ސްޓެލްކޯގެ ކުރީގެ ޗެއާރމަން މަރުހޫމް ރަޝީދުގެ ތައުޒިޔާގެ ދަފްތަރު ރައީސް ހުޅުވައިދެއްވައިފި
މަރުހޫމް ރަޝީދަކީ ރާއްޖޭގެ ހަކަތައިގެ ސިނާއަތު ކުރިއަރުވައި ތަރައްގީކުރެއްވުމަށް ގިނަ މަސައްކަތްތަކެއް ކުރައްވާފައިވާ ބޭފުޅެއް
ސްޓެލްކޯގެ ކުރީގެ ޗެއާރމަން މަރުހޫމް ރަޝީދުގެ ތައުޒިޔާގެ ދަފްތަރު ހުޅުވުން
ސްޓެލްކޯގެ ކުރީގެ ޗެއާރމަން އަލްމަރުހޫމް މުހައްމަދު ރަޝީދުގެ ތައުޒިޔާގެ ދަފްތަރު ރައީސް ސޯލިހު ހުޅުއްވައިދެއްވައިފިއެވެ.
ކަރަންޓުގެ ސިނާއަތަށް ބައި ގަރުނަށްވުރެ ގިނަ ދުވަހު އަގުނުކުރެވޭ ފަދަ ހިދުމަތްތަކެއް ކުރެއްވި ސްޓެލްކޯގެ ބޯޑުގެ ކުރީގެ ޗެއާރމަން މުހައްމަދު ރަޝީދުގެ ތައުޒިޔާގެ ދަފްތަރު ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ހުޅުއްވާދެއްވާފައިވަނީ އެކަމަށްޓަކައި އަންގާރަ ދުވަހުގެ ހެނދުނު ސްޓެލްކޯގައި ބޭއްވި ޚާއްސަ ރަސްމިއްޔާތެއްގައެވެ.
ތައުޒިޔާގެ ދަފުތަރުގައި ރައީސް ސޯލިހު ލިޔުއްވި ބަޔާނުގައި އެމަނިކުފާނު ވަނީ މަރްހޫމް މުހައްމަދު ރަޝީދަކީ ރާއްޖޭގެ ހަކަތައިގެ ސިނާއަތު ކުރިއަރުވައި ތަރައްގީކުރެއްވުމުގައި ދިގު މުއްދަތެއްގައި އަގުހުރި މަސައްކަތްތަކެއް ކުރެއްވި އަދި މާލޭގެ ކަރަންޓުގެ ހިދުމަތް ފުޅާކޮށް ޒަމާނީ ކުރުމުގައި މުހިންމު ދައުރެއް އަދާކުރެއްވި ހިދުމަތްތެރިއެއްކަން ފާހަގަކުރައްވާފައެވެ. ޚިދުމަތުގެ ދާއިރާގައި މަރްހޫމް ރަޝީދު ފާހަގަކުރެވެނީ ކަމަށް ކަމޭހިތްތަވައި ފަރުވާތެރިކަމާއެކު ޚިދުމަތުގައި ދެމިހުންނެވި އިންޖިނޭރެއްގެ ގޮތުގައިކަމަށާއި މަރްހޫމް ރަޝީދު ވަކިވެވަޑައިގެންނެވީ ތެދުވެރިކަމާއި އަމާނާތްތެރިކަމާއެކު ޚިދުމަތްކުރުމުގެ ރިވެތި ނަމޫނާއެއް ދައްކަވާފައި ކަމުގައި ރައީސްގެ ބަޔާނުގައި ވަނީ ފާހަގަކުރައްވާފައެވެ.
ސްޓެލްކޯގެ މެނޭޖިންގ ޑިރެކްޓަރ ހަސަން މުޣުނީ ލިޔުއްވި ބަޔާނުގައި ވަނީ ޗެއާރމަން ރަޝީދަކީ، މަދުރަސީ ދައުރު ނިމުނީއްސުރެ، އަވަހާރަވަންދެން، ހަކަތައިގެ ސިނާއަތުގައި ދެމިހުންނެވި، ގައުމީ ހިދުމަތްތެރިއެއްކަން ފާހަގަ ކުރައްވާފައެވެ. ޗެއާރމަން ރަޝީދަކީ، އެކުގައި މަސައްކަތް ކުރަން ފަސޭހަ ތަޖުރިބާހުރި، އަޚުލާގު ރަނގަޅު ހީވާގި ބޭފުޅެއް ކަން މުޣުނީ ފާހަގަކުރެއްވިއެވެ. އަދި ރަޝީދު އަވަހާރަވުމަކީ، ސްޓެލްކޯއަށާއި، ކަރަންޓުގެ މުޅި ސިނާއަތަށް އަދި މުޅި ގައުމަށްވެސް ލިބުނު ގެއްލުމެއްގެ ގޮތުގައި މުޣުނީ ވަނީ ފާހަގަކުރައްވާފައެވެ.
މަރުހޫމް ރަޝީދުގެ ތައުޒިޔާގެ ދަފްތަރު ހުޅުވުމަށް ބޭއްވި ރަސްމިއްޔާތުގައި ސްޓެލްކޯގެ ބޯޑް މެމްބަރުންނާއި، ކުންފުނީގެ އިސްވެރިންގެ އިތުރުން މަރްހޫމް ރަޝީދުގެ އާއިލާގެ ބޭފުޅުން ވަނީ ބައިވެރިވެވަޑައިގެންފައެވެ.
މަރުހޫމް ރަޝީދު އަވަހާރަވީ މިދިޔަ ޑިސެމްބަރު މަހުގެ 26 ވީ އާދީއްތަ ދުވަހު އާލާސްކަންފުޅާ އުޅުއްވުމަށްފަހުއެވެ. ރަޝީދު ސްޓެލްކޯގެ ޚިދުމަތާއި އެންމެ ފުރަތަމަ ގުޅިވަޑައިގެންނެވީ 1971 ވަނަ އަހަރު އެޕްރެންޓިސްޝިޕްގައެވެ. އޭގެ ފަހުން އިންޖީނިއަރުކަމާއި، ޑެޕިއުޓީ ޑިރެކްޓަރ މެނޭޖީރިއަލްގެ އިތުރުން އެގްޒެކެޓިވް ޑިރެކްޓަރުގެ މަގާމާއި، އެސިސްޓެންޓް މެނޭޖިންގ ޑިރެކްޓަރުގެ މަގާމާއި، ޑެޕިއުޓީ މެނޭޖިންގ ޑިރެކްޓަރުގެ މަގާމާއި، އެކުންފުނީގެ ސީއީއޯގެ މަގާމުވެސް ވަނީ ފުރުއްވާފައެވެ.
މަރުހޫމް ރަޝީދު ބޯޑުގެ ޗެއާރމަން ކަމުގެ މަގާމަށް އައްޔަން ކުރައްވާފައިވަނީ 12 ފެބްރުއަރީ 2019 ގައެވެ. ރަޝީދު އަވަހާރަވުމާއި ހަމައަށްވެސް ހުންނެވީ އެކުންފުނީގެ ބޯޑުގެ ޗެއާރމަން ކަމުގެ މަގާމުގައެވެ. މަރުހޫމް ރަޝީދުގެ ތައުޒިޔާގެ ދަފުތަރުގައި ސޮއި ކުރުމުގެ ފުރުސަތު މިމަހުގެ 22 ވަނަ ދުވަހާއި ހަމައަށް ވަނީ ހުޅުވާލާފައެވެ.
