މައިންބަފައިންނާއި ގާތްތިމާގެ މީހުންނާއި ގުޅުން ބަދަހިކުރުމަކީ ރިޒުގު ތަނަވަސްވާނެ ކަމެއް: ޚުތުބާ
ބައެއް ދަރީން އެމީހުންގެ މައިންބަފައިން އުމުރުން ދުވަސްވުމުން، އަޅާނުލައި ގެއިން ބޭރުކޮށްލާ
ހުކުރު ނަމާދު ކުރުމަށް އިސްލާމީ މަރުކަޒުގައި ޖަމާއަތް ހަދައިގެން
މައިންބަފައިންނާއި ގާތްތިމާގެ މީހުންނަށް ހެޔޮކޮށް ހިތައި ގުޅުން ބަދަހިކުރުމަކީ ދަތިކަމަކާއި ނުލައި ރިޒުގު ތަނަވަސްވާނެ ކަމެއް ކަމަށް ހުކުރު ޚުތުބާގައި ބުނެފިއެވެ.
މައިންބަފައިންނަށާއި ގާތްތިމާގެ މީހުންނަށް ހެޔޮކޮށް ހިތުން މިމައުޟޫއަށް އެކިކަންކޮޅުތަކަށް އިއްވި ޚުތުބާގައި ބުނީ މައިންބަފައިންނަށް އިހާނާތްތެރިކޮށް ހިތާ މީހުންނަށް އާހިރަތް ދުވަހުން ލިބޭ އަޒާބުގެ އިތުރުން ދުނިޔެ މަތީގައި ވެސް އެކަމުގެ އުގޫބަތް ލިބޭނެ ކަަމަށެވެ. މައިންބަފައިންނަށް ކަމޭހިތުމުގެ ތެރޭގައި އެމީހުން ދުނިޔެ ދޫކޮށް ދިއުމުން އެމީހުންނަށް ހެޔޮ ދުއާ ކުރުމާއި، އެމީހުންގެ ގާތްތިމާގެ މީހުންނާއި ރަހުމަތްތެރިންނާއެކު ގުޅުން ދެމެހެއްޓުންވާ ކަމަށެވެ. އަދި ގާތްތިމާގެ ގުޅުން ދެމެހެއްޓުމަކީ މާތްﷲގެ ރަހުމަތް ލިބޭނެ ކަމެއް ކަމަށެވެ.
ޚުތުބާގައި ބުނީ މައިންބަފައިންނަށާއި، ގާތްތިމާގެ މީހުންނަށް ހެޔޮކޮށް ހިތައި ގުޅުން ބަދަހިކުރުމަކީ އެއްވެސް ބުރަކަމަކާއި ދަތިކަމަކާ ނުލައި ރިޒުގު ތަނަވަސްވާނެ ކަމެއް ކަމަށާއި، އެކަމުގެ ސަބަބުން ހެޔޮކަމާއި ލާބައިގެ ގިނަގުނަ ދޮރުތައް ހުޅުވޭ ކަމެއް ކަމަށެވެ. ނަމަވެސް މިއަދުގެ ހާލަތު ބަދަލުވެ، މި މުޖުތަމައުގެ ތެރެއިން ހިތާމަހުރި މަންޒަރުތައް ފެންނަމުންދާ ކަމަށް ޚުތުބާގައި ބުނެފައިވެއެވެ.
އެގޮތުން ބައެއް ދަރީން އެމީހުންގެ މައިންބަފައިން އުމުރުން ދުވަސްވުމުން، އަޅާނުލައި ގެއިން ބޭރުކޮށްލާ ކަމަށާއި، މައިންބަފައިން ބިކަ ހާލުގައި ޖައްސާ މަންޒަރު ފެންނަ ކަމަށެވެ. ޚުތުބާގައި ބުނީ ދަރިން ތަނަވަސްކަންމަތީ ތިބެމެ މައިންބަފައިން އެހެން މީހުން ގާތަށް ގޮސް، ސަލާން ޖަހައިގެން ކައި ބޮއެ އުޅޭ ކަމަށާއި، އުމުރުން ދުވަސްވެފައި ތިބި މައިންބަފައިންނަށް އެއްޗެހި ކިޔައި އަޑުލައި މޫނު މަތީގައި ޒުވާބުކޮށް އުޅޭ ކަމަށެވެ. އަދި ބައެއް ފަހަރު މުސްކުޅި މައިންބަފައިންނަށް ސަރުކާރުން ދޭ އިނާޔަތުގައި ޖެހި މައިންބަފައިން އެ ފައިސާކޮޅުން ވެސް މަހްރޫމު ކުރާ ކަމަށް ޚުތުބާގައި ބުނެފައިވެއެވެ. މިގޮތަށް ކަންތައް ކުރުމަކީ، ހުއްދަވެގެންވާ ކަމެއްނޫންކަން ފާހަގަކުރައްވައި ޚުތުބާގައި ބުނީ ކޮންމެ އިންސާނަކު ވެސް، ދުނިޔޭގައި ލަހައްޓަވައިފި ނަމަ، މުސްކުޅި ޢުމުރާ ކުރިމަތި ލާން ޖެހެނޭ ކަމަށާއި، ތިމާގެ ޙަޔާތުގައި މަންމަ ނުވަތަ ބައްޕަ އުމުރުން ދުވަސްވެ، ބޯ ކޮށިވެފައިވާ ޙާލުގައި، އެ މީހުންގެ ފަރާތުން ދިމާވާ ކަންކަމަށް ކެތްތެރިވާން ޖެހޭ ކަމަށް ޚުތުބާގައި ބުނެފައިވެއެވެ.
ޚުތުބާގައި ބުނީ ކާބަފައިންނަށް ވުރެ މާއްދީ ހާލަތު މިއަދު ވާ ތަނަވަސް ކަމަށާއި، ލިބިފައިވާ ވަސީލަތްތައް ގިނަ ކަމަށެވެ. ނަމަވެސް މިއަދު ގިނަ ބަޔަކު ދިރިއުޅެމުންދަނީ ހާސްކަމާއި ކަންބޮޑުވުމެއްގެ ތެރޭގައިކަން ޚުތުބާގައި ފާހަގަކޮށްފައިވެއެވެ.
ޚުތުބާގައި ބުނީ ކާބަފައިން މާތްﷲއަށް އިމާންވެ އެކަލާނގެ އެންގެވި ކަންތައްތައް ދަސްކޮށް އެއާ އެގޮތަށް އަމަލުކުރި ކަމަށެވެ. މިކަމުގެ ސަބަބުން އެމީހުންނަށް މާތް ﷲގެ އިނާޔަތާއި ރިއާޔަތް ލިބުނު ކަމަށް ޚުތުބާގައި ބުނެފައިވެއެވެ. އަދި ކާބަފައިންގެ ޚާއްސަ ސިފަތަކުގެ ތެރޭގައި މައިންބަަފައިންނަށް ކަމޭހިތުމާއި އަޅައިލުން ހިމެނޭ ކަމަށެވެ. އެހެންކަމުން މުސްލިމް މުޖުތަމައުތައް މައިންބަަފައިންނަށް ގަދަރުކުރާ އެމީހުންނަށް އިހްތިރާމް ކުރާ މުޖުތަމައުތަކަކަށްވި ކަމަށް ޚުތުބާގައި ބުނެފައިވެއެވެ.
އެހެންކަމުން މިއަދު ވެސް އެއާދަތައް ހިފަހައްޓައި، މައިބަފައިންނަށް ހެޔޮކޮށް ހިތައި ތިމާގެ ގުޅުން ދެމެހެއްޓުމަށް ޚުތުބާގައި ވަނީ ގޮވާލާފައެވެ.
