މިއަހަރުގެ ޖެނުއަރީ މަހު ޕީޖީ އޮފީހުން 224 ދައުވާއެއް ހުށައަޅާފައިވޭ، އެންމެ ގިނަ ދައުވާ ކްރިމިނަލް ކޯޓަށް

މިއަހަރުގެ ޖެނުއަރީ މަހު ޕީޖީ އޮފީހުން 224 ދައުވާއެއް ހުށައަޅައިފިއެވެ.

އެކަމާއި ގުޅޭގޮތުން ޕްރޮސެކިއުޓަރ ޖެނެރަލް (ޕީޖީ) ހުސައިން ޝަމީމް ވިދާޅުވީ، ޖެނުއަރީ މަހު އެކަނިވެސް ޕީޖީ އޮފީހުން 151 މީހެއްގެ މައްޗަށް ޖުމުލަ 224 ދައުވާއެއް އުފުލާފައިވާ ކަމަށެވެ. އެގޮތުން ދައުވާ އުފުލާފައިވާ މީހުންގެ އެވްރެޖް އުމުރަކީ 29 އެވެ.

ޝަމީމް ވިދާޅުވި ގޮތުގައި 36 ކޯޓަކަށް ޕީޖީ އޮފީހުން ވަނީ ދައުވާތައް ހުށައަޅާފައެވެ. އޭގެ ތެރެއިން ކްރިމިނަލް ކޯޓަށް 97 ދައުވާއެއް ހުށައަޅާފައިވެއެވެ. އޭގެ ތެރޭގައި ޤާނޫނު ހިންގުމަށް ހުރަސްއެޅުމުގެ ކުށުގެ ދައުވާއާއި، ހުއްދަނަގައިގެން ކުރަންޖެހޭ ކަމެއް ހުއްދަ ނުނަގައި ކުރުމާއި ގުޅޭ މައްސަލަތަކާއި، ހުއްދަނޫން ގޮތުގައި މީހުން ހިފެހެއްޓުމުގެ މައްސަލަތައް ގިނަކަން ފާހަގަ ކުރައްވައި ޝަމީމް ވަނީ އެއީ އަހަރު ފެށޭ މަހަށް ޚާއްޞަ "ސީޒަނަލް" މައްސަލަތައް ކަމަށް ސިފަ ކުރައްވާފައެވެ.

މި މުއްދަތުގައި ޑްރަގް ކޯޓަށް 47 ދައުވާއެއް ވަނީ ހުށައަޅާފައެވެ. އަދި ހުޅުމާލޭ ކޯޓަށް 16 ދައުވާއެއް ހުށައަޅާފައިވާއިރު، މާފުށީ ކޯޓަށް ވަނީ 6 ދައުވާއެއް ހުށައަޅާފައެވެ.

އޭގެ އިތުރުން، ފުވައްމުލަކު ކޯޓަށްވެސް 5 ދައުވާއެއް ހުށައަޅާފައިވާކަމަށް ޝަމީމް ވިދާޅުވިއެވެ.

ޝަމީމް ވަނީ ޕީޖީ އޮފީހުން ހުށައަޅާފައިވާ އެކި ދައުވާތަކާއި ގުޅިގެން ކޯޓުތަކުން ނިންމާފައިވާ މައްސަލަތަކުގެ ތަފްސީލުވެސް ހިއްސާ ކުރައްވާފައެވެ. އެގޮތުން ޖެނުއަރީ މަހު ކޯޓުތަކުން 169 މައްސަލައެއް ނިންމާފައިވާކަން ޝަމީމް ފާހަގަ ކުރެއްވިއެވެ. އޭގެ ތެރެއިން 58 އިންސައްތަ މައްސަލައަކީ ޑްރަގް ކޯޓުން ނިންމާފައިވާ މައްސަލަތަކެވެ.

ޑްރަގް ކޯޓުން ނިންމާފައިވާ މައްސަލަތައް ނުހިމަނައި 71 މައްސަލައެއްގައި ކުށް ސާބިތުވާކަމަށް ވަނީ ކަނޑައަޅާފައެވެ. އެއީ ނިމިފައިވާ މައްސަލަތަކުގެ 69 އިންސައްތަކަން ޝަމީމް ފާހަގަ ކުރެއްވިއެވެ. އޭގެ ތެރޭގައި ކުޑަކުދިންނަށް ޖިންސީ ގޯނާ ކުރުމާއި ގުޅޭ 2 މައްސަލައެއްވެސް ހިމެނޭއިރު، 24 އިންސައްތަ މައްސަލައިގައި ކުށް ސާބިތުނުވާކަމަށް ވަނީ ކަނޑައަޅާފައެވެ.

ކްރިމިނަލް ކޯޓުން ނިންމާފައިވާ މައްސަލަތަކަށް ބަލާއިރު، އެ ކޯޓުން އެންމެ ގިނަ މައްސަލަ ނިންމެވީ ފަނޑިޔާރު އާދަމް މުޙައްމަދުކަމަށް ޝަމީމް ވިދާޅުވިއެވެ. އެއީ 9 މައްސަލައެވެ. އަދި ފަނޑިޔާރު ދީބާނާޒް ފަހުމީ 6 މައްސަލަ ނިންމަވާފައިވާއިރު، ފަނޑިޔާރު އިސްމާޢީލް ޝަފީޢު 5 މައްސަލަ ނިންމަވާފައިވެއެވެ. މެޖިސްޓްރޭޓް ކޯޓުތަކުން އެންމެ ގިނަ މައްސަލަ ނިންމެވީ ކ. ހިންމަފުށީ މެޖިސްޓްރޭޓް ކޯޓުގައި ފަނޑިޔާރު އިބްރާހީމް ޝަކީބްކަމަށް ޝަމީމް ވިދާޅުވިއެވެ. އެއީ 5 މައްސަލައެވެ.

ޝަމީމް ވިދާޅުވި ގޮތުގައި މަޢުލޫމާތު ސިއްރުނުކޮށް ޢާންމުކުރުމަކީ ދައުލަތުގެ އިދާރާތަކުގެ ހިންގުމުގެ ދާއިރާގެ އެންމެ އަސާސީ އެއްބައެވެ. އެގޮތުން ކޮންމެ މަހެއްގެވެސް ފުރަތަމަ ހަފްތާގެ ތެރޭގައި، ވޭތުވެދިޔަ ހަފްތާގައި ޖިނާއީ ޢަދުލުގެ ނިޒާމުގައި ކަން ހިނގައިދިޔަ ގޮތާއި ބެހޭ މަޢުލޫމާތު ހާމަކުރެވޭތޯ މަސައްކަތް ކުރައްވާނެކަމަށް ޝަމީމް ވިދާޅުވިއެވެ. އޭގެ ތެރޭގައި ތަޙްޤީޤީ އިދާރާތަކުން ޕީޖީ އޮފީހާއި މަޝްވަރާކުރުމަށް ޝެޑިއުލްކުރި މައްސަލަތަކާއި، ބަލައިގަނެވުނު މައްސަލަތަކާއި، ގޮތެއް ނުނިމި ހުރި މައްސަލަތަކުގެ ޢަދަދާއި، ޕީޖީ އޮފީހުން ކޯޓުތަކަށް ހުށަހެޅުނު މައްސަލަތަކުގެ ޢަދަދާއި، ބާވަތާއި ހުށަހެޅުނު ކޯޓުތަކުގެ މައުލޫމާތު ހިމެނެއެވެ.

މީގެއިތުރުން، އެމަހެއްގައި ޝަރީޢަތުގެ އަޑުއެހުންތައް ތާވަލުކުރެއްވި ކޯޓުތަކާއި، އެ އަޑުއެހުންތައް ބޭއްވުނުކަން ނުވަތަ ނޫންކަންވެސް އާންމު ކުރެއްވުމަށް މަސައްކަތް ކުރައްވާނެކަން ޝަމީމް ފާހަގަކުރެއްވިއެވެ. އަދި ކޯޓުތަކުން އެމަހެއްގައި ނިންމެވި މައްސަތަކުގެ ޖުމްލަ ޢަދަދާއި، އެމައްސަލަތައް ސާބިތުވިކަން ނުވަތަ ނޫންކަމާއި، އެމައްސަލަތައް ނިންމެވި ކޯޓުތަކުގެ ނަންތައް ފަދަ މައުލޫމާތުތައްވެސް އޭގެ ތެރޭގައި ހިމެނެއެވެ.