ވެކްސިން ނުޖަހައިގެން މުބާރާތްތައް ނުކުޅެވުނަސް އެކަމާ ފަރުވާލެއް ނެތް: ޖޮކޮވިޗް

ކޮވިޑް-19 އަށް ވެކްސިން ނުޖަހައިގެން ޓެނިހުގެ ބޮޑެތި މުބާރާތްތައް ގެއްލުނަސް އެކަމާ މާބޮޑު ފަރުވާލެއް ނެތް ކަމަށް ދުނިޔޭގެ އެއްވަނަ ފިރިހެން ޓެނިސް ކުޅުންތެރިޔާ ސާބިޔާގެ ނޮވަކް ޖޮކޮވިޗް ބުނެފިއެވެ.

މިދިޔަ މަހުގެ ހަތަރުވަނަ ދުވަހު އޮސްޓްރޭލިއަން އޯޕަންގައި ވާދަކުރަން ޖޮކޮވިޗް އޮސްޓްރޭލިއާއަށް ދިޔަ ތަނުން އެއާޕޯޓުގައި މަޑުކޮށް އޭނާގެ ވިސާ ވަނީ ކެންސަލްކޮށްލާފައެވެ. އެކަމަކު އެ މައްސަލަ ޖޮކޮވިޗް ވަނީ ކޯޓަށް ހުށަހަޅާފައެވެ. އަދި އެ މައްސަލަ ކޯޓުން ބެލުމަށްފަހު ނިންމީ އޭނާއާ އެއްކޮޅަށެވެ. އެއީ ޑިސެމްބަރު މަހުގެ 16 ވަނަ ދުވަހު ޖޮކޮވިޗް ކޮވިޑަށް ޕޮޒިޓިވްވެފައިވުމުން، މެޑިކަލް އެގްޒެމްޕްޝަންގެ ތެރެއިން ވިސާ ލިބޭ ގޮތަށް އޮތުމުންނެވެ.

އެކަމަކު، ޖޮކޮވިޗްގެ ވިސާ އެޕްލިކޭޝަނުގައި ދީފައި ހުރި މައުލޫމާތު ދިމާނުވާތީ ފަހުން އޮސްޓްރޭލިއާގެ އިމިގްރޭޝަން މިނިސްޓަރު އަލެކްސް ހޯކް އަށް ގާނޫނުން ލިބިވަޑައިގަންނަވާ ބާރުގެ ބޭނުންކުރައްވައި ވަނީ ޖޮޮކޮވިޗްގެ ވިސާ ދެ ވަނަ ފަހަރަށް ކެންސަލްކޮށްފައެވެ. ޖޮކޮވިޗްގެ ގާނޫނީ ޓީމުން މި މައްސަލަވެސް ކޯޓަށް ވެއްދިއެވެ. އެކަމަކު މި މައްސަލަ ކޯޓުން ނިންމީ ޖޮކޮޗިޗް އާއި ދެކޮޅަށެވެ. އެހެން ކަމުން މިދިޔަ މަހު ބޭއްވި އޮސްޓްރޭލިއަން އޯޕަން މުބާރާތް ޖޮކޮވިޗަށް ވަނީ ގެއްލިފައެވެ.

މީޑިއާއަށް ދިން އިންޓަރވިއުގައި ޖޮކޮވިޗް ބުނީ، ވެކްސިން ނުޖަހައިގެން ނޫނީ އޭނާ ވެކްސިން ޖެހިކަން ކަށަވަރުކޮށްނުދީގެން އިންޓަނޭޝަނަލް ބެޑްމިންޓަނުގެ ބޮޑެތި މުބާރާތްތަކުގައި ނުކުޅެވުނު ކަމުގައި ވިޔަސް އެކަމާ ހާހެއް ނުވާ ކަމަށެވެ.

ޖޮކޮވިޗް ބުނީ އޭނާގެ މިހުރީ ވެކްސިނާ ދެކޮޅު ވިސްނުމެއްގައި ނޫން ކަމަށާއި، އެކަމަކު ކޮންމެ މީހަކަށްވެސް އެ މީހެއްގެ ހަށިގަނޑަށް ޖަހަން ޖެހޭ އެއްޗެއް ނިންމުމުގެ ބާރު އޮންނަން ޖެހޭ ކަމަށެވެ. މީގެ އިތުރުން ޖޮކޮވިޗް ބުނީ ވެކްސިނާ ބެހޭ ގޮތުން އޭނާ ނިންމާފައިވާ ނިންމުންތައް ހިއްސާކުރަން ބޭނުން ނުވާ ކަމަށެވެ. އަދި އެކަން ހިއްސާ ނުކޮށްގެން ޓެނިހުގެ ބޮޑެތި މުބާރާތްތައް ގެއްލުނު ކަމުގައިވިޔަސް އެކަމާ ފަރުވާލެއް ނެތް ކަމަށް ޖޮކޮވިޗް ބުނިއެވެ.

ކޮވިޑް-19ގެ ބަލިމަޑުކަން ނައްތާލަން ނޫނީ ކޮންޓްރޯލްކުރަން މުޅި ދުނިޔޭގައި ކުރަމުން އަންނަ މަަސައްކަތް ބަލައިގަންނަ ކަމަށް ޖޮކޮވިޗް ވަނީ ބުނެފައެވެ.

ދުނިޔޭގެ ރޭންކިންގެ އެއް ވަނައިގައި 359 ވަނަ ހަފްތާ ގުނަމުން އަންނަ ޖޮކޮވިޗް، ވަނީ ގްރޭންޑް ސްލޭމް ޓެނިހުގެ 20 މުބާރާތް ކާމިޔާބުކޮށްފައެވެ.