މަޑިވަރު އެއާރޕޯޓް ބޮޑުކޮށް އިންޓަރނޭޝަނަލް އެއާރޕޯޓަކަށް ހެދުމަކީ އަމާޒެއް ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.
މިކަމުގެ މަޝްވަރާތައް އެއާރޕޯޓް ތަރައްގީކުރި ކުންފުނި، ކުރެއްދޫ ހޯލްޑިންގސްއާއި އެމަނިކުފާނާ މަޝްވަރާ ކުރެއްވި ކަމަށާއި، އަދި އެއާރޕޯޓް ބޮޑުކުރުމަށް އެމްޓީސީސީއާއެކުވެސް އެމަޝްވަރާތައް ކުރަމުން އަންނަ ކަމަށް ވިދާޅުވިއެވެ.
މަޑިވަރު އެއާރޕޯޓާއެކު އަތޮޅަށް އިތުރު ތަރައްގީ އަންނާނެކަން ފާހަގަކުރައްވަމުން ރައީސް ސާލިހު ވިދާޅުވީ، ގައުމެއް ތަރައްގީވުމުގައި އެންމެ މުހިންމު ކަމަކީ ފަސޭހައިން ތަންތަނަށް މުދާ ގެންދެވުން ކަމަށާއި، މިހާރު އެކަން ފަހިވެގެން ދާނެ ކަމަށެވެ. ޅ.އަތޮޅުގައި 11 ރިސޯޓް އެބައޮތް ކަމަށާއި އިތުރު 4 ރިސޯޓް މިހާރުވެސް ތަރައްގީ ކުރަމުން އަންނަ ކަމަށެވެ.
ސަރުކާރުގެ ސިޔާސަތަކީ ވިޔަފާރިވެރިންނަށް ފަހި ފުރުސަތުތަކެއް ހޯދައިދިނުން ކަމަށާއި، ގައުމުތަރައްގީ ވެގެންދާނީ ސަރުކާރާއި އަމިއްލަ ވިޔަފާރިވެރިން ގުޅިގެން ކުރާ މަސައްކަތުން ކަމަށް ރައީސް ސާލިހު ވިދާޅުވިއެވެ. އެހެންކަމުން ސިޔާސަތުތައް ބައްޓަން ކުރަމުން އަންނަނި އަމިއްލަ ވިޔަފާރިވެރިންނަށް ހުރި ދަތިތައް ނައްތާލުމަށް ކަމަށެވެ.
މަޑިވަރުގައި އެއަރޕޯޓް އެޅުމަކީ މީގެ 16 އަހަރު ކުރިން ކުރީގެ ރައީސް މައުމޫން ނިންމަވާފައި އޮތް ނިންމުމެއް ކަމަށާއި، އޭރުވެސް އެކަމަށް މަސައްކަތްތަކެއް ކުރެވިގެން ދިޔަކަމަށް ރައީސް ވިދާޅުވިއެވެ. މިއަދަކީ އެކަން ހަގީގަތަށް ވެގެން އައި ދުވަސްކަމުގައެވެ.
އެއާރޕޯޓް އެޅުމަށް ހަވާލު ކުރެވުނީ ރިޔާސީ އިންތިޚާބެއްގެ ކެމްޕެއިންގެ މެދުތެރެއިން ކަމަށާއި، މަސައްކަތް ހަވާލު ކުރެވުނު ކުންފުނިން މަސައްކަތް ނިންމާފައިވަނީ ވަރަށް ފުރިހަމައަށް ކަމަށް ރައީސް ވިދާޅުވިއެވެ. އެއާރޕޯޓުގައި ގާއިމް ކުރެވިފައިވަނީ އެންމެ ފަހުގެ ފުރިހަމަ ވަސީލަތްތަކާއެކުގައި ކަމަށް ރައީސް ވިދާޅުވިއެވެ. އެއާރޕޯޓް ހިންގުމަށް ހަވާލު ކޮށްފައިވާ ކުންފުނި، އައިލެންޑް އޭވިއޭޝަނުން ރިސޯޓްތަކަށް ބޭނުންވާ ފެންވަރަށް ޚިދުމަތް ދެއްވާނެ ކަމަށް އުންމީދު ކުރައްވާ ކަމުގައި ރައީސް ވިދާޅުވިއެވެ.
މަޑީވަރުގައި ހުޅުވުނު އެއާރޕޯޓާއެކު ރާއްޖޭގެ އުތުރުގެ ހުރިހާ އަތޮޅެއްގައި މިހާރު އެއާރޕޯޓެއް ހުޅުވިފައިވާކަން ރައީސް ސާލިހު ފާހަގަކުރެއްވިއެވެ. ސަރުކާރުގެ އަމާޒަކީ މެނިފެސްޓޯގައިވާ ގޮތަށް 30 މިނިޓުން މީހުން ދިރިއުޅޭ ކޮންމެ ރަށަކަށް ދެވޭ ހިސާބުގައި އެއާރޕޯޓްތައް ގާއިމް ކުރުން ކަމަށާއި، މިއަހަރުގެ ތެރޭގައި އިތުރު ދެ އެއާރޕޯޓް ހުޅުވިގެންދާނެ ކަމށް ރައީސް ސާލިހު ވިދާޅުވިއެވެ. ރައީސް އިޝާރާތް ކުރެއްވީ ގދ. ފަރެސްމާތޮޑާ އަދި މ. މުލީ އެއާޕޯޓަށެވެ. މީގެ އިތުރުވެސް 7 އެއާރޕޯޓެއްގެ މަސައްކަތް ކުރިއަށް ގެންދިޔުމަށް ސަރުކާރުންވަނީ ނިންމާފައެވެ.
