"ޤާނޫނުގައި ބުނާ މުއްދަތާއި އެއްގޮތަށް މައްސަލަތައް ކުރިއަށް ނުގެންދަވާ ފަނޑިޔާރުންގެ މައްސަލަތައް ބަލަންޖެހޭނެ"

ޤާނޫނުގައި ބުނާ މުއްދަތަށް ފަނޑިޔާރުން އަމަލު ކުރާނަމަ، 4 މަހެއްހާ ދުވަސް ތެރޭގައި މައްސަލަ ނިންމާލެވޭނެކަމަށް ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެމްބަރު ޙަަސަން ލަތީފް ވިދާޅުވެއްޖެއެވެ.

ފަނޑިޔާރުންގެ ޤާނޫނަށް އިސްލާޙު ގެނައުމަށް ހުށައަޅާފައިވާ ބިލަށް ވާހަކަ ދައްކަވަމުން މެމްބަރުން ވަނީ ކޯޓުތަކުގައި ޝަރީއަތްތައް ދިގުލައިގެންދާ މައްސަލައަށް އަލިއަޅުވާލައްވާފައެވެ. އެގޮތުން މެމްބަރު ޙަސަން ލަތީފް ވިދާޅުވީ، ކޯޓުތަކުގެ ޤާނޫނާއި މުޅި ޖިނާއީ އިޖުރާއަތުގެ ނިޒާމަށް މި މަޖިލީހުން ގިނަ އިސްލާޙުތަކެއް ގެނެސްފައިވާ ކަމަށެވެ. އެހެންނަމަވެސް، ކޯޓުތަކުގައި އަދިވެސް މައްސަލަތައް ދިގުލައިގެންދާއިރު، ޤާނޫނުގައި ބުނާ މުއްދަތަށް ފަނޑިޔާރުން އަމަލު ކުރާނަމަ، 4 މަހެއްހާ ދުވަސް ތެރޭގައި އެ މައްސަލައެއް ނިންމާލެވޭނެކަން މެމްބަރު ޙަސަން ލަތީފް ފާހަގަ ކުރެއްވިއެވެ.

ވަކިން ޚާއްސަކޮށް ޖިނާއީ އިޖުރާއަތުގެ ޤާނޫނުގައި ބަޔާން ކޮށްފައިވާ މުއްދަތާއި އެއްގޮތަށް މައްސަލަތައް ކުރިއަށް ނުގެންދަވާ ފަނޑިޔާރުންގެ މައްސަލަތައް ބަލަންޖެހޭނެކަން މެމްބަރުގެ ވާހަކައިގައި ފާހަގަ ކުރެއްވިއެވެ.

އެކަމާ ގުޅޭގޮތުން ވެލިދޫ ދާއިރާގެ މެމްބަރު މުޙައްމަދު ޢަބްދުﷲ ޝަފީޤް ވިދާޅުވީ، ޝަރީއަތްތައް އަވަސްވާނެ ގޮތެއްގެ މަތިން މަސައްކަތްތައް ތަރުތީބުކުރަން އެބަޖެހޭކަމަށެވެ. ޝަފީޤް ވަނީ މުޅި ޖުޑީޝަރީ އިސްލާޙު ކުރުމަށް ކުރަމުންދާ މަސައްކަތަށް ޙައްލު ގެނެވޭނީ އޭރުންކަމަށް ވިދާޅުވެފައެވެ.

ބިލާއި ގުޅޭގޮތުން ދެއްކެވި ވާހަކަފުޅުގެ ތެރެއިން ބާރަށު ދާއިރާގެ މެމްބަރު އަހުމަދު އަބްދުﷲ ވިދާޅުވީ، ކަންކަން އިސްލާޙު ކުރުމުގެ މަސައްކަތް ކުރަމުންދާއިރު، ދެފަރާތުންވެސް ކަންކަން ޙައްލު ކުރުމުގެ ރޫހުގައި މަސައްކަތް ކުރަންޖެހޭ ކަަމަށެވެ. އެގޮތުން ޝަރުއީ ދާއިރާގެ މިސްރާބުވެސް ހުންނަންވާނީ އަވަހަށް އިންސާފު ލިއްބައިދެވޭނެ މަގަކުންކަން މެމްބަރު ފާހަގަ ކުރެއްވިއެވެ. ކުރު މުއްދަތެއްގެ ތެރޭގައި މައްސަލަތަކުގެ ނިޔާ އިއްވި، އަވަހަށް އިންސާފު ޤާއިމު ކުރެވެންޖެހޭކަމަށް މެމްބަރު ވިދާޅުވިއެވެ.

އޭގެ އިތުރުން، ރަށްރަށުގެ ކޯޓުތަކުގައިވެސް މައްސަލަތައް ލަސްވާ މައްސަލައަށް މެމްބަރުން ވަނީ އަލިއަޅުވާލައްވާފައެވެ. އެގޮތުން ދާންދޫ ދާއިރާގެ މެމްބަރު ޔައުޤޫބު އަބްދުﷲ ވިދާޅުވީ، ރަށްރަށުގެ ކޯޓުތަކުގައިވެސް މައްސަލަތައް ދިގުލައިގެންދާ ކަމަށެވެ. މެމްބަރު ވަނީ ރަށްރަށުގެ ފަނޑިޔާރުންނާއި ގުޅޭ އޮޑިޓެއް ޖޭއެސްސީ މެދުވެރިކޮށް ހެދުމަށްފަހު މަޖިލީހުން އެކަންކަން ގާތުން ބަލަންޖެހޭކަން ފާހަގަ ކުރައްވާފައެވެ.

މި ބިލަށް ވާހަކަދައްކަވަމުން ވިލުފުށީ ދާއިރާގެ މެމްބަރު ޙަސަން އަފީފް ވިދާޅުވީ، ކޯޓަކަށް މައްސަލައެއް ހުށައެޅުމުން އެ މައްސަލަ ނިންމުމަށް ވަކި މުއްދަތެއް ޖިނާއީ އިޖުރާއަތުގެ ޤާނޫނުގައި ބަޔާންކޮށްފައިވާ ކަމަށެވެ. ނަމަވެސް ކޯޓުތަކުން އެ ޤާނޫނުތަކާއި އެއްގޮތަށް އަމަލުކުރާކަން ކަށަވަރު ކުރެވޭތޯ މެމްބަރު ވަނީ ސުވާލު ކުރައްވާފައެވެ. އެގޮތުން ކިތަންމެ ޤާނޫނެއް ފާސްކުރިނަމަވެސް، އޭގެ ފޮނިމީރުކަން ލިބޭނީ އެ ޤާނޫނުތައް ތަންފީޒު ކުރެވިގެންކަންވެސް މެމްބަރުގެ ވާހަކަފުޅުގައި ފާހަގަ ކުރައްވާފައިވެއެވެ. ކޯޓުތަކަށް ހުށައެޅޭ މައްސަލަތައް ލަސްވާނަމަ، އިންސާފު ލިބުނީކަމަށް ނުބެލެވޭނެކަމަށްވެސް މެމްބަރު ވިދާޅުވިއެވެ.