މާލެ ސަރަހައްދާއި އައްޑޫ ސިޓީގައި ފުލުހުން ބޮޑީވޯން ކެމެރާ ބޭނުންކުރަން ފަށައިފި
13 ފެބުރުއަރީ 2022 | އާދީއްތަ 07:12މިއަދަކީ ދިވެހި ރައްޔިތުންގެ ސަލާމަތާއި ރައްކާތެރިކަމާއި ޓެކްނޮލޮޖީގެ ދާއިރާއިން ދިވެހި ފުލުހުންގެ ހިދުމަތް އިތުރު ހަރުފަތަކަށް ގިރާ ކުރި ދުވަހެއް
ދިވެހި ފުލުހުންގެ ހިދުމަތުން ބޭނުންކުރަން ފެށި ބޮޑީވޯން ކެމެރާ
ގްރޭޓަރ މާލެ ސަރަހައްދުގެ އިތުރުން އައްޑޫ ސިޓީގައި ދިވެހި ފުލުހުންގެ ހިދުމަތުން ބޮޑީވޯން ކެމެރާ ބޭނުންކުރަން ފަށައިފިއެވެ.
ދިވެހި ފުލުހުންގެ ހިދުމަތުން ބޮޑީވޯން ކެމެރާ ނުވަތަ ފުލުހުންގެ ޔުނީފޯމްގައި ހަރުކޮށްފައި ހުންނަ ކެމެރާ ބޭނުންކުރަން ފަށާފައިވަނީ އާދީއްތަ ދުވަހުން ފެށިގެންނެވެ. އަދި މި އިފްތިތާހުކޮށްފައިވަނީ މިކަމަށްޓަކައި އިސްކަންދަރުކޮށީގައި ބޭއްވި ރަސްމިއްޔާތުގައެވެ.
ބޮޑީ ވޯން ކެމެރާގެ މަސައްކަތަކީ ދިވެހި ފުލުހުންގެ ހިދުމަތް ޓެކްނޮލޮޖީގެ ދާއިރާއިން ކުރިއަރުވައި ތަރައްގީކުރުމުގެ ޕްލޭންގެ ދަށުން ކޮމިޝަނަރ އޮފް ޕޮލިސް މުހައްމަދު ހަމީދުގެ އިސްނެންގެވުމާއެކު މީގެ 2 އަހަރެއްހާ ދުވަސް ކުރިން ފެށިގެންދިޔަ މަސައްކަތެކެވެ. ދިވެހި ފުލުހުންގެ ހިދުމަތަށް ބޮޑީވޯން ކެމެރާ ތައާރަފް ކުރުމުގެ ގޮތުން އަޖުމަ ބެލުމަށް ދުނިޔޭގެ ނަން މަޝްހޫރު 2 ކެމެރާ ބްރޭންޑެއްގެ ޕައިލެޓް ޕްރޮޖެކްޓެއް ކުރިއަށް ގެންދެވިފައިވެއެވެ.
މި ޕައިލެޓް ޕްރޮޖެކްޓްތަކުގެ އަލީގައި ކެމެރާތަކަކީ ދުނިޔޭގައި ކުރިއަރާފައިވާ އެހެން ގައުމުތަކެކޭ އެއްގޮތަށް ދިވެހި ފުލުހުންގެ ހިދުމަތުގައި ވެސް ބޭނުންކުރެވިދާނެ އެއްޗެއްކަން އެނގިގެން ދިޔައެވެ. މިއަދަކީ ދިވެހި ރައްޔިތުންގެ ސަލާމަތާއި ރައްކާތެރިކަމާއި ޓެކްނޮލޮޖީގެ ދާއިރާއިން ދިވެހި ފުލުހުންގެ ހިދުމަތް އިތުރު ހަރުފަތަކަށް ގިރާ ކުރި ދުވަހެކެވެ. މި މަސައްކަތަކީ ފުލުހުންގެ ކަމާއިގުޅޭ ހުރިހާ ދާއިރާތަކެއްގެ ބައިވެރިވެ ކުރެވުނު ގިނަ ގުނަ މަސައްކަތެއް ނިމުމަކަށް އައިސް އޭގެ ނަތީޖާ ހާސިލްކުރެވިގެންދާ ދުވަހެވެ.
ބޮޑީވޯން ކެމެރާ ތައާރަފް މަރުހަލާތައް ކަޑައްތުކޮށް ލޯންޗިންއާއި ހަމައަށް އައުމަށްޓަކައި މޮޓޮރޮއްލާ ސޮލިއުޝަން އަދި އެކްސޮން ޕްރޮޑަކްޓްގެ ޑިސްޓްރިއުބިއުޓަރުން ޕައިލެޓް ޕްރޮޖެކްޓްތައް ކުރިއަށް ގެންގޮސްފައިވެއެވެ. އަދި ފުލުހުން ބޭނުންކުރަން ފަށާފައިވަނީ އެކްސޮން ބްރޭންޑްގެ ކެމެރާއެވެ.
ފީލްޑްގައި މަސައްކަތް ކުރާ ފުލުހުން މިމަހުގެ ތެރޭގައި ބޮޑީ ކެމެރާ ބޭނުންކުރަން ފަށާނެކަމަށް ރައީސުލްޖުމްހޫރިއްޔާ އިބްރާޙިމް މުޙައްމަދު ސާލިޙު ވަނީ މިއަހަރަށް ރައްޔިތުންގެ މަޖިލިސް ހުޅުވި ޖަލްސާގައި ރިޔާސީބަޔާން އިއްވަމުން ވިދާޅުވެފައެވެ. ރައީސް ވިދާޅުވެފައިވަނީ ދިވެހި ފުލުހުންގެ ޚިދުމަތް އިތުރަށް ހަރުދަނާކޮށް ޖަވާބުދާރީކުރުވުމަށް، ޒަމާނީ ޕޮލިސިންގ ފަލްސަފާއެއް މިހާރު އެމުއައްސަސާގައި އޮތްކަމަށެވެ. އެގޮތުން ފީލްޑްގައި މަސައްކަތްކުރާ ފުލުހުން މިމަހުގެ ތެރޭގައި ބޮޑީކެމެރާ ބޭނުންކުރަން ފަށާނެކަމަށް ރައީސް ވިދާޅުވިއެވެ.
ރައީސް ވިދާޅުވީ ފުލުހުންގެ ތަހްޤީގުތައް މިހާރަށްވުރެ ޒަމާނީވެ ފުރިހަމަވާން އެބަޖެހޭކަމަށެވެ. ފުލުހުންގެ ޚިދުމަތް ފުޅާކުރުމަށް ބޭނުންވާ އިތުރު ފުލުހުންނާއި، ތަމްރީނު އަދި ވަސީލަތް ސަރުކާރުން ފޯރުކޮށްދޭނެކަން ރައީސް ފާހަގަކުރެއްވިއެވެ. އެގޮތުން އަމާޒަކީ ދިވެހި ފުލުހުންގެ ޚިދުމަތަށް ރައްޔިތުންގެ އިތުބާރާއި ޔަޤީންކަން އިތުރުކުރުންކަން ފާހަގަކުރައްވައި ރައީސް ވިދާޅުވީ، މުދަލާއި ހަށިފުރާނައިގެ ރައްކާތެރިކަމުގައި އަބަދުވެސް ރައްޔިތުންނާއި އެންމެ ގާތުގައި ތިއްބަވާ ދިވެހި ޤައުމީ ފައުޖަކީ ދިވެހި ފުލުހުން ކަމަށެވެ.
ބޮޑީވޯން ކެމެރާގެ ސަބަބުން ފުލުހުންގެ މަސައްކަތަށް އިތުރު ފުރިހަމަކަމެއް ލިބިގެންދާނެ ކަމަށް ފުލުހުން ބުނެއެވެ. އެގޮތުން އަދި ފުލުހެއްގެ މައްސަލައަކާ ގުޅިގެން އާންމު ރައްޔިތަކާ ބައްދަލުކުރި ނަމަވެސް، ކެމެރާގެ ސަބަބުން ދެއްކި ވާހަކަތަކުގެ ހެކި ލިބެން ހުންނާނެއެވެ. އަދި ފުލުހެއްގެ މައްސަލައެއް ހުށަހެޅިއްޖެ ހާލަތެއްގައިވެސް ހެކި ލިބުން ފަސޭހަވެ، މައްސަލަ ބަލަން އިތުރު ފަސޭހަތަކެއް ވެގެންދާނެ ކަމަށާއި، ފުލުހުން މަސައްކަތްކުރާ މިންވަރުވެސް ދެނެގަތުމަށް ލުއިތަކެއް ލިބިގެންދާނެ ކަމަށްވެސް ފުލުހުން ބުނެއެވެ.
ފުލުސް އޮފިސަރުންގެ ޔުނީފޯމުގައި ބޮޑީ ކެމެރާ ހަރުކޮށްގެން މަސައްކަތްކުރުމަކީ އެހެން ގައުމުތަކުންވެސް ކުރަމުން އަންނަ ކަމެކެވެ. އެގޮތުން ދުނިޔޭގެ އެހެނިން ގައުމުތަކުގައި މި ކެމެރާ އާންމުކޮށް ހަރުކޮށްފައި ހުންނަނީ ފުލުހުން ބޭނުންކުރާ ހެލްމެޓް ނުވަތަ އައިނުގައެވެ. ދުނިޔޭގެ އެންމެ މަޝްހޫރު އެއް އޮޕަރޭޝަން ކަމަށްވާ އުސާމާ ބިއްލާދިނަށް ދެވުނު ހަމަލާވެސް ރިކޯޑު ކުރެވިފައިވަނީ ހަމަ މިފަދަ ބޮޑީ ކެމެރާއެއްގެ ސަބަބުންނެވެ. މީގެ އިތުރުން އެމެރިކާގައި ކަޅު ނަސްލުގެ ޖޯޖް ފްލޮއިޑް ހައްޔަރުކުރުމުގެ ތެރޭގައި ދޮން ނަސްލުގެ ފުލުހަކު އަމަލުކުރި ގޮތުގެ ސަބަބުން ޖޯޖް މަރުވި ހާދިސާގައި ފުލުސް މީހާގެ މައްޗަށް ކުށް ސާބިތުކުރުމަށް ވެސް ބޮޑީވޯން ކެމެރާގެ ފުޓޭޖް ބޭނުންކޮށްފައިވެއެވެ.
