ހޯމަ ދުވަހު އަތޮޅުތެރެއިން 728 ޕޮޒިޓިވް ކޭސް
މާލޭގެ ޕޮޒިޓިވިޓީ ރޭޓް ހުރީ 11 އިންސައްތާގައި
ރޯދަ މަހުގެ ފުރަތަމަ ދުވަހު މާލޭގެ މަގުމަތި
ހޯމަ ދުވަހު މުޅި ރާއްޖެއިން ކޮވިޑަށް ޕޮޒިޓިވްވީ 1015 މީހުން ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ހާމަކޮށްފިއެވެ.
އެޗްޕީއޭއިން ބުނީ އާދިއްތަ ދުވަހުގެ އިރުއޮއްސި 6:00 އިން ހޯމަ ދުވަހުގެ އިރުއޮއްސި 6:00 އަށް 5،042 ސާމްޕަލެއް ޓެސްޓުކޮށްފައިވާއިރު މާލެ ސަރަހައްދުން ޓެސްޓުކޮށްފައިވަނީ 1،661 ސާމްޕަލެވެ.
އާދީއްތަ ދުވަހު ޕޮޒިޓިވް ވީ މީހުންގެ ތެރޭގައި ހިމެނެނީ މާލެ ސަރަހައްދުން ޕޮޒިޓިވްވި 182 މީހުންނާއި, އަތޮޅުތެރެއިން 728 މީހުންނާއި ރިސޯޓުތަކުން 44 މީހުން ކަމަށް އެޗްޕީއޭއިން ބުނެފައިވެއެވެ. އަދި 61 މީހުން ޕޮޒިޓިވްވެފައިވަނީ ކޮން ސަރަހައްދަކުންކަން ދެނެގަނެވިފައިނުވާ ކަމަށް އެޗްޕީއޭ އިން ބުންޏެވެ.
މިއާއެކު ކޮވިޑަށް ޕޮޒިޓިވްވީ މީހުންގެ ޖުމްލަ 160،076 އަށް ވަނީ އަރާފައެވެ. މިވަގުތު އެކްޓިވް ކޭހުގެ ގޮތުގައި 15,818 ކޭހެއް ގުނަމުންދެއެވެ. މީގެތެރެއިން ހޮސްޕިޓަލުގައި އެޑްމިޓުކޮށްގެން ފަރުވާ ދެމުންދަނީ 29 މީހުންނަށެވެ.
މިހާތަނަށް ބަލިން ފަސޭހަވެފައިވަނީ 143,956 މީހުންނެވެ. އަދި 289 މީހުން ވަނީ ބަލީގައި ނިޔާވެފައެވެ.
މިހާރު ފެންނަ ކޮވިޑު ކޭސްތަކުގެ އަދަދު އިތުރުވެފައިވާއިރު, ކޮވިޑުން ރައްކާތެރިވުމަށް އަޅަންޖެހޭ ފިޔަވަޅުތަކަށް ސަމާލުކަން ދިނުމަށް ކަމާބެހޭ ފަރާތްތަކުން އަންނަނީ ތަކުރާރުކޮށް އިލްތިމާސް ކުރަމުންނެވެ.
