އައިޖީއެމްއެޗްގެ ލެބޯޓްރީގެ ޚިދުމަތްދޭ ގަޑިތަކަށް ބަދަލު ގެނެސްފި

އިންދިރާ ގާނދީ މެމޯރިއަލް ހޮސްޕިޓަލް (އައިޖީއެމްއެޗް)ގެ ލެބޯޓްރީ އޯޕީޑީ ޚިދުމަތްދޭ ގަޑި ތަކަށް ބަދަލުގެނެސްފިއެވެ.

އައިޖީއެމްއެޗުން ބުނީ ރާއްޖޭގައި މިވަގުތު ހަލުވިކަމާއެކު ފެތުރެމުންދާ ކޮވިޑް-19 ގެ ބަލިމަޑުކަމާ ގުޅިގެން ހޮސްޕިޓަލުގެ ލެބޯޓްރީ އޯޕީޑީގެ ޚިދުމަތްދޭ ގަޑިތަކަށް ބަދަލު ގެނެސްފައިވީ ނަމަވެސް މިހާރު އަލުން ވަގުތު އިތުރުކޮށްފައިވާ ކަމަށެވެ. ކޮވިޑް 19 އާ ގުލިގެން މިވަގުތު ލެބޯޓްރީއިން ލޭ ނެގުމުގެ ޚިދުމަތް ދެމުންގޮސްފައިވަނީ ބަންދުނޫން ކޮންމެ ދުވަހެއްގެ ހެނދުނު 08:00ން މެންދުރު 2:00އާހަމައަށް ކަމަށް ވީނަމަވެސް 2022 ފެބްރުއަރީ 13 އިން ފެށިގެން މި ޚިދުމަތް ދެމުންދާ ވަގުތު އިތުރު ކޮށް، ކުރިއެކޭ ވެސް އެއްގޮތަށް ޚިދިމަތް ދިނުމަށް ނިންމާފައިވާ ކަމަށް އައިޖީއެމްއެޗުން ބުނެއެވެ.

އެގޮތުން ދެން މި ޚިދުމަތް ދެމުންދާނީ ބަންދު ނޫން ކޮންމެ ދުވަހެއްގެ ހެނދުނު 08:00ން ހަވީރު 4:00އަށެވެ. އަދި ނަންބަރު ދޫކުރަން ފެށުމަށް ހަމަޖެހިފައިވަނީ ހެނދުނު 07:45ން ފެށިގެން ކަމަށް އައިޖީއެމްއެޗުން ބުނެއެވެ.

އައިޖީއެމްއެޗްގެ ލެބޯޓްރީ އޯޕީޑީ ޚިދުމަތްތަކަށް ބަދަލުގެނެސްފައިވާއިރު، ކޮވިޑް-19ގެ ހާލަތު ގޯސްވުމާގުޅިގެން ހުއްޓާލި ބައެއް ސަރޖަރީތައް ވެސް ވަނީ އަލުން ފަށާފައެވެ. ހޮސްޕިޓަލްގެ ޚިދުމަތްތައް ފުޅާކޮށް، ރައްޔިތުންނަށް ލުއި ފަސޭހަ ޚިދުމަތްތަކެއް ފޯރުކޮށްދިނުމަށް ގިނަ މަސައްކަތްތަކެއް ކުރަމުންދާ ކަން އައިޖީއެމްއެޗުން ފާހަގަކޮށްފައިވެއެވެ.