މިލާން އެއްވަނައަށް ، ޔުވެންޓަސް އެއްވަރު

އިޓާލިއަން ލީގުގައި ސަމްޑޯރިއާ ބަލިކޮށް އޭސީ މިލާނުން ލީގު ތާވަލުގެ އެއްވަނައަށް ޖެހިލިއިރު، އެޓަލާންޓާ އަތުން ޔުވެންޓަސް އެއްވަރުވެއްޖެއެވެ.

މިލާންގެ ދަނޑުގައި އާދީއްތަ ދުވަހު ކުޅުނު މި މެޗު އެޓީމުން ކާމިޔާބުކުރީ 1-0 ގެ ނަތީޖާއަކުންނެވެ.

މެޗުގެ ވަރަށް ކުރީކޮޅު މިލާނުން ވަނީ ލަނޑު ޖަހާ ލީޑު ނަގައިފައެވެ. މެޗުގެ 8 ވަނަ މިނެޓުގައި މި ލަނޑު އެޓީމަށް ކާމިޔާބުކޮށްދިނީ ރަފައެލް ލެއާއޯއެވެ. މިއީ މިލާންގެ ކީޕަރު މައިކް މައިންގްނޯންގެ އެހީތެރިކަމާއެކު އޭނާ ކާމިޔާބުކުރި ލަނޑެކެވެ.

މި ލަނޑަށްފަހުވެސް މިލާނުން ވަނީ ސަމްޑޯރިއާގެ ގޯލަށް ނުރައްކާކޮށް ގިނަ ހަމަލާތަކެއް ފޮނުވާލަން މަސައްކަތް ކޮށްފައެވެ. އެކަމަކު ސަމްޑޯރިއާގެ ޑިފެންޑަރުން ވަނީ މިލާން ކުޅުންތެރިން ހުއްޓުވައިފައެވެ.

މެޗުގެ ދެވަނަ ހާފުގައި މިލާންގެ ފްރާންސް ފޯވާޑް އޮލިވިއޭ ޖިރޫޑްއަށް ވަނީ ލަނޑު ޖަހަން ފުރުސަތުތަކެއް ލިބި ބޭކާރުވެފައެވެ. އެގޮތުން ޖިރޫޑް ފޮނުވާލި ދެ ހަމަލާއެއް ސަމްޑޯރިއާގެ ކީޕަރު ވްލަޑިމީރޯ ފަލްކޯނޭ ވަނީ ދިފާއުކޮށްފައެވެ. މީގެ އިތުރުން މިލާންގެ ސަންޑްރޯ ޓޮނާލީ އާއި ފްރޭންކް ކެސިއޭއަށް ލިބުނު ފުރުސަތުތަކުގެ ބޭނުން ނުހިފުނެވެ.

މީގެ އިތުރުން އާދީއްތަ ދުވަހުގެރޭ އެޓަލާންޓާ އާއި ޔުވެންޓަސް ބައްދަލުކުރި މެޗު އެއްވަރުވީ 1-1 ގެ ނަތީޖާއަކުންނެވެ.

އެޓަލާންޓާގެ ދަނޑުގައި ކުޅުނު މި މެޗު ފަށައިގެން ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މެޗުގެ 14 ވަނަ މިނެޓުގައި ޔުވެންޓަސްގެ ހުނަރުވެރި ފޯވާޑް ޕައުލޯ ޑިބާލާއަށް ވަނީ ލަނޑު ޖަހަން ރަނުގެ ފުރުސަތެއްލިބި ބޭކާރުވެފައެވެ. އޭރިއާ ތެރެއިން ޑިބާލާ ފޮނުވާލި ހަމަލާ ދިޔައީ ގޯލުގެ އަރިމަތީ ދަނޑިކައިރިން ބޭރަށެވެ.

މެޗުގެ ދެވަނަ ހާފުގައި މާޓިން ޑި ރޫން ފޮނުވާލި ހަމަލާގެ ހުރަހަކަށްވީ ޔުވެންޓަސްގެ ކީޕަރު ވޮއިޒެކް ޝެޒްނީއެވެ.

މެޗުގައި ފުރަތަމަ ލަނޑު ޖަހާ ލީޑު ނަގާފައިވަނީ އެޓަލާންޓާއިންނެވެ. މެޗުގެ 76 ވަނަ މިނެޓުގައި މި ލަނޑު އެޓީމަށް ކާމިޔާބުކޮށްދިނީ ރުސްލާން މުލޮނޯސްކީއެވެ.

ޔުވެންޓަސްއިން މެޗުގައި އެއްވަރުކުރީ ފަހު ވަގުތު ޑެނީލޯ ކާމިޔާބުކުރި ލަނޑުންނެވެ. މިއީ ޑިބާލާގެ އެހީތެރިކަމާއެކު އޭނާ ކާމިޔާބުކުރި ލަނޑެކެވެ.

މި ނަތީޖާތަކާއެކު ލީގު ތާވަލުގެ އެއްވަނައަށް މިލާން ޖެހިލީ ކުޅުނު 25 މެޗުން 55 ޕޮއިންޓް ހޯދައިގެންނެވެ. ދެވަނައިގައި އިންޓަ މިލާނުން އޮތީ އެއް މެޗު މަދުން ކުޅެ ލިބުނު 54 ޕޮއިންޓާއެކުގައެވެ. ތިންވަނައިގައި އޮތް ނާޕޮލީއަށް 25 މެޗުން 53 ޕޮއިންޓް ލިބިފައިވާއިރު ހަތަރުވަނައިގައި ޔުވެންޓަސް އޮތީ 25 މެޗުން 46 ޕޮއިންޓް ހޯދައިގެންނެވެ.