ސުވަރުގެ ވަނުމުގެ މަގަކީ އުނދަގޫތަކުން ފުރިފައިވާ މަގެއް، ގަދައަޅާ މަސައްކަތް ކުރޭ: ޚުތުބާ

ސުވަރުގެ ވަނުމުގެ މަގަކީ އުނދަގޫތަކުން ފުރިފައިވާ މަގެއް ކަމަށާއި، ގަދައަޅައި މަސައްކަތް ކުރަންޖެހޭ ކަމަށް ހުކުރު ޚުތުބާގައި ބުނެފިއެވެ.

‘ސުވަރުގޭގެ މަތިވެރި ނިއުމަތްތައް’ މި މައުޟޫއަށް ރާއްޖޭގެ އެކިކަންކޮޅުތަކަށް އިއްވި ހުކުރު ޚުތުބާގައި ބުނީ އިންސާނާގެ ދުންޔަވީ ހަޔާތުގެ ހުރިހާވެސް މަގުސަދަކީ، ދުނިޔޭގައި ހެޔޮ އަމަލުކޮށް، މާތް ﷲ އާއި އެކަލާނގެ ރަސޫލާ އަންގަވާފައިވާ ގޮތަށް އުޅުން ކަމަށާއި، އެފަދަ މީހުންނަށް ހުރި ތަނަކީ ނިއުމަތްތަކުން ފުރިގެންވާ ތަނަވަސް ސުވަރުގެ ކަމަށެވެ. ޚުތުބާގައި ބުނީ ސުވަރުގޭގައި 8 ދޮރުކޮޅެއް ވާ ކަމަށާއި، އެތަނުގައި މަލާއިކަތުން ސުވާރުގެ ވަންތަވެރީންނަށް އިސްތިގުބާލު ކުރައްވައި މަރުހަބާ ކިޔުއްވާނެ ކަމަށެވެ. އަދި އެ ދޮރުދޮރުކޮޅުތަކުން އަމާންކަމާއި ރައްކާތެރިކަމާއެކު ސުވާރުގެ ވަނުމަށް ހުށަހަޅުއްވާނެ ކަމަށް ޚުތުބާގައި ބުނެފައިވެއެވެ.

ޚުތުބާގައި ބުނީ މާތްﷲ އަށް ކުއްތަންވުމަށް ފަރްޟު އަޅުކަމުގެ އިތުރުން، ސުންނަތް އަޅުކަންތައް ގިނަކުރުމަށް އިސްލާމް ދީނުގައި ބާރުއަޅުއްވާފައިވާ ކަމަށެވެ.

ޚުތުބާގައި ބުނީ ސުވަރުގޭގެ ނިއުމަތްތައް ލިބޭހުށީ، ފާފަތަކާއި، މުންކަރާތްތަކާއި ދުރުހެލިވެ، ﷲ އަށް ބިރުވެތިވެ، މާތް ނަބިއްޔާއަށް ތަބާވާ މީހުންނަށް ކަމަށާއި، މައިންބަފައިންނަށް އިޙްސާންތެރިވެ، ފަރުޟު ފަސް ނަމާދު އަދާކޮށް، ޒަކާތް ރޯދަ ހިފައި، ޞާލިޙު އަމަލުކޮށް އުޅޭ މީހުންނަށް ކަމަށެވެ. އަދި ސުވަރުގެ ވަނުމަށް އޮތް މަގަކީ ކިތައްމެ އުނދަގޫ މަގެއް ކަމުގައި ވިޔަސް، މުއުމިނު އަޅާ، އެ ހުރަސްތައް ގިރާކުރާނެ ކަމަށާއި، މާތް ﷲ ގެ ރަހުމަތަށް އުއްމީދު ކުރާނެ ކަމަށެވެ.

ޚުތުބާގައި ބުނީ ޝައިޠާނާގެ ކެހިވެރިކަމުގައި ޖެހި، ދުންޔަވީ ލައްޒަތާއި އަރާމަށް ހެއްލި، އާޚިރަތުގެ މަތިން ހަދާން ނައްތާލައިގެން ނުވާނެ ކަމަށާއި، ސުވަރުގެ ވަނުމުގެ މަގަކީ، ނަފުސުގެ އެދުންތަކާ ދެކޮޅަށް، ޖިހާދު ކޮށްގެން މެނުވީ ހޯދޭނެ މަގެއް ނޫން ކަމަށެވެ. މުދަލާއި، ފުރާނައިން އެތަކެއް ގުރުބާނީއެއް ވެގެން ނޫނީ ކާމިޔާބު ކުރެވޭނެ މަގެއް ނޫން ކަމަށް ޚުތުބާގައި ބުނެފައިވެއެވެ.

މި ދުނިޔޭގެ ނިއުމަތްތަކަކީ، ވަގުތީ އެއްޗެއްކަން ފާހަގަކޮށް ޚުތުބާގައި ބުނީ ސުވަރުގޭގެ ނިއުމަތްތަކާ އަޅާ ބަލާ އިރު، އެއީ އަގެއް ނެތް، މަދު މިންވަރެއް ކަމަށާއި، ހަރާމެއް، ހަލާލެއް ބެލުމެއް ނެތި، ދީނީ ވާޖިބުތަކަށް ސަމާލުކަމެއް ނުދީ، މީސްތަކުން އަވަދިނެތި އުޅެނީ، ފަނާވަނިވި މި ދުނިޔޭގެ ވަގުތީ އަރާމާއި، ލައްޒަތު ހޯދުމަށް ކަމަށެވެ. ޚުތުބާގައި ބުނީ ސުވަރުގެ ވަނުމުގެ މަގަކީ، އުނދަގޫތަކުން ފުރިފައިވާ މަގެއް ކަމަށާއި، މުންކަރާތްތަކާއި، ޝަހުވާނީ އެދުންތަކުން ވަށާލެވިފައިވާ މަގެއް ކަމަށެވެ. އަދި ނަރަކަ ވަށާލެވިފައި ވަނީ، ކުރާ ހިތްވާ ކަންތައްތަކުން ކަމަށާއި، އެސުވަރުގެ ހޯދުމަށް ކޮންމެ މީހަކު ވެސް ގަދައަޅައި މަސައްކަތް ކުރަންޖެހޭ ކަމަށް ޚުތުބާގައި ގޮވާލާފައިވެއެވެ.