ރާއްޖޭގެ މޫދު ކުޅިވަރުތަކާއި ޑައިވިންގ ދާއިރާ އިސްތިހާރުކުރުމަށް އެމްއެމްޕީއާރުސީން މޮސްކޯ ޑައިވް ޝޯގައި ބައިވެރިވެއްޖެއެވެ.

މިއަހަރު މިޝޯ ނުވަތަ އެގްޒިބިޝްން ކުރިއަށްދާނީ މިމަހުގެ 17 ވަނަ ދުވަހުން ފެށިގެން 20 ވަނަ ދުވަހުގެ ނިޔަލަށެވެ. މީގެ ކުރިންވެސް ރާއްޖެއިން ވަނީ މި ޝޯގައި ބައިވެރިވެފައެވެ. މިއީ ރާއްޖެއިން މި ޝޯގައި ބައިވެރިވާ ދެވަނަ ފަހަރެވެ.

މިއީ ރަޝިޔާ އަދި އީސްޓަން ޔޫރަޕްގައި ބާއްވާ މިފަދަ އެންމެ ބޮޑު އެއް އެގްޒިބިޝަަނަށް ވާއިރު، މި އެގްޒިބިޝަންއަކީ ކަނޑުއަޑީގެ އެކި ހަރަކާތްކާއި، މޫދު ކުޅިވަރުގެ ދާއިރާގެ ހިދުމަތްދޭ އަދި ލިބިގަންނަ ފަރާތްތަކަށް އެއްތަނަކުން ބައްދަލުކޮށް، ޕްރޮޑަކްޓްތަކާއި ސާވިސްތައް އިޝްތިހާރުކޮށް، ވިޔަފާރީގެ ގުޅުން ބަދަހިކުރުމަށް ފުރުސަތު ދިނުމުގެ މަޤްސަދުގައި ކުރިއަށް ގެންދާ އެގްޒިބިޝަން އެކެވެ. މިގޮތުން މި އެގްޒިބިޝަންގައި މި ދާއިރާގެ އިކުއިޕްމަންޓާއި، އާ ޓެކްނޮލޮޖީ އުފައްދާ ފަރާތްތަކާއި، މިދާއިރާއިން މީހުން ތަމްރީން ކުރާ ފަރާތްތަކުން ބައިވެރިވާނެއެވެ.

އެމްއެމްޕީއާރުސީއާއެކު މި އެގްޒިބިޝަންގައި ފަސް ކޯ-އެގްޒިބިޓަރުން ބައިވެރިވެއެވެ. މި ހަރަކާތުގެ ތެރެއިން ފަތުރުވެރިންނަށް ރާއްޖެއިން ލިބެން ހުންނަ މޫދު ކުޅިވަރާއި ޑައިވިން ފަދަ ހަރަކާތްތަކުގެ ހިދުމަތް އިތުރަށް ފުޅާ ކުރުމަށް މިފަދަ ހިދުމަތްތަކާ ގުޅޭ ފަހުގެ ޕްރޮޑަކްޓްތައް ތަޖުރިބާ ކުރުމުގެ ފުރުސަތާއި، މިފަދަ ޚިދުމަތް ދޭ ފަރާތްތަކާ ބައްދަލުކޮށް ވިޔަފާރީގެ ގުޅުން ބަދަހިކުރުމަށް ފުރުސަތު ލިބޭނެއެވެ.

ރަޝިޔާ އަދި ސީއައިއެސް މާކެޓަށް ގެންގުޅޭ މާކެޓިން ސްޓްރެޓަޖީގެ ދަށުން މި ފެއަރގައި އެމްއެމްޕީއާރުސީއިން ބައިވެރިވަމުން ދާއިރު، ރަޝިޔާއަކީ ރާއްޖެއަށް މިދިޔަ އަހަރު އެންމެ ގިނައިން ފަތުރުވެރިން އައި އެއް މާކެޓެވެ. 2019 ވަނަ އަހަރާ އަޅާކިޔާއިރު 2021 ވަނަ އަހަރު ރަޝިއާއިން ރާއްޖެ އައި ފަތުރުވެރިންގެ އަދަދު ވަނީ 175 އިންސައްތަ އިތުރުވެފައެވެ.