100 ކިލޯ ޑްރަގް މައްސަލަ ތާވަލުގައި ނުހިމެނުނީ އިދާރީ އޮޅުމަކުން: ކްރިމިނަލް ކޯޓު
މި މައްސަލައާއި ގުޅިގެން 10 މީހަކު ފުލުހުންގެ ބެލުމުގެ ދަށަށް ގެންދިޔަ
ރާއްޖެއަށް 100 ކިލޯއަށް ވުރެ ގިނަ މަސްތުވާތަކެތި އެތެރެކުރިކަމުގެ ތުހުމަތުގައި ހައްޔަރުކުރި 10 މީހުންގެ ތެރެއިން ފުލުހުން ވަނަވަރު ހާމަ ކުރި މީހުން
100 ކިލޯގެ ޑްރަގް މައްސަލައިގައި ހިމެނޭ މީހުންގެ މައްޗަށް އުފުލާފައިވާ ދައުވާތަކުގެ އަޑުއެހުންތަކުގެ ތަފްސީލު ކްރިމިނަލް ކޯޓުގެ ތާވަލުގައި ނުހިމެނުނީ އިދާރީ އޮޅުމެއްގެ ސަބަބުންކަމަށް އެ ކޯޓުން ބުނެފިއެވެ.
ކްރިމިނަލް ކޯޓުގައި މި މައްސަލައިގެ 3 ދައުވާއަކާއި ގުޅޭ ގަޒިއްޔާތަކެއް ކުރިއަށް ދެއެވެ. އެއީ ޑައިމޯފިންޓްރެފިކް ކުރުމުގެދައުވާތަކަކާއި، ޑައިމޯފިން ބޭނުން ކުރުމުގެ ދައުވާތަކެއްގެ އިތުރުން، ކެނެބިސް ބޭނުން ކުރުމުގެ ދައުވާތަކެކެވެ.
މި މައްސަލައިގެ އަޑުއެހުމެއް އާދިއްތަ ދުވަހު ކްރިމިނަލް ކޯޓުގައި ކުރިއަށް ގެންގެންދާގޮތަށް އޮތިހަމަޖެހިފައެވެ . އެހެންނަމަވެސް، މި އަޑުއެހުން އޮންނާނެކަން ކޯޓުގެ ތާވަލުން ފެންނާކަށް ނެތެވެ. އެކަމާ ގުޅޭގޮތުން ރާއްޖެއެމްވީން ސުވާލު ކުރުމުން ކްރިމިނަލް ކޯޓުން ބުނީ، އެ ގަޒިއްޔާތަކުގެ ތެރެއިން އެއް ގަޒިއްޔާ ކުރިއަށް ގެންދަނީ ސިއްރު އަޑުއެހުމެއްގެ ގޮތުގައިކަމަށްވާތީ ތާވަލު އަޕްޑޭޓް ކުރުމުގައި އިދާރީ އޮޅުމެއް އަރާފައިވާ ކަމަށެވެ. މައްސަލަ ތާވަލުގައި ނުހިމެނުނީ އެހެންވެގެން ކަމަށް ކޯޓުން މައުލޫމާތު ދެއެވެ.
ސިއްރު ކޮށްގެން ކުރިއަށް ގެންދާ އަޑުއެހުންތައްވެސް ކްރިމިނަލް ކޯޓުގެ ތާވަލުން ފެންނަން އޮވެއެވެ. އެގޮތުން އާދިއްތަ ދުވަހު އެގަޑީގައި ކުރިއަށް ގެންދިޔަ ޓެލެގްރާމް ގްރޫޕުތަކެއް ހިންގި މައްސަލައިގައި މީހެއްގެ މައްޗަށް އުފުލާފައިވާ ދައުވާއަކީވެސް ސިއްރު ކޮށްގެން ކުރިއަށްގެންދާ އަޑުއެހުމެކެވެ. އެހެންނަމަވެސް އެ މައްސަލަވެސް ތާވަލުން ފެންނާން އޮތެވެ.
ރާއްޖެއެމްވީއަށް މައުލޫމާތު ލިބިފައިވާ ގޮތުގައި މި މައްސަލައިގައި އާދިއްތަ ދުވަހު ކުރިއަށް ގެންދާގޮތަށް އޮތް އަޑުއެހުން ފަހުން ވަނީ ކެންސަލްކޮށްފައެވެ. ސަބަބަކީ 2 ބިދޭސީއަކުވެސް ހިމެނޭ މި މައްސަލައިގެ އަޑުއެހުމަށް ތަރުޖަމާނަކު ހާޒިރުވެފައިނުވާތީއެވެ. ދެން މި މައްސަލައިގެ އަޑުއެހުމެއް އޮންނާނީ 17 ފެބްރުއަރީގައެވެ. އަދި 28 ފެބްރުއަރީގައިވެސް މައްސަލައިގެ އަޑުއެހުމެއް ވަނީ ތާވަލުކޮށްފައެވެ.
މުޅި މި މައްސަލައާއި ގުޅިގެން 10 މީހަކު ފުލުހުންގެ ބެލުމުގެ ދަށަށް ގެންދިޔައެވެ.
1- ހދ. ކުމުންދޫ، ޑިއާފުރެންޑް، އިބްރާހީމް ސިނާން
2- ގއ. ކޮލަމާފުށި، ސޯސަންގެ، އިބްރާހީމް ޒައިދު ހަބީބު
3- ކ މާފުށި ސްވީޓްމީޑް އަހުމަދު މާހިރު
4- ނ. ވެލިދޫ، ބީޗްހެވެން، ޖުމާން މުސްތަފާ
5- ލ. ކަލައިދޫ، ޖަނަވަރީމާގެ، މުހައްމަދު އަހްމަދު
6- ދ. ބަނޑިދޫ، ޕޮލާރިސް، މުހައްމަދު ހުސައިން
7- ޑީއެމް މޮބިން (ބަންގްލަދޭޝް)
8- އެމްޑީ ރަފީޤުލް އިސްލާމް (ބަންގްލަދޭޝް)
9- ގއ ދެެއްވަދޫ ދޭލިޔާގޭ މިދުހަތު އިބްރާހިމް
10- މ ކޮޅުފުށި ޒަހީރާ މަންޒިލް، އަހުމަދު ޝިރުހާން ޝަމީމް
މި މައްސަލައިގައި މިދުހަތު އިބްރާހިމްއާއި އަހުމަދު ޝިރުހާން ޝަމީމް ފިޔަވައި ދެން ތިބި އެންމެންގެ މައްޗަށް ވަނީ ޑައިމޯފިން ޓްރެފިކް ކުރުމުގެ ކުށުގެ ދައުވާ އުފުލާފައެވެ. އަދި މުޙައްމަދު ހުސައިންގެ މައްޗަށް ޑައިމޯފިން ބޭނުން ކުރުމުގެ ކުށުގެ އިތުރު ދައުވާއެއްވެސް އުފުލާފައިވާއިރު، މިދުހަތާއި ޝިރުހާންގެ މައްޗަށް މި މައްސަލައިގައި އުފުލާފައިވަނީ ކެނެބިސް ބޭނުން ކުރުމުގެ ކުށުގެ ދައުވާއެވެ. އެ ދައުވާ އެ ދެމީހުންގެ އިތުރުން މި މައްސަލައިގައި ހިމެނޭ ޖުމާން މުސްތަފާއާއި، ރަފީޤުލް އިސްލާމްއާއި، މުޙައްމަދު އަހުމަދުގެ މައްޗަށްވެސް އުފުލާފައިވެއެވެ.
މި މައްސަލައިގައި ސިއްރުކޮށްގެން ކުރިއަށް ގެންދަނީ ކެނެބިސް ބޭނުން ކުރުމުގެ ކުށުގެ ދައުވާއެވެ. އެގޮތުން ނޫސްވެރިން ވަނުމަށް ދައުވާލިބޭ ފަރާތްތަކުން އިއުތިރާޒު ކުރުމާއި ގުޅިގެން މައްސަލަ ބައްލަވާ ގާޒީ ދީބާނާޒް ފަހުމީ ވަނީ ދިފާއީ ވަކީލުގެވެސް އެދިލެއްވުމުގެ މަތިން އެ ގަޒިއްޔާސިއްރުކުރައްވާފައެވެ. އެ ދުވަހު ސިއްރު ކޮށްގެން ކުރިއަށްދިޔަ އަޑުއެހުމުގައި ކެނެބިސް ބޭނުންކުރުމުގެ ދައުވާ އުފުލާފައިވާ މީހުންގެ ބައި ކުރިއަށް ގެންގޮސްފައި ނުވަނީ އެކަކު ހާޒިރު ނުވުމުންނާއި، ދައުވާ ލިބޭ ބައެއް ފަރާތްތަކަށް ލިޔެކިޔުންތައް ލިބިފައިނުވާތީކަމަށް ރާއްޖެއެމްވީއަށް ވަނީ މައުލޫމާތު ލިބިފައެވެ.
