މާރޗް ދެވަނަ ދުވަހުން ފެށިގެން ހުޅުމާލެ ފޭސް 2 އިން މާލެއަށް ސީދާ ބަސް ދަތުރުތައް ފަށަނީ
ޓްރެފިކް ބާރު ބޮޑު ނޫންކަމަށްވާނަމަ ކޮންމެ ގަޑިއިރަކުން ދަތުރުތައް ބާއްވާނެ
އެމްޓީސީސީގެ ބަހުގެ ޚިދުމަތް
މާރޗް ދެވަނަ ދުވަހުން ފެށިގެން ހުޅުމާލެ ފޭސް 2 އިން މާލެ ސިޓީއަށް ސީދާ ބަސް ދަތުރުތައް ފަށަން މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ނިންމައިފިއެވެ.
އެމްޓީސީސީގެ ސީއީއޯ އާދަމް އާޒިމް ކުރައްވާފައިވާ ޓުވީޓެއްގައި ވިދާޅުވެފައިވަނީ މާރޗް ދެވަނަ ދުވަހުން ފެށިގެން ހުޅުމާލެ ފޭސް 2 އިން މާލެ ސިޓީއަށް ސީދާ ބަސް ދަތުރުތައް ފެށިގެންދާއިރު ޓްރެފިކް ބާރު ބޮޑު ނޫންކަމަށްވާނަމަ ކޮންމެ ގަޑިއިރަކުން ދަތުރުތައް ކުރާނެ ކަމަށެވެ. އަދި ޖުލައި މަސް ނިމުމުގެ ކުރިން ކޮންމެ 15 މިނެޓަކުން ބަސް ދަތުރު ހަމަޖައްސަވާނެ ކަމަށް އާޒިމް ވިދާޅުވިއެވެ.
ބަސް ދަތުރުތަކާއި ގުޅިގެން މީގެ ކުރިން އާޒިމް ވިދާޅުވެފައިވަނީ އެމްޓީސީސީއަށް ބަހުގެ ޚިދުމަތް ދިނުމަށް ލާޒިމްކޮށްފައިވަނީ މާލެ ސިޓީގެ އިތުރުން އައްޑޫ ސިޓީ އާއި ފުވައްމުލަކު ސިޓީ އަދި ލ އަތޮޅަށްކަމަށެވެ. އެހެންކަމުން، މިތަންތަނުގައި ރަނގަޅަށް އިންތިޒާމުކުރެވިފައިވާ ބަހުގެ ޚިދުމަތެއް ދިނުމަށް އެމްޓީސީސީން މަސައްކަތްކުރާ ކަމަށް އާޒިމް ވިދާޅުވިއެވެ.
އާޒިމް ވިދާޅުވީ އެމްޓީސީސީ އާއި ބަހުގެ ޚިދުމަތް ހަވާލުވެގެން ދިޔައީ 2021 ވަނަ އަހަރުގެ ޖުލައި މަހުގެ 31 ވަނަ ދުވަހުކަމަށެވެ. އެމްޓީސީސީއަކީ ހަމައެކަނި ފެރީ ދުއްވަމުން އައި ކުންފުންޏެއްކަމަށާއި އެހެންކަމުން ބަހުގެ ޚިދުމަތް ދިނުމަށް މާގިނަ ވަސީލަތްތަކެއް ނެތް ނަމަވެސް ސަރުކާރުގެ ވަރަށް ބޮޑު އެހީތެރިކަމަކާއެކު މިހާރު ދަތުރުފަތުރުގެ ނިޒާމު ހަރުދަނާކުރުމަށް އެކުންފުންޏާއި ހަވާލުކޮށްފައިވާކަމަށް އާޒިމް ވިދާޅުވިއެވެ.
މީގެއިތުރުން އެމްޓީސީސީން ބަހުގެ ޚިދުމަތް ދެމުންގެންދާ އައްޑޫ ސިޓީ އާއި ފުވައްމުލަކު ސިޓީއަށްވެސް މުޅިން އައު ބަސް ފޯރުކޮށްދެއްވާނެކަމަށް އާޒިމް ވިދާޅުވިއެވެ. އަދި އައްޑޫއަށް ގެންދާނީ މިނީ ބަސްކަމަށާއި ލ އަތޮޅުގައިވެސް އެމްޓީސީސީއިން ބަހުގެ ޚިދުމަތް ރަނގަޅަށް ދެމުންގެންދާނެކަމަށް އާޒިމް ވިދާޅުވިއެވެ.
