ނިހާންއަށް ކުރާ ދައުވާއިން ދިފާއުވުމަށް ހެކީގެ ގޮތުގައި ރައީސް ސޯލިޙާއި ފައިސަލް ނަސީމްވެސް ހިމެނޭ
ބައެއް ޓްވީޓުތަކުގެ ސްކްރީން ޝޮޓްވެސް ކިތާބީ ހެކީގެ ގޮތުގައި ހުށައަޅާފައިވޭ
ވިލިލާމެ ދާއިރާގެ ކުރީގެ މެމްބަރު އަދި ޕީޕީއެމްގެ ކުރީގެ ޕީޖީ ލީޑަރު އަޙުމަދު ނިހާން ޙުސައިން މަނިކު
ވިލިލާމެ ދާއިރާގެ ކުރީގެ މެމްބަރު އަދި ޕީޕީއެމްގެ ކުރީގެ ޕީޖީ ލީޑަރު އަހުމަދު ނިހާން ހުސައިން މަނިކުގެ މައްޗަށް އުފުލާފައިވާ 6 ދައުވާ އަށް ބަލާއިރު، ދިފާއުން ހުށައެޅި ހެކީންގެ ގޮތުގައި ރައީސް ސޯލިޙާއި ނާއިބްރައީސް ފައިސަލް ނަސީމްވެސް ހިމަނާފައިވެއެވެ.
މިމައްސަލައިގެ އަޑުއެހުމެއް އެންމެ ފަހުން ބާއްވާފައިވަނީ 16 ފެބްރުއަރީގައެވެ.އެ ދުވަހުގެ އަޑުއެހުމުގައި ކުރިއަށް ގެންދިޔައީ ހެކި ހަމާކުރުމުގެ މަރުޙަލާއެވެ.އެގޮތުން ދައުލަތުންނާއި ދިފާއުން ވަނީ ހެކި ހާމަކޮށްފައެވެ,
ދިފާއުން ހުށައަޅާފައިވާ ހެކިތަކަށް ބަލާއިރު، މާލިއްޔަތު ކޮމިޓީގެ ޖަލްސާތަކުގެ އެޖެންޑާތަކުގެ ޚުލާސާ ހުށައަޅާފައިވެއެވެ.އެއީ ހުށަހަޅާފައިވާ އޮޑިޓް ރިޕޯޓާގުޅިގެން މަސައްކަތްކުރިކަން ސާބިތުކުރުމަށެވެ.
ހަމައެއާއެކު، ޕީޖީ ލީޑަރުގެ ދައުރު ސާބިތު ކުރުމަށް ޕީ.ޕީ.އެމްގެ ގަވާއިދުވެސް ހުށައަޅާފައިވާއިރު، އެމް.އެމް.ޕީ.އާރް.ސީގެ ޚާއްސަ އޮޑިޓް ރިޕޯޓާއި،ޖޭ، ހޮޓެލްސް އެންޑް ރިސޯޓްގެ ސިޓީއަކާއި،"އަދީބުގެ ފޯނު- ދައުލަތުގެ ބޮޑު ޓެސްޓެއް" ނަމުގައި ނޫހެއްގައި ލިޔެފައިވާ އާޓިކަލްއެއްވެސް ހިމެނެއެވެ.އެއީ ޗެއިން އޮފް ކަސްޓަޑީ ނެތް ފޯނެއްކަން ބަޔާން ކުރުމަށެވެ.އެކަން ސާބިތު ކުރުމަށް ޢަލީ ވަހީދުގެ ވީޑިއޯ އިންޓަރވިއުއެއްވެސް ވަނީ ހުށައަޅާފައެވެ.
އޭގެ އިތުރުން ބައެއް ޓްވީޓުތަކުގެ ސްކްރީން ޝޮޓްވެސް ކިތާބީ ހެކީގެ ގޮތުގައި ހުށައަޅާފައިވެއެވެ.
ޝަފަހީ ހެކިތަކަށް ބަލާއިރު، ދަތުރު ކުރި ތާރީޚާއި، ރޮލެކްސް ގަޑިގަތް ތާރީޚާއި، ގަޑި ދިން އިރު ހުރި ފަރާތެއްގެ ހައިސިއްޔަތުން މ މުލައް، މުނިޔާވިލާ، މުޙައްމަދު ޢަލީގެ ނަން ވަނީ ހުށައަޅާފައެވެ.
ދިފާއުން ހުށައެޅި ޝަފަހީ ހެކިން
މިމައްސަލައިގައި ދައުލަތުން އެދިފައިވަނީ، ނިހާންގެ ރޮލެކްސް ގަޑިއާއި, އޭނާ ރިޝްވަތާއި މަނީ ލޯންޑަރ ކޮށްގެން ހޯދާފައިވާ ފައިސާ ދައުލަތަށް ނަގައިދިނުމަށެވެ.މި މައްސަލައަކީ މޯލްޑިވްސް ޕޮލިސް ސަރވިސްއާއި، އެންޓި-ކޮރަޕްޝަން ކޮމިޝަނާއި, ޕްރެޒިޑެންޝަލް ކޮމިޝަން އޮން ކޮރަޕްޝަން އެންޑް އެސެޓް ރިކަވަރީ ގުޅިގެން ތަހުގީގުކުރުމަށްފަހު ޕީޖީ އޮފީހަށް ފޮނުވި މައްސަލައެކެވެ.
(ނިހާންގެ މައްޗަށް އުފުލާފައިވާ ދައުވާތަކުގެ ތަފްސީލުތައް:)
ނިހާންގެ މައްޗަށް އުފުލާފައިވާ ދައުވާގެ ތަފްސީލް ތަކަށް ބަލާއިރު މަޖިލީހުގެ މެންބަރެއްގެ ހައިސިއްޔަތުން އަދާކުރަންޖެހޭ ވާޖިބަށް ނުފޫޒު ފޯރުވުމުގެ ގޮތުން އޭރުގެ ޓޫރިޒަމް މިނިސްޓަރު އަހުމަދު އަދީބު އަބްދުލްޣަފޫރު މެދުވެރިވެގެން އެސް.އޯ.އެފް ޕްރައިވެޓް ލިމިޓެޑުގެ -/150،000 (އެއްސަތޭކަ ފަންސާސްހާސް) އެމެރިކާ ޑޮލަރުގެ ޗެކެއް ލިބިގަނެފައިވާތީ ރިޝްވަތު ހިފުމުގެ ކުށުގެ ދައުވާ،
އަދީބު ދޭ ފައިސާއަކީ ކުށްކޮށްގެން ހޯދާފައިވާ ފައިސާއެއްކަން ޝައްކު ކުރެވެންޖެހޭ ހާލަތުގައި އަދީބު މެދުވެރިވެގެން -/150،000 (އެއްސަތޭކަ ފަންސާސްހާސް) އެމެރިކާ ޑޮލަރުގެ ޗެކެއް ލިބިގަނެ، މި ފައިސާއާއި އެހެން ފައިސާ އެއްކުރުމަށްފަހު ޕްލެޓިނަމް ރެޒިޑަންސްއިން ފްލެޓެއް ގަނެފައިވާތީ މަނީ ލޯންޑަރިންގގެ ކުށުގެ ދައުވާ،
2014 ވަނަ އަހަރު ޕްރޮސިކިއުޓަރ ޖެނެރަލްގެ މަގާމަށް މީހަކު އައްޔަން ކުރުމަށާއި، ހަމަ އެ އަހަރު ރައްޔިތުންގެ މަޖިލީހުގެ މެންބަރުންގެ ތެރެއިން ޖުޑީޝަލް ސަރވިސް ކޮމިޝަނަށް އައްޔަންކުރާ މެންބަރު ހޮވުމަށްޓަކައި ރައްޔިތުންގެ މަޖިލީހުން ނެގި ވޯޓާ ގުޅިގެން، ރިޝްވަތުގެ ގޮތުގައި ރޮލެކްސް (ސަބްމެރީނާ) ބްރޭންޑްގެ ގަޑިއެއް ދިނުމަށް އަދީބު ގާތު އެދިފައިވާތީ ރިޝްވަތު ލިބިދިނުމަށް އެދުމުގެ ކުށުގެ ދައުވާ،
އަހުމަދު އަދީބު އަބްދުލްޣަފޫރު ދިން ރޮލެކްސް ބްރޭންޑްގެ ގަޑި ބަލައިގަނެފައިވާތީ ރިޝްވަތު ހިފުމުގެ ކުށުގެ ދަޢުވާ،
މެންބަރުކަމުގެ ހައިސިއްޔަތުން އަދާ ކުރި މަސްއޫލިއްޔަތުތައް އޭރުގެ ޓޫރިޒަމް މިނިސްޓަރ ހ.ސާމަރާ، އަހުމަދު އަދީބު އަބްދުލްޣަފޫރު އަންގާ ގޮތަށް އަދާކުރުމުގެ މުގާބިލުގައި -/650،000 (ހަ ސަތޭކަ ފަންސާސް ހާސް) ރުފިޔާ ދިނުމަށް އަހުމަދު އަދީބު ގާތު އެދިފައިވާތީ ރިޝްވަތު ލިބިދިނުމަށް އެދުމުގެ ކުށުގެ ދައުވާ،
އަދި އަހުމަދު އަދީބު އަބްދުލްޣަފޫރު އެ އަދަދަށް ފައިސާ ދިނުމުން އެ ފައިސާ ހިފާފައިވާތީ ރިޝްވަތު ހިފުމުގެ ކުށުގެ ދައުވާއެވެ.
ނިހާން އަށް ލިބިފައިވާ މި ފަދަ އެއްވެސް ފައިސާއެއް ލިބުނުކަން އޭނާ 2014އިން ފެށިގެން 2019އާ ދެމެދު ހުށަހަޅާފައިވާ މާލީ ބަޔާންތަކުގައި ހިމަނާފައި ނުވާކަން ޕީޖީ އޮފީހުން މީގެ ކުރިން ހާމަކޮށްފައިވެއެވެ. ދައުލަތުން ވަނީ ފައިސާގެ އިތުރުން ނިހާނުގެ ރޮލެކްސް ގަޑިވެސް ދައުލަތަށް ނަގައިދިނުމަށް އެދިފައެވެ.
