފައި ފވަނީ ހުކުރު ދުވަހުގެރޭ ށ. މިލަންދޫގައި އެކަމަށް ޚައްސަކޮށްގެން ބޭއްވި ރަސްމިއްޔާތުގައެވެ.
މި ރަސްމިއްޔާތުގައި ވާހަކަދައްކަވަމުން، އަނިޔާވެރިކަމަކީ ރައްޔިތުންނަށް އާންމު އަދި ހައްގު އެއްޗެއްގެ ގޮތުގައި މީގެ ކުރިން އޮތް ދުވަސްތަކެއްވެސް ދެކެފައިވާކަން ފާހަގަކުރައްވާ ފައްޔާޒު ވިދާޅުވީ އެމްޑިޕީއަކީ ރާއްޖޭގެ ރައްޔިތުންނަށް މިނިވަންކަމާއި އިންސާފު ގެނެސްދިން ޕާޓިކަމަށެވެ. އަދި މިއަދުގެ ސަރުކާރުން ރައްޔިތުން ޚިޔާލުފާޅުކޮށް، ހައްގު ހޯދުމަށް ވަކާލާތު ކުރުމަށް ފުރުސަތު ދެއްވާފައިވާކަމަށް ފައްޔާޒު ވިދާޅުވިއެވެ.
ނަމަވެސް މިހާރު ޕާޓީގެ ދުވެލި ކޮންމެވެސް ވަރަކަށް މަޑުޖެހިފައިވާކަން ފާހަގަކުރައްވާ ފައްޔާޒު ވިދާޅުވީ އެމްޑިޕީގެ ހިންގުމުގެ ދުވެލި މިއަދު މިއޮތީ ޕާޓީގެ ސައިޒުގައި ނޫންކަމަށެވެ. އަދި މިއީ ޕާޓީގެ މެމްބަރުންނަށް ހައްގުވާ މިންވަރު ނޫންކަމަށް ވިދާޅުވިއެވެ.
އޭގެ ބަދަލުގައި ޕާޓީގެ ހުރިހާ މެމްބަރުން ގުޅިގެން މަސައްކަތް ކުރަން ޖެހޭކަން ފާހަގަކުރައްވާ، އެމްޑިޕީއަކީ ކޮންމެ މެމްބަރަކަށްވެސް ޖާގަ އޮންނަ ޕާޓިއެއްކަމަށް ވިދާޅުވިއެވެ. އަދި އެމްޑީޕީގައި ހުރިހާ އުމުރެއްގެ، ހުރިހާ ޖިންސެއްގެ މެމްބަރުންނަށްވެސް ޖާގަ އޮންނާނެކަމަށް ވިދާޅުވިއެވެ.
ނަމަވެސް މިހާރު ކަންހިނގަމުންދާ ގޮތަށް ބަލާނަމަ އެފަރާތްތަކުގެ ބޭނުން އެންމެ ރަނގަޅު ގޮތުގައި ހިފާ، ސިޔާސަތުތައް ބިނާކުރުމުގައި އެފަރާތްތަކުގެ އަޑު އެންމެ ރަނގަޅަށް އަހަމުންދާތަން ނުފެންނަކަން ފައްޔާޒު ފާހަގަކުރެއްވިއެވެ. އަދި ސިޔާސީ މަގާމުތަކަށް އަންހެން ބޭފުޅުން ނެރުމަށް ޕާޓީން ކުރަންޖެހޭ މަސައްކަތް ކުރުމަކީ ފައްޔާޒުގެ އެންމެ މުހިންމު އެއް މަސައްކަތަކަށް ހައްދަވާނެކަމަށް ވިދާޅުވިއެވެ.
އަޅުގަނޑު ތިބޭފުޅުންގެ އަރިހަށް ހުއްޓި މިރޭ މި ހުށަހަޅަނީ އަޅުގަނޑުމެންގެ މި އޮޑި މަރާމާތުކޮށްލާ، އަޅުގަނޑުމެންގެ ފަޅުވެރިންގެ ތެރޭގައި އޮތް ނުތަނަވަސްކަން ނައްތާލާ، ފުރިހަމައަށް ރަނގަޅަށް ކޮއްތު އޮޑިއަށް އަރުވާލައިގެން، އަޅުގަނޑުމެންގެ ކައްޕިތާނުންނަށް މި އޮޑިއައިގެން ކުރިއަށް ދިއުމަށް އޮޑި ތައްޔާރުކޮށްލުމަށްމިނިސްޓަރ ފައްޔާޒު އިސްމާއިލް
އަދި ކެމްޕެއިން ކުރައްވާނީ ވަރަށް ރީތިކޮށް ކަމަށާއި، ކެމްޕޭނު ކުރައްވާ އިރު އެކި ފަރާތްތަކަށް ކުޑައިމީސްބަސްބުނެ ނުހަދާނެކަމަށް ވިދާޅުވިއެވެ. އެހެން ޕާޓީތަކުން އެކަން ކުރާގޮތް ވަރަށް ހުތުރުކަން ފާހަގަކުރައްވާ ފައްޔާޒު ވިދާޅުވީ އެމްޑިޕީގައި އެގޮތަށް އަމަލު ނުކުރާނެ ކަމަށެވެ.
މި ޖަލްސާގައި ވަނީ އެމްޑީޕީގެ އަންހެނުންގެ ރޫހުގެ ރައީސްކަމަށް ކުރިމަތިލައްވާ އަންހެން ކެންޑިޑޭޓުވެސް ރަސްމީކޮށް އިއުލާނުކޮށްފައެވެ. މި މަގާމަށް ކުރިމަތިލައްވާފައިވަނީ ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒެއިނާ އާދަމްއެވެ.
